ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មនុស្សភាគច្រើនសម្រេចចិត្តធ្វើការវិនិយោគ ព្រោះចង់ទទួលបានផងចំណេញ។ ទន្ទឹមគ្នានេះ ការវិនិយោគលើការអានសៀវភៅ ជាការវិនិយោគដ៏មានប្រសិទ្ធភាពមួយក្នុងចំណោមការវិនិយោគជាច្រើនទៀត។ តើហេតុអ្វីទើបយុវជនគួរងាកមកវិនិយោគលើការអានសៀវភៅ?
លោក ជា តុងហ៊ួរ សហគ្រិនវ័យក្មេង និងជាអ្នកនិព្ធនសៀវភៅ លើកឡើងថា ប្រទេសជាតិមួយដែលមានភាពរីកចម្រើន គឺត្រូវការធនធានមនុស្សដែលមានចំណេះដឹងទាក់ទងនឹងការអាន និងចំណេះដឹងជាច្រើនទៀត។ នៅពេលប្រជាជនខ្មែរទាំងអស់ចាប់ផ្ដើមស្រឡាញ់ការអាន និងចូលរួមលើកកម្ពស់ការអានបានច្រើន នោះពលរដ្ឋខ្មែរមានទាំងផ្នែកចំណេះដឹង វប្បធម៌ អរិយធម៌ និងផ្សព្វផ្សាយទៅដល់បណ្ដាប្រទេសជាច្រើនទៀត។
បើតាមលោក ជា តុងហ៊ួរ ដើម្បីជួយឱ្យយុវជនងាកមកវិនិយោគលើការអានសៀវភៅវិញ គឺត្រូវផ្ដោតលើហេតុផលសំខាន់៣ រួមមាន៖
ទី១. ការអភិវឌ្ឍសមត្ថភាពខ្លួនឯង ៖ នៅសាលារៀនយុវជនទទួលបានចំណេះដឹងតាមរយៈការអានសៀវភៅស្របតាមកម្មវិធីសិក្សារបស់សាលា, ទន្ទឹមគ្នានេះ មានសៀវភៅជាច្រើនទៀតដែលអ្នកនិពន្ធបានចំណាយពេលស្ទើរពេញមួយជិវីតទើបនិពន្ធសៀវភៅបានមួយក្បាលដោយផ្ដល់ទាំងចំណេះដឹង ផ្នត់គំនិត និងវិជ្ជាជីវៈរបស់ខ្លួន។ ដូច្នេះ យុវជនត្រូវតែចំណាយពេលអានសៀវភៅ ដើម្បីយកចំណេះដឹងដែលបានមកពីការអានសៀវភៅនោះមកអភិវឌ្ឍខ្លួនឯង។
ទី២. អាចចិញ្ចឹមខ្លួនឯងរស់ ៖ ការវិនិយោគទៅលើការអានសៀវភៅ ក៏រួមចំណែកជួយឱ្យយុវជនរស់នៅក្នុងសង្គមដែលអាចចិញ្ចឹមខ្លួនឯងរស់ មានន័យថា មានសមត្ថភាពក្នុងការធ្វើអ្វីគ្រប់បែបយ៉ាងដោយខ្លួនឯង ។ នៅពេលយុវជនទទួលបានចំណេះដឹងច្រើន និងមានបទពិសោធន៍ជីវិតបន្ថែមទៀត នោះយុវជនអាចមានការងារសម្រាប់ចិញ្ចឹមជីវិត និងអាចធ្វើកិច្ចការងារបានដោយខ្លួនឯង មានភាពឯករាជ្យ ដោយមិនបាច់មានការជួយជ្រោមជ្រែងពីក្រុមគ្រួសារទៀតនោះទេ។
ទី៣. មានក្រមសីលធម៌ និងវិជ្ជាជីវៈល្អ ៖ នៅពេលយុវជនអានសៀវភៅបានច្រើន នាំឱ្យការនិយាយស្ដី សីលធម៌នៃការរស់នៅ មានភាពល្អប្រសើរ និងយល់ដឹងអំពីសង្គមបានច្រើន។
សហគ្រិនវ័យក្មេង និងជាអ្នកនិពន្ធ រូបនេះ ក៏បានលើកទឹកចិត្តដល់អ្នកនិពន្ធទាំងអស់ចូលរួមសម្រិតសម្រាំងស្នាដៃរបស់ខ្លួនឱ្យមានគុណភាពដើម្បីរួមចំណែកផ្ដល់ចំណេះដឹងល្អដល់យុវជនជំនាន់ក្រោយ។ លោកថា លោកពិតជាចង់ឃើញយុវជនក៏ដូចជាប្រជាពលរដ្ឋខ្មែរស្រឡាញ់ការអានសៀវភៅ និងត្រឡប់មកអានសៀវភៅឡើងវិញ ជៀសវាងចំណាយពេលលើអេក្រង់ទូរស័ព្ទច្រើន ដើម្បីអាចជួយខ្លួនឯងផង ជួយក្រុមគ្រួសារផង និងជួយប្រទេសជាតិផង៕
