ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈគម្រោងកែលម្អការអប់រំទូទៅ (GEIP) និងគម្រោងកែលម្អឧត្តមសិក្សាចំនួនពីរ (HEIP1&2) ក្រោមការគាំទ្រពីធនាគារពិភពលោក បាននិងកំពុងធ្វើឱ្យកម្មវិធីអប់រំរបស់កម្ពុជា ធ្វើការតភ្ជាប់ការរៀនរបស់សិស្ស ទៅនឹងឱកាសការងារជាក់ស្តែង។
តាមរយៈសេចក្តីប្រកាសដែលចេញផ្សាយកាលពីថ្ងៃទី១៤ ខែមករា ឆ្នាំ២០២៦ ធនាគារពិភពលោកបានឱ្យដឹងថា ជាលទ្ធផលក្រោយការអនុវត្តគម្រោងខាងលើ ពេលនេះ សិស្សជាង៦សែននាក់ ទទួលបានអត្ថប្រយោជន៍ពីការកែលម្អគុណភាពសាលារៀន ហើយនិស្សិតបញ្ចប់ការសិក្សានៅសាកលវិទ្យាល័យចំនួន ៦៨០៩នាក់ មានអត្រាទទួលបានការងារជាង ៩៣ភាគរយ ខ្ពស់ជាងសាកលវិទ្យាល័យដែលមិនចូលរួមក្នុងកម្មវិធីនេះ។ នៅឆ្នាំ២០៣១ គេរំពឹងថានឹងមាននិស្សិតចំនួន ១៧៤ ០០០នាក់ (ស្រី ៤៧ភាគរយ) ទទួលបានជំនាញសម្រាប់ភ្ជាប់ពួកគេផ្ទាល់ទៅនឹងទីផ្សារការងារតែម្តង។
សេចក្តីប្រកាសដដែលលើកឡើងថា មុននឹងដាក់ឱ្យអនុវត្តគម្រោងកែលម្អការអប់រំ និងគម្រោងកែលម្អឧត្តមសិក្សា ធនាគារពិភពលោកបានរកឃើញថា មានសិស្សថ្នាក់ទី៥ តែ ១១% ប៉ុណ្ណោះដែលអាចអានអត្ថបទបានត្រឹមត្រូវ ក្នុងនោះកុមារមកពីគ្រួសារក្រីក្រនៅជនបទជួបការលំបាកខ្លាំងជាងគេ។ រីឯនៅកម្រិតឧត្តមសិក្សា ការចុះឈ្មោះចូលរៀនមុខវិជ្ជាស្ទែម (STEM) នៅមានកម្រិតទាប (ប្រមាណ ២០% នៃនិស្សិតសរុប) និងកង្វះកិច្ចសហការរវាងគ្រឹះស្ថានសិក្សា និងវិស័យឧស្សាហកម្ម បានធ្វើឱ្យនិស្សិតបញ្ចប់ការសិក្សាមិនទាន់អាចត្រៀមខ្លួនបានពេញលេញសម្រាប់តម្រូវការទីផ្សារការងារ។
ឆ្លើយតបទៅនឹងបញ្ហាប្រឈមទាំងនេះ ធនាគារពិភពលោកបានដាក់ចេញនូវកិច្ចអន្តរាគមន៍ផ្អែកលើភស្តុតាងរួមបញ្ចូលគ្នា ដែលភ្ជាប់ការរៀនសូត្រកម្រិតមូលដ្ឋានទៅនឹងលទ្ធផលការងារ។ ក្នុងនោះ នៅកម្រិតបឋមសិក្សា និងមធ្យមសិក្សា គណៈកម្មាធិការគ្រប់គ្រងសាលាបានពង្រឹងវត្តមានរបស់គ្រូ និងគុណភាពនៃការបង្រៀន រីឯឧបករណ៍វាយតម្លៃឌីជីថលបានជួយបង្កលក្ខណៈងាយស្រួលសម្រាប់ការកែសម្រួលតម្រូវការរៀនសូត្រតាមពេលវេលាជាក់ស្តែង។ ការគាំទ្រចំគោលដៅ រួមមានការកំណត់អត្តសញ្ញាណពិការភាព ការផ្តល់ឧបករណ៍ជំនួយ និងការផ្សព្វផ្សាយក្នុងសហគមន៍ បាននាំកុមារដែលត្រូវបានមើលរំលងឱ្យត្រឡប់មកសាលា និងបន្តការសិក្សាឡើងវិញ។
នៅកម្រិតឧត្តមសិក្សា ភាពជាដៃគូជាមួយវិស័យឧស្សាហកម្មបានជំរុញឱ្យមានការកែទម្រង់កម្មវិធីសិក្សាឱ្យស្របតាមតម្រូវការទីផ្សារ ខណៈកម្មវិធីអភិវឌ្ឍន៍មហាវិទ្យាល័យបានពង្រឹងគុណភាពបង្រៀន និងសមត្ថភាពស្រាវជ្រាវ។ កម្មវិធី STEM ត្រូវបានធ្វើទំនើបកម្មជាមួយហេដ្ឋារចនាសម្ព័ន្ធដែលធន់នឹងអាកាសធាតុ ព្រមទាំងពង្រីកលទ្ធភាពទទួលបានការអប់រំសម្រាប់សិស្សក្រុមភាគតិច តាមរយៈកម្មវិធីអាហារូបករណ៍ចំគោលដៅ និងការគិតគូរពីយេនឌ័រ។
តាមរយៈការធ្វើទំនើបកម្មកម្មវិធីសិក្សា, ការបង្កើតភាពជាដៃគូជាមួយឧស្សាហកម្មក្នុងសេដ្ឋកិច្ច, និងការពង្រីកលទ្ធភាពទទួលបានការអប់រំសម្រាប់ក្រុមដែលមានតំណាងភាគតិច កម្មវិធីនេះកំពុងជំរុញឱ្យមានកំណើនប្រកបដោយបរិយាបន្ន និងធ្វើឱ្យកម្ពុជាត្រៀមលក្ខណៈបានកាន់តែប្រសើរ សម្រាប់ការប្រកួតប្រជែងរយៈពេលវែងនៅក្នុងសេដ្ឋកិច្ចពិភពលោក។
យ៉ាងណាផ្អែកលើលទ្ធផលដែលទទួលបាន ធនាគារពិភពលោកមានគម្រោងនឹងពង្រីកវិសាលភាពកិច្ចអន្តរាគមន៍ប្រកបដោយជោគជ័យនេះ នៅទូទាំងប្រទេស ដោយគ្រោងពង្រីកគម្រោង GEIP ទៅដល់សាលាបឋមសិក្សាចំនួនជាង ៦ ០០០ នៅឆ្នាំ២០២៨។ ដោយឡែកគម្រោង HEIP 2 នឹងពង្រីកគំរូផ្តោតលើការងារដល់សាកលវិទ្យាល័យចំនួនប្រាំបន្ថែមទៀត ដោយតម្រង់គោលដៅលើនិស្សិតបញ្ចប់ការសិក្សាចំនួន ១៧៤ ០០០ នាក់ នៅឆ្នាំ២០៣១៕
