ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈកម្ពុជាកំពុងតែមានវិបត្តិសង្រ្គាមនៅព្រំដែនជាមួយប្រទេសថៃ, ក្នុងកាលៈទេសៈដ៏លំបាកនេះ ក្រសួងអប់រំ យុវជន និងកីឡា ប្តេជ្ញាចិត្តធានាបន្តផ្តល់នូវការអប់រំប្រកបដោយគុណភាព តាមរយៈការធ្វើកំណែទម្រង់វិស័យអប់រំឱ្យកាន់តែរឹងមាំ បន្តកំណែទម្រង់សាលារៀន និងបន្តយកចិត្តទុកដាក់សម្របខ្លួនទៅនឹងកាលៈទេសៈថ្មីនេះ។ នេះជាប្រសាសន៍លើកឡើងរបស់ ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្នុងឱកាសផ្តល់សម្ភារៈប្រើប្រាស់ សម្ភារៈសិក្សា គ្រឿងឧបភោគបរិភោគ ដល់មន្ទីរអប់រំ យុវជន និងកីឡាខេត្តចំនួន៦ ដែលរងការប៉ះពាល់ដោយសង្គ្រាមព្រំដែនជាមួយប្រទេសថៃ កាលពីពេលថ្មីៗនេះ។
ក្នុងឱកាសនោះ ឯកឧត្តមរដ្ឋមន្រ្តីបានបង្ហាញការយកចិត្តទុកដាក់យ៉ាងកក់ក្តៅចំពោះសុខទុក្ខរបស់បងប្អូនភៀសសឹក ព្រមទាំងបានលើកទឹកចិត្តឱ្យបន្តរក្សាស្មារតីសាមគ្គីគ្នាឱ្យរឹងមាំ អង់អាចក្លាហាន ដោយលើកឡើងថា រាជរដ្ឋាភិបាលមិនទុកប្រជាពលរដ្ឋម្នាក់ណាចោលឡើយ ហើយនឹងនៅតែប្រឹងប្រែងអស់ពីសមត្ថភាពក្នុងការសម្រេចឱ្យបាននូវសុខសន្តិភាពបរិបូរណ៌ជូនកម្ពុជា។
យោងតាមរបាយការណ៍ចុងក្រោយរបស់ក្រសួងមហាផ្ទៃកម្ពុជា គិតត្រឹមល្ងាចថ្ងៃទី២៤ ខែធ្នូ ឆ្នាំ២០២៥ អំពើឈ្លានពានរបស់រដ្ឋាភិបាល និងយោធាថៃ ជាពិសេសការផ្លោង និងទម្លាក់គ្រាប់គ្រប់ប្រភេទ គ្រប់ទម្រង់ ចូលតំបន់ស៊ីវិល បានបណ្តាលឱ្យមានជនភៀសសឹកសរុបចំនួន ៦៣៦ ៥៣៦នាក់ ក្នុងនោះស្រ្តី ៣៣១ ៧០៧នាក់ និងកុមារ ២០២ ៤៥៥នាក់។
ឯកឧត្តម ហង់ជួន ណារ៉ុន មានប្រសាសន៍ថា សង្គ្រាមពិតជាធ្វើឱ្យប៉ះពាល់ដល់ការអប់រំ តែបើយើងមិនគិតគូរដល់ការអប់រំទេនោះ សង្គ្រាមនេះនឹងបន្តប៉ះពាល់ដល់អនាគតរបស់ប្រទេសជាតិយើងថែមទៀត ព្រោះធនធានមនុស្ស គឺជាមូលដ្ឋានគ្រឹះនៃការអភិវឌ្ឍជាតិ។
យ៉ាងណាក៏ដោយ ជាការឆ្លើយតបទៅនឹងស្ថានភាពបច្ចុប្បន្ន ឯកឧត្តមរដ្ឋមន្រ្តី បានណែនាំដល់សិស្សភៀសសឹកដែលកំពុងស្នាក់នៅក្នុងខេត្តសៀមរាប ត្រូវបានរៀបចំឱ្យចូលរៀនវេនថ្ងៃ, ដោយឡែកសម្រាប់សិស្សដែលនៅតាមជំរំភៀសសឹកផ្សេងទៀត ត្រូវបានរៀបចំឱ្យចូលរៀននៅតង់ថ្នាក់រៀនបណ្ដោះអាសន្ន, រៀបចំការរៀននិងបង្រៀននៅតាមបណ្ដុំតូចៗ ដូចជា នៅតាមផ្ទះឬ ទីតាំងសុវត្ថិភាព និង ធ្វើស្វ័យសិក្សា ដោយក្រសួងបាននិងកំពុងបន្តផ្តល់ជូននូវសៀវភៅគោល និងសៀវភៅជំនួយការសិក្សានានា ដល់សិស្សភៀសសឹក និងលោកគ្រូអ្នកគ្រូនៅតាមជំរំភៀសសឹក៕
