ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីប្រគល់សញ្ញាបត្រជូននិស្សិតជ័យលាភីនៃសាខាសាកលវិទ្យាល័យគ្រប់គ្រង និងសេដ្ឋកិច្ច (UME) ខេត្តកំពង់ចាម កាលពីថ្ងៃព្រហស្បត្តិ៍ (២៥ កញ្ញា) ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងថា មានតែចំណេះវិជ្ជាទេ ដែលអាចជួយបណ្ដុះនូវផ្នត់គំនិតឱ្យរីកចម្រើនជឿនលឿន ហើយអាចជួយលើកស្ទួយប្រទេសជាតិឱ្យកាន់តែរីកចម្រើនថែមទៀត។
ឯកឧត្តមបណ្ឌិតសភាចារ្យ ក៏បានបង្ហាញសេចក្តីសង្ឃឹមចំពោះនិស្សិតជ័យលាភីទាំងអស់ថា នឹងយកចំណេះដឹងដែលទទួលបានពីសាលារៀនទៅអនុវត្តការងារជាក់ស្តែងក្នុងវិស័យនីមួយៗ និងត្រូវប្រែក្លាយសញ្ញាបត្រទៅជាសញ្ញាឃើញនៅគ្រប់អង្គភាពដែលក្មួយៗបម្រើការងារ។ ទន្ទឹមគ្នានេះ ក៏ត្រូវខិតខំពុះពារ ជម្នះរាល់ឧបសគ្គក្នុងការបំពេញកិច្ចការ ដើម្បីកសាងខ្លួនឱ្យស័ក្ដិសមជាពលរដ្ឋល្អ មន្ត្រីរាជការល្អ បុគ្គលិកល្អ ដោយប្រើនូវជំនាញ ចំណេះដឹង ចំណេះធ្វើ ប្រកបដោយមនសិការវិជ្ជាជីវៈ ការទទួលខុសត្រូវក្នុងការងារ សីលធម៌ល្អ។
តាងនាមរាជរដ្ឋាភិបាលកម្ពុជា ក៏ដូចជាក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានអបអរសាទរនិស្សិតជ័យលាភីទាំងអស់ ដែលបានយកអស់កម្លាំងកាយចិត្តខិតខំប្រឹងប្រែងសិក្សារហូតទទួលបានជោគជ័យ។ ជាមួយគ្នាឯកឧត្តមក៏កោតសរសើរដល់ក្រុមប្រឹក្សាភិបាល គណៈនាយក បុគ្គលិក សាស្ត្រាចារ្យ ដៃគូសហប្រតិបត្តិទាំងអស់ ចំពោះការរួមចំណែកបណ្តុះបណ្តាលធនធានមនុស្សប្រកបដោយគុណភាព សមត្ថភាព មានចំណេះដឹង ចំណេះធ្វើ មានសីលធម៌ល្អ មនសិការវិជ្ជាជីវៈ សេចក្ដីថ្លៃថ្នូរ កិត្តិយស និងចេះរួមរស់ជាមួយគ្នាប្រកបដោយភាពសុខដុមរមនា ដែលជាមូលដ្ឋានគ្រឹះ នៃការអភិវឌ្ឍប្រទេសជាតិលើគ្រប់វិស័យ។
បើតាមរបាយការណ៍របស់ ឯកឧត្តម មួន វាសនា សាកលវិទ្យាធិការរង នៃសាខាសាកលវិទ្យាល័យគ្រប់គ្រង និងសេដ្ឋកិច្ច (UME) ខេត្តកំពង់ចាម និស្សិតជ័យលាភីត្រូវទទួលសញ្ញាបត្រ មានចំនួន ២,២២៣ នាក់ ( នារី ១,០៩៨ នាក់) ក្នុងនោះ និស្សិតកម្រិតបរិញ្ញាបត្ររងមានចំនួន ៣៧៦នាក់ (នារី ១៨៤ នាក់) និស្សិតកម្រិតបរិញ្ញាបត្រ ១,៥៥៧នាក់ (នារី ៨១៨នាក់) និងនិស្សិតកម្រិតបរិញ្ញាបត្រជាន់ខ្ពស់មាន ២៩០នាក់ (នារី៩៦នាក់)។
ឯកឧត្តម មួន វាសនា បញ្ជាក់ថា សមិទ្ធផលជាទីមោទនៈនេះ ឆ្លុះបញ្ជាំងពីការអភិវឌ្ឍខ្លួនជាបន្តបន្ទាប់របស់សាកលវិទ្យាល័យ ឆ្លើយតបទៅនឹងគោលនយោបាយរបស់រាជរដ្ឋាភិបាល ក្នុងការបន្តពង្រឹង និងពង្រីកមូលដ្ឋានគ្រឹះនៅក្នុងវិស័យឧស្សាហកម្ម ពាណិជ្ជកម្ម សេវាកម្ម សំដៅធានាបាននូវកំណើនសេដ្ឋកិច្ចប្រកបដោយចីរភាព ស្របតាមចក្ខុវិស័យអភិវឌ្ឍជាតិ គឺប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍនៅឆ្នាំ២០៥០ ព្រមទាំងឆ្លើយតបទៅនឹងការប្រកួតប្រជែងផ្នែកវិទ្យាសាស្ត្រ និងបច្ចេកវិទ្យា នៅក្នុងតំបន់សហគមន៍អាស៊ាន និងសាកលភាវូបនីយកម្ម៕
