នៅព្រឹកថ្ងៃព្រហស្បត្តិ៍ ទី២៤ ខែសីហា ឆ្នាំ​២០២៣ អង្គប្រជុំលើកដំបូង នៃគណៈរដ្ឋមន្រ្តី នីតិកាលទី៧ ដឹកនាំដោយ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានប្រកាស​ពីការ​អនុវត្ត «យុទ្ធសាស្រ្តបញ្ចកោណ-ដំណាក់កាលទី១» ដែលមានបាវចនា កំណើន ការងារ សមធម៌ ប្រសិទ្ធភាព និងចីរភាព សំដៅ​កសាងមូលដ្ឋានគ្រឹះឆ្ពោះ​ទៅសម្រេច​បាន​នូវ​ចក្ខុវិស័យ​កម្ពុជា​ឆ្នាំ​២០៥០។

ក្នុងសន្ទរកថា​ទៅ​កាន់សមាជិកគណៈរដ្ឋមន្រ្តី ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត លើកឡើងថា សម្រាប់រយៈពេល២៥ឆ្នាំបន្ទាប់ ដែលជា​វដ្តថ្មី កម្ពុជា​មានមហិច្ឆតាចង់លើក​ស្ទួយមោទនភាពជាតិ ឱ្យ​ឈាន​កាន់តែខ្ពស់​ឡើង ដូចសម័យអង្គរ តាមរយៈការ​កសាងជាតិមួយ​ឱ្យ​រឹងមាំ, រស់រវើក, រុងរឿង និង​មានវិបុលភាព ក្លាយ​ជា​ប្រទេស​មានចំណូលខ្ពស់​នៅត្រឹម​ឆ្នាំ​២០៥០។ ឯកឧត្តមកិត្តិទេសាភិបាលបណ្ឌិតបន្តថា សម្រាប់រយៈពេល​ ៥ឆ្នាំដំបូង ក្នុងនីតិកាលទី៧ នៃរដ្ឋសភានេះ រាជរដ្ឋាភិបាលសម្រេចដាក់ចេញនូវ​យុទ្ធសាស្រ្តបញ្ចកោណ-ដំណាក់កាលទី១ ដោយ​កំណត់យកអាទិភាពគន្លឹះចំនួន ៥ គឺ មនុស្ស, ផ្លូវ, ទឹក, ភ្លើង និងបច្ចេកវិទ្យា។

ដោយឡែកសម្រាប់បញ្ចកោណទី១ ដែលជាការ​អភិវឌ្ឍមូលធន​មនុស្ស ​ រាជរដ្ឋាភិបាលនឹងបន្តផ្តោត​លើ​កិច្ច​ការ​អាទិភាព​ចំនួន៥ គឺ ៖

(១). ការពង្រឹងគុណភាព វិស័យ​អប់រំ កីឡា វិទ្យាសាស្រ្ត និងបច្ចេកវិទ្យា ដែលមាន​គោលដៅ​យុទ្ធសាស្រ្ត​ផ្តោត​លើ​ការ​បង្កើត​បរិយាកាស​ល្អ សម្រាប់​ការ​អប់រំ និង​ការ​បណ្តុះបណ្តាល​ប្រកបដោយ​គុណភាព និង​ជំនាញ​ខ្ពស់ តាមរយៈ​ការ​ពង្រឹងអភិបាល​កិច្ច នៃ​ការ​គ្រប់គ្រង​នៅ​តាម​គ្រឹះស្ថាន​សិក្សា, ការ​ពង្រឹងគុណភាព នៃការ​បណ្តុះបណ្តាល​គ្រប់កម្រិត, ការ​បង្កើន​គុណភាព និង​ការ​ចូលរៀន​មុខ​វិជ្ជា វិទ្យាសាស្រ្ត បច្ចេកវិទ្យា វិស្វកម្ម សិល្បៈ និង​គណិតវិទ្យា (STEAM) និង ការ​បង្រឹងការអប់រំកាយ និង​កីឡា;

(២). ការ​បណ្តុះបណ្តាលជំនាញបច្ចេកទេស ដែលមាន​គោលដៅ​យុទ្ធសាស្រ្តផ្តោត​លើ​ការ​ធ្វើបរិវត្តកម្ម​ការ​បណ្តុះបណ្តាលជំនាញ​បច្ចេកទេស និងវិជ្ជាជីវៈ, ការ​បង្កើន​ការ​ចុះឈ្មោះចូលរៀន, ការរៀបចំ​ជំនាញឡើងវិញ និង​ការ​បង្កើន​ជំនាញ (Reskilling and Upskilling), ការពង្រឹងប្រព័ន្ធអេកូឡូស៊ីអភិវឌ្ឍជំនាញ, ការ​ដោះស្រាយ​បញ្ហា​នៃភាពមិនស៊ីសង្វាក់​គ្នា​រវាងការបណ្តុះបណ្តាល និង​តម្រូវការ, ទាំងប្រភេទ និងគុណភាពជំនាញ, និង​ការ​ពង្រឹងការតាមដាន, ការ​ត្រួតពិនិត្យ និងការវាយតម្លៃ លើ​ការ​អនុវត្ត​គោលនយោបាយ និង​យុទ្ធសាស្រ្តដែលត្រូវបានដាក់ចេញ;

(៣). ការលើក​កម្ពស់សុខភាព និង​សុខុមាលភាពប្រជាជន ដែលមាន​គោលដៅ​យុទ្ធសាស្រ្ត​ផ្តោត​លើ​ការ​បន្ត​កាត់បន្ថយ​អត្រាឈឺ និង​ស្លាប់ បណ្តាលពីជំងឺមិន​ឆ្លង​ចម្បងៗ, ការ​បន្ត​លើក​កម្ពស់​សុខភាពបន្ត​ពូជ សុខភាពទារក កុមារ និង​មាតា, ការ​ពង្រឹង​សមត្ថភាព​ស្ថាប័ន ក្នុង​ការ​ដឹកនាំ​បរិវត្ត​កម្ម និង​អភិបាលកិច្ច ក្នុងវិស័យ​សុខាភិបាល, ការ​បន្ត​បង្កើន​គុណភាព និង​សមត្ថភាពរោគវិនិច្ឆ័យ ក្នុងការព្យាបាល និង​ការថែទាំ, ការ​បន្ត​ពង្រឹងគុណភាព នៃការ​បណ្តុះបណ្តាល​វិជ្ជាជីវៈសុខាភិបាល, ការ​លើក​កម្ពស់​សមត្ថភាពជំនាញ, ការ​លើក​កម្ពស់​កិច្ចសហការរវាងក្រសួង-ស្ថាប័នពាក់ព័ន្ធ និង​ការ​ចូលរួម​របស់ប្រជាជន​តាម​សហគមន៍;

(៤). ការពង្រឹងប្រព័ន្ធគាំពារសង្គម និង​ប្រព័ន្ធស្បៀង ដែលមាន​គោលដៅយុទ្ធសាស្រ្តផ្តោត​លើ ការកសាង និង​ការ​អភិវឌ្ឍប្រព័ន្ធគាំពារសង្គម ឱ្យ​មានលក្ខណៈប្រមូលផ្តុំ និង​សង្គតិភាព, ទាំង​ក្នុងប្រព័ន្ធជំនួយសង្គម និង​ប្រព័ន្ធសន្តិសុខសង្គម, និង​ការពង្រឹងប្រព័ន្ធស្បៀង ដែលផ្តល់សន្តិសុខស្បៀង និង​អាហាររូបត្ថម្ភ សម្រាប់ប្រជាជន​គ្រប់រូប ដោយឈរលើស្មារតី “មិន​បោះបង់ពលរដ្ឋខ្មែរណាម្នាក់” និង ដោយគោរពតាមអភិក្រមចំនួន ៤ គឺ ទី១ ចីរភាពនៃកម្មវិធី, ទី២ លទ្ធភាពអាចទ្រទ្រង់បាននៃថវិកាជាតិ, ទី៣ ការ​ធានា​បរិយាប័ន្ន និង​សមធម៌សង្គម ដោយផ្តោត​លើ​កិច្ច​អន្តរាគមន៍របស់រដ្ឋ លើ​គ្រួសារក្រីក្រ គ្រួសារងាយរងគ្រោះ និង​គ្រួសារងាយរងហានិភ័យ និង ទី៤ ភាព​ពង្រីកវិសាលភាព នៃប្រព័ន្ធ​គាំពារសង្គម តាមរយៈការ​អភិវឌ្ឍប្រព័ន្ធ; និង

(៥). ការពង្រឹងភាពជាពលរដ្ឋ​ក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាប័ន្ន ដែលមានគោលដៅ​យុទ្ធសាស្រ្តផ្តោតលើ ការធ្វើពលភាវូបនីយកម្មពលរដ្ឋ (People Revitalization) ឱ្យ​មានសមត្ថភាព ផលិតភាព សីលធម៌ គុណធម៌ ចរិយាធម៌ ភាពអំណត់ សុចរិតភាព វិន័យ និង​ការ​ទទួល​ខុសត្រូវ​ខ្ពស់ និងការ​លើក​កម្ពស់​ស្មារតី និងមនសិការស្នេហាជាតិ ការពារជាតិ ឯកភាពជាតិ ការចេះយកអាសារគ្នា ការចែករំលែក ការ​ចូលរួម គុណតម្លៃសង្គម និង​ស្មារតីគោរពច្បាប់ ស្រឡាញ់សន្តិភាព ក៏​ដូចជាស្រឡាញ់វប្បធម៌ ប្រពៃណីទំនៀមទម្លាប់ អំពើល្អ និង យុត្តិធម៌ សំដៅធានា​បាន​នូវ​សិនិទ្ធភាព​សង្គម (Social Cohesion) និងសុខដុមរមនាសង្គម៕