ការចាក់វ៉ាក់សាំងការពារជំងឺមហារីកមាត់ស្បូន (HPV) លើកុមារីអាយុ៩ឆ្នាំនាពេលនេះ នឹងផ្តល់នូវសារៈសំខាន់ សម្រាប់ការពារកុមារីឱ្យចៀសផុតពីការកើតជំងឺមហារីកមាត់ស្បូននាពេលអនាគត ជាពិសេសនៅពេលពួកគាត់មានអាយុចាប់៤៥ឆ្នាំឡើងទៅ អាចចៀសផុតពីជំងឺមហារីកមាត់ស្បូន។

នៅក្នុងដំណើរការយុទ្ធនាការចាក់វ៉ាក់សាំងការពារជំងឺមហារីកមាត់ស្បូន (HPV) លើកុមារីអាយុ៩ឆ្នាំ នៅទូទាំងប្រទេសដោយឥតគិតថ្លៃ ក្រសួងសុខាភិបាលបានបង្ហាញយុទ្ធសាស្រ្ត ចាក់វ៉ាក់សាំងការពារជំងឺមហារីកមាត់ស្បូន លើកុមារីអាយុ៩ឆ្នាំ (លើស៩៥%) នៅតាមសាលាបឋមសិក្សាក្រោមការសហការណ៍ជាមួយក្រសួងអប់រំ យុវជន និងកីឡា។ ដោយឡែកចំពោះកុមារីអាយុ៩ឆ្នាំ ចំនួនប្រមាណ៥% ដែលមិនបានចូលសាលរៀន ក្រសួងសុខាភិបាល បានចាត់បញ្ជូនក្រុមចុះចាក់តាមភូមិ/សហគមន៍ ដោយមានការសហការណ៍ពីអាជ្ញាធរមូលដ្ឋាន ប្រធានភូមិ និង ក្រុមទ្រទ្រង់សុខភាពភូមិ។

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល មានប្រសាសន៍ថា ជំងឺមហារីកមាត់ស្បូន គឺជាអាទិភាពសុខភាពសាធារណៈដែលត្រូវបានផ្តោតការយកចិត្តទុកដាក់ដ៏សំខាន់នៅព្រះរាជាណាចក្រកម្ពុជា។  ឯកឧត្តមសាស្ត្រាចារ្យ បន្តថា ជំងឺមហារីកមាត់ស្បូន ត្រូវបានគេប្រសិទ្ធនាមថាជា “ឃាតកលាក់មុខ” ហើយក៏ជាជំងឺមួយដែលអាចការពារបានទាំងស្រុងតាមរយៈថ្នាំបង្ការ។

ឯកឧត្តមសាស្ត្រាចារ្យ ឈាង រ៉ា បន្តថា វីរុសមហារីកមាត់ស្បូនបង្កឱ្យកើតជំងឺមហារីកមាត់ស្បូន ហើយជំងឺនេះជាមូលហេតុចម្បងទីបួន នៃការស្លាប់របស់ស្ត្រីដោយជំងឺមហារីកនៅទូទាំងពិភពលោក ហើយភាគច្រើនកើតនៅក្នុងប្រទេសដែលមានប្រាក់ចំណូលទាប និងមធ្យម។ នៅកម្ពុជា ជំងឺមហារីកមាត់ស្បូនគឺជាមូលហេតុចម្បងទី២ ក្នុងចំណោមមហារីកគ្រប់ប្រភេទដែលកើតទៅលើស្ត្រីគ្រប់វ័យ។

បើយោងទៅតាមរបាយការណ៍របស់អង្គការសុខភាពពិភពលោកឆ្នាំ២០២០ បានបង្ហាញថា ជំងឺមហារីកមាត់ស្បូនសរុបចំនួនប្រមាណ ១១៣៥ករណី ត្រូវបានធ្វើរោគវិនិច្ឆ័យ ហើយចំនួន ៦៤៣ករណីបានស្លាប់។ ទន្ទឹមគ្នានេះ ថ្នាំបង្ការជំងឺមហារីកមាត់ស្បូន គឺមានប្រសិទ្ធភាពខ្ពស់ក្នុងការការពារស្ត្រីពីជំងឺមហារីកមាត់ស្បូនតាមរយៈការកាត់ផ្តាច់នូវការចម្លងមេរោគមហារីកមាត់ស្បូន។

បើតាមអ្នកជំនាញជំងឺមហារីក បានឱ្យដឹងថា ជំងឺមហារីកមាត់ស្បូនបង្កឡើងដោយវីរុស HPV កាចៗជាង ២០ ប្រភេទ, តែយ៉ាងណាអ្នកវិទ្យាសាស្ត្រវេជ្ជសាស្រ្តអាចផលិតវ៉ាក់សាំងប្រឆាំងមហារីកមាត់ស្បូនបានដោយជោគជ័យ ដោយវ៉ាក់សាំងនេះមានប្រសិទ្ធភាពខ្ពស់ លើមនុស្សនៅក្មេង និងនៅលីវ មិនទាន់មានការរួមភេទ អាយុពី៩ ទៅ២៦ឆ្នាំ ខណៈអាយុលើសពីនេះ មានប្រសិទ្ធភាពតិច។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ ​យុវជន និងកីឡា មានប្រសាសន៍ថា យុទ្ធនាការចាក់វ៉ាក់សាំងការពារជំងឺមហារីកមាត់ស្បូន លើកុមារីអាយុ៩ឆ្នាំ នៅទូទាំងប្រទេសដោយឥតគិតថ្លៃនេះ ជំរុញឱ្យសិស្សកុមារីដែលមានអាយុ៩ឆ្នាំ ទទួលបានថ្នាំបង្ការការពារជំងឺមហារីកមាត់ស្បូនឥតគិតថ្លៃ នៅតាមសាលារៀន ក៏ដូចជាមណ្ឌលសុខភាពនានា។ លោកជំទាវបន្តថា វ៉ាក់សាំងការពារជំងឺមហារីកមាត់ស្បូននេះ គឺមានសារៈសំខាន់ណាស់សម្រាប់ប្អូនៗដែលនៅជាកុមារី ដើម្បីការពារ ប្រយុទ្ធប្រឆាំងទៅនឹងជំងឺមហារីកមាត់ស្បូន ដោយការចាក់វ៉ាក់សាំងតែម្ដងគត់ក្នុងជីវិតនេះ នឹងអាចចូលរួមការការពារប្អូនៗកុមារីពេញមួយជីវិតអំពីជំងឺមហារីកមាត់ស្បូន។

ជាមួយគ្នានេះ អ្នកនាំពាក្យក្រសួងអប់រំ ក៏បានអំពាវនាវ ក៏ដូចជាលើកទឹកចិត្តទៅដល់មាតាបិតាឱ្យនាំកូនស្រីដែលមានអាយុ៩ឆ្នាំ ទៅចាក់វ៉ាក់សាំងការពារជំងឺមហារីកមាត់ស្បូនដោយឥតគិតថ្លៃ តាមរយៈយុទ្ធនាការចាក់វ៉ាក់សាំងការពារជំងឺមហារីកមាត់ស្បូនរៀបចំដោយក្រសួងសុខាភិបាល និងក្រសួងអប់រំ ឬអាចទទួលនូវការចាក់វ៉ាក់សាំងការពារជំងឺមហារីកមាត់ស្បូននេះ នៅតាមមណ្ឌលសុខភាពនានា។

គួរជម្រាបជូនថា យោងទៅលើការសិក្សាស្រាវជ្រាវតាមបែបវិទ្យាសាស្ត្ររបស់អង្គការសុខភាពពិភពលោកនាពេលបច្ចុប្បន្នបានបង្ហាញថា ថ្នាំបង្ការជំងឺមហារីកមាត់ស្បូនចំនួន១ដូស គឺមានប្រសិទ្ធភាពខ្ពស់ប្រមាណពី ៨០%ទៅ ៩០% ក្នុងការកាត់បន្ថយការឆ្លង និងការការពារពីជំងឺមហារីកមាត់ស្បូន៕