អង្គការដើម្បីភាពញញឹមនៃកុមារ ឬហៅកាត់ថា PSE បានបង្កើតឡើងតាំងពីឆ្នាំ១៩៩៦ ក្នុងគោលបំណងដើម្បីជួយកុមារ យុវជន និងគ្រួសារក្រីក្រឱ្យទទួលបានឱកាសសិក្សា ការព្យាបាល ការអប់រំចំណេះទូទៅ ការបណ្ដុះបណ្ដាលវិជ្ជាជីវៈ និងសម្របសម្រួលរកការងារមួយសមរម្យ ។ នេះជាការលើកឡើងរបស់លោកស្រី លក្ខិណា ដេប៉ាលីយ៉ែរ នាយកគ្រប់គ្រងទូទៅនៃអង្គការដើម្បីភាពញញឹមនៃកុមារ នៅក្នុងឱកាសសន្និសិទកាសែត រាត្រីសប្បុរសធម៌ខួបកំណើតម៉ាមី ដែលជាស្ថានិក PSE ។

លោកស្រី លក្ខិណា ដេប៉ាលីយ៉ែរ បានលើកឡើងថា តាំងពីបង្កើតអង្គការដើម្បីភាពញញឹមនៃកុមារមកដល់បច្ចុប្បន្ន អង្គការបាន និងកំពុងផ្ដល់ការអប់រំ និងបណ្ដុះបណ្ដាលវិជ្ជាជីវៈ ព្រមទាំងឧបត្ថម្ភអាហារដល់សិស្សក្រីក្រចំនួន៦៥០០នាក់ដែលនៅក្នុងមណ្ឌលភ្នំពេញ និងតាមសាលារដ្ឋមួយចំនួនក្នុងរាជធានីភ្នំពេញ ខេត្តព្រះសីហនុ និងខេត្តសៀមរាប ដោយក្នុងនោះមានសិស្សជាង៤៥០០នាក់បានបញ្ចប់ការសិក្សា និងកំពុងបម្រើការក្នុងទីផ្សារការងារ ។

លោកស្រី លក្ខិណា បានបន្តថា ដើម្បីឆ្លើយតបទៅនឹងតម្រូវការក្នុងការផ្គត់ផ្គង់ទៅកាន់កុមារទាំងអស់ អង្គការបានបង្កើតនូវយុទ្ធនាការរៃអង្គាសថវិការចំនួនពីរគឺ យុទ្ធនាការស្វែងរកជំនួយក្នុងការផ្គត់ផ្គង់អាហារ និងយុទ្ធនាការស្វែងរកសម្ភារសិក្សា ។ យុទ្ធនាការស្វែងរកជំនួយក្នុងការផ្គត់ផ្គង់អាហារនេះ សប្បុរសជនអាចចូលរួមបរិច្ចាគជាគ្រឿងឧបភោគបរិភោគ ឬថវិការសម្រាប់រៀងរាល់សប្ដាហ៍ ខែ ឆ្នាំ ​ឬបរិច្ចាគជាកញ្ចប់សម្រាប់អាហារ៥០ចាន ២០០ចាន ឬតាមលទ្ធភាព ។ សម្រាប់យុទ្ធនាការស្វែងរកសម្ភារសិក្សាសប្បុរសជនទាំងអស់ក៏អាចចូលរួមតាមលទ្ធភាពដូចជា កាតាប ឯកសណ្ឋានសិក្សា ប៊ិច សៀវភៅ ឬឧបត្ថម្ភជាកញ្ចប់សម្ភារសិក្សា ដោយមួយកញ្ចប់មានតំលៃ ២៣​ដុល្លារ ​ឬស្មើរនឹង៩២០០០រៀល ដែលសិស្សអាចប្រើប្រាស់បានរយៈពេលពេញ១ឆ្នាំ ។

« កុមារ និងយុវជនទទួលបានអាហារបីពេលក្នុងមួយថ្ងៃ ហើយសប្បុរសជនអាចចូលរួមបរិច្ចាគអាហារមួយចានមានតម្លៃត្រឹមតែ២០០០រៀលប៉ុណ្ណោះ»

លោកស្រី លក្ខិណា ដេប៉ាលីយ៉ែរ ។

លោកស្រីនាយកគ្រប់គ្រងទូទៅបានបន្តថា នៅក្នុងឱកាសនៃខួបគម្រប់៨១ឆ្នាំរបស់ស្ថានិកនៃអង្គការដើម្បីភាពញញឹមនៃកុមារ គឺ លោកស្រី Merie-France des Palliere (Mamie) នៅថ្ងៃទី១៦ ខែកញ្ញា​ ខាងមុខនេះនឹងមានសប្បុរសជនជាច្រើនចូលរួមបរិច្ចាគដើម្បីបន្តបេសកម្មចម្បង «ការជួយកុមារឱ្យ​ឆ្លងផុតពីទុក្ខវេទនា ឆ្ពោះទៅកាន់ការងារអាជីព» និងផ្សព្វផ្សាយទៅសប្បុរសជនបានស្គាល់ និងដឹងពីតម្រូវការរបស់អង្គការដើម្បីភាពញញឹមនៃកុមារ (PSE) កាន់តែច្រើន ។

« កន្លងមកគណៈគ្រប់គ្រងនៃPSE ទទួលបានការឧបត្ថម្ភគាំទ្រខ្លះហើយពីសំណាក់សប្បុរសជនពីក្នុង និងក្រៅប្រទេស »

លោកស្រី លក្ខិណា ដេប៉ាលីយ៉ែរ ។

ជាចុងក្រោយ លោកស្រីបានបញ្ជាក់ថា តម្លាភាពពិតជាមានសារៈសំខាន់ ហើយតម្លាភាពក៏ជាគុណតម្លៃស្នូលនៃអង្គការ ប៉េ អេស អឺ ផងដែរ ដូច្នេះថវិកាសម្រាប់ចំណាយនិងដំណើរការអង្គការទាំងស្រុងត្រូវបានចងក្រងជាឯកសារដែលសាធារណៈជនទូទៅអាចចូលទៅពិនិត្យបានលើគេហទំព័រផ្លូវការរបស់អង្គការ៕