ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា បានប្រកាសពីការផ្ដល់ការឧបត្ថម្ភថវិកាសម្រាប់គាំទ្រការស្រាវជ្រាវប្រតិបត្តិខ្នាតតូច ដល់គ្រឹះស្ថានបណ្តុះបណ្តាលគ្រូបង្រៀន និងគ្រឹស្ថានសិក្សាសាធារណៈ។
ការឧបត្ថម្ភថវិកាសម្រាប់គាំទ្រការស្រាវជ្រាវប្រតិបត្តិខ្នាតតូច ដល់គ្រឹះស្ថានបណ្តុះបណ្តាលគ្រូបង្រៀន និងគ្រឹស្ថានសិក្សាសាធារណៈនេះ ក្នុងគោលបំណងដើម្បីចូលរួមលើកស្ទួយវប្បធម៌ស្រាវជ្រាវ និងលើកកម្ពស់សមត្ថភាពរៀបចំ និងអនុវត្តការស្រាវជ្រាវប្រតិបត្តិ (Action Research) របស់គ្រូឧទ្ទេសនៅតាមគ្រឹះស្ថានបណ្តុះបណ្តាលគ្រូបង្រៀន និងបុគ្គលិកអប់រំ គ្រូបង្រៀននៅតាមគ្រឹះស្ថានសិក្សាសាធារណៈ ក្រោមកម្មវិធីពង្រឹងការអប់រំគ្រូបង្រៀននៅកម្ពុជា ដំណាក់កាលទី២ (STEPCam II)។
បើតាមសេចក្ដីជូនដំណឹង ក្រសួងអប់រំ នឹងផ្ដល់ការឧបត្ថម្ភថវិកាសម្រាប់គាំទ្រការស្រាវជ្រាវប្រតិបត្តិខ្នាតតូច ដែលមានរយៈពេល ៣-៤ ខែ និងមានថវិកាអតិបរមាចំនួន ៩០០ ដុល្លារអាមេរិក។
បុគ្គលិកអប់រំ គ្រូបង្រៀន និងគ្រូឧទ្ទេស អាចដាក់ស្នើសុំថវិកាជាលក្ខណៈបុគ្គល ឬជាក្រុម (អតិបរមា ៤នាក់ ក្នុងមួយក្រុម) អំពីប្រធានបទចំនួន៦ រួមមាន ១. ភាពជាអ្នកដឹកនាំប្រកបដោយប្រសិទ្ធភាពនៅកម្រិតសាលារៀន, ២. វិធីសាស្ត្របង្រៀនជួយលើកកម្ពស់ការសិក្សាសិស្ស, ៣. ការអប់រំឌីជីថល, ៤. ការអប់រំបរិយាបន្ន (សមធម៌ យេនឌ័រ ពិការភាព។ល។), ៥. ការអប់រំឬការបណ្តុះបណ្តាលគ្រូបង្រៀន និង៦. ការវាយតម្លៃការសិក្សារបស់សិស្សប្រកបដោយនវានុវត្តន៍។
សម្រាប់បុគ្គលិកអប់រំ គ្រូបង្រៀន និងគ្រូឧទ្ទេស ដែលមានចំណាប់អារម្មណ៍អាចទាញយកព័ត៌មានលម្អិត និងទម្រង់សំណៅស្រាវជ្រាវតាមរយៈតំណភ្ជាប់ https://shorturl.at/2tVbS រួចដាក់ស្នើមកនាយកដ្ឋានគោលនយោបាយនៃក្រសួងអប់រំ យុវជន និងកីឡា ចាប់ពីថ្ងៃជូនដំណឹងនេះតទៅ រហូតដល់ថ្ងៃទី១១ ខែមេសា ឆ្នាំ២០២៥ ឬអាចដាក់ផ្ញើសំណើស្រាវជ្រាវជាទម្រង់ទន់ (Soft copy) តាមរយៈលោកស្រី សៀង លីនដា៖ អ៊ីម៉ែល៖ lindaseang999@gmail.com លេខទូរស័ព្ទ៖ ០១២ ៧២១ ០៩៣ (តេឡេក្រាម)៕
