ភ្នំពេញ – ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៦ ឆ្នាំ២០២៣ ក្រោមប្រធានបទ “TVET ផ្តល់ជំនាញ និងការងារសមរម្យ” ដែលប្រារព្ធធ្វើឡើងរយៈពេល២ថ្ងៃ ចាប់ពីថ្ងៃទី១៥ដល់ថ្ងៃទី១៦ ខែមិថុនា ឆ្នាំ២០២៣ បានផ្ដល់ឱកាសដល់សិស្ស និស្សិត បានចូលរួមទស្សនាការតាំងពិព័រណ៍ស្នាដៃ ឱកាសសិក្សាជំនាញបណ្ដុះបណ្ដាលបច្ចេកទេស និងវិជ្ជាជីវដោយឥតគិតថ្លៃ និងឱកាសការងារនៅក្រុមហ៊ុនជាច្រើន។

យុវតី រ៉ា ម៉ីម៉ី ជានិស្សិតឆ្នាំទី២ ផ្នែករដ្ឋបាល នៃវិទ្យាស្ថាន PSE បានលើកឡើងថា រូបនាងបានដឹងកម្មវិធីនេះ តាមរយៈសាលាផ្សព្វផ្សាយឱ្យនិស្សិតមកចូលរួមដោយផ្ទាល់ ។ ម៉ីម៉ី បន្តថា ការចូលរួមកម្មវិធីនេះ នាងមានគោលបំណងស្វែងរកជំនាញថ្មីរៀនបន្ថែមក្រោយបញ្ចប់ការសិក្សា ខណៈនៅ​ក្នុងកម្មវិធីនេះ មានវិទ្យាស្ថានបណ្ដុះបច្ចេកទេស និងវិជ្ជាជីវៈជាច្រើនបានដាក់ស្តង់បង្ហាញ និងផ្ដល់ព័ត៌មានជូនសិស្ស និងនិស្សិតឱ្យចាប់យកជំនាញមួយត្រឹមត្រូវ និងស្រមតាមទីផ្សារការងារ។

យុវតី រ៉ា ម៉ីម៉ី ជានិស្សិតឆ្នាំទី២ ផ្នែករដ្ឋបាល នៃវិទ្យាស្ថាន PSE

“ខ្ញុំមានអារម្មណ៍ថា សប្បាយចិត្តខ្លាំងមែនទែន ដែលបានមកចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) នេះ ហើយក៏ទទួលបានចំណេះដឹងថ្មីៗ និងស្នាដៃកើតចេញពីបច្ចេកទេសច្នៃប្រឌិដ្ឋជាច្រើនរបស់និស្សិតខ្មែរ”

យុវតី រ៉ា ម៉ីម៉ី ក៏បានលើកទឹកចិត្តដល់សិស្ស និស្សិត និងយុវជនទាំងអស់អាចឆ្លៀតពេលមកចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET DAY) ដើម្បីទស្សនាស្តង់ពិព័រណ៍ជាច្រើនទាក់ទងនឹងជំនាញបច្ចេកទេសដែលកំពុងមានតម្រូវការទីផ្សារខ្លាំងនៅក្នុងប្រទេសកម្ពុជាបច្ចុប្បន្ន។

សម្រាប់យុវជនសិស្ស វ៉ន វណ្ណា ជាសិស្សថ្នាក់ទី១១ នៃកម្មវិធីជំនាន់ថ្មី វិទ្យាល័យព្រែកលៀប ក៏បាននិយាយដែរថា រូបគេផ្ទាល់បាននាំយកសមិទ្ធផលជាស្នាដៃដែលបង្កើតបាន យកមកដាក់តាំងបង្ហាញនៅក្នុងទិវាជាតិអប់រំបណ្ដុះបណ្ដាលបច្ចេកទេស (TVET) លើកទី៦ នេះ រួមមាន ទី១. រ៉ូបូតពីងពាង (Spider Robot) ជាប្រភេទសរសេរកូដដើម្បីមានដំណើរការ ទី២. ម៉ាញ៉េទិចស្ទើរើ (Magnetic Stirrer) ជាឧបករណ៍ប្រើនៅក្នុងបន្ទប់ពិសោធន៍ ទី៣. ផ្ទះអគ្គិសនី សម្រាប់បើកនៅពេលដែលមានស្រមោលដើរកាត់។

យុវជនសិស្ស វ៉ន វណ្ណា សិស្សថ្នាក់ទី១១ នៃកម្មវិធីជំនាន់ថ្មី វិទ្យាល័យព្រែកលៀប

“ខ្ញុំមានអារម្មណ៍ថារំភើបដែលបានបញ្ចេញនូវបទពិសោធន៍ដែលខ្លួនមានមកច្នៃឧបករណ៍ប្រើប្រាស់ផ្សេងៗ និងជាបទពិសោធន៍មួយថ្មីសម្រាប់ខ្ញុំនៅថ្ងៃនេះផងដែរ ហើយខ្ញុំពិតជាមានមោទភាពចំពោះខ្លួនឯង និងសាលារបស់ខ្ញុំ”

លោក អ៊ិន វីសត្ថា ប្រធានការិយាល័យនៅនាយកដ្ឋាអភិរក្សតំបន់ការពារធម្មជាតិបឹងទន្លេសាបនៃក្រសួងបរិស្ថាន មានប្រសាសន៍ថា ការប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈនេះ ពិតជាមានសារៈសំខាន់ ព្រោះជាឱកាសដែលអាចចែករំលែកនូវសកម្មភាពការងារ ដល់សិស្ស និស្សិត និងអ្នកចូលរួមទស្សនា ដើម្បីជាគន្លឹះក្នុងការពិចារណាជ្រើសរើសជំនាញ និងផ្ដល់ឱកាសការងារជាច្រើនដល់យុវជនខ្មែរ។

លោក អ៊ិន វីសត្ថា បានបន្ថែមថា ក្រសួងបរិស្ថានក៏បានមកចូលរួមដាក់ស្ដង់បង្ហាញនៅក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ(TVET) លើកទី៦ នេះផងដែរ ដើម្បីចូលរួមផ្សព្វផ្សាយអំពីការងារបរិស្ថានដែលក្រសួងកំពុងធ្វើដើម្បីឱ្យនិស្សិត និងយុវជនជំនាន់ក្រោយអាចពិចារណាជ្រើសរើសជំនាញពិតប្រាកដមួយដែលខ្លួនស្រឡាញ់ពេញចិត្ត និងសមស្របជាមួយចំណេះដឹងរបស់ខ្លួន។ លើសពីនេះ យុវជនអាចយល់ច្បាស់ពីខ្លួនឯងក្នុងការចាប់យកអាជីពណាមួយដើម្បីជាមុខរបរចិញ្ចឹមជីវិតរបស់ខ្លួនឱ្យកាន់តែប្រសើរ។

គួរជម្រាបជូនថា រាជរដ្ឋាភិបាលកម្ពុជាបានកំណត់យកថ្ងៃទី១៥ ខែមិថុនា ជារៀងរាល់ឆ្នាំជាថ្ងៃប្រារព្ធទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ(TVET) ក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល និងផ្នែកឯកជនឱ្យបានយល់អំពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ក្នុងការជំរុញការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារទាំងក្នុង និងក្រៅប្រទេស៕