ឥណ្ឌា – ពិភពលោកបានភ្ញាក់ផ្អើលនៅពេលដឹងថា ក្មេងប្រុសជនជាតិឥណ្ឌា Rishi Shiv Prasanna អាយុប្រាំបីឆ្នាំ មានភាពឆ្លាតវៃ IQ (intelligence quotient) ក្នុងចំណាត់ថ្នាក់ ១៨០ពិន្ទុ ខ្ពស់ជាងពិន្ទុ IQ របស់អ្នកប្រាជ្ញរូបវិទ្យា Albert Einstein ។ កុមារ Rishi ក្លាយជាបុគ្គលវ័យក្មេងស្ទាត់ជំនាញខាងសរសេរកូដកម្មវិធីទូរស័ព្ទ សម្រាប់ប្រព័ន្ធប្រតិបត្តិការ Android ដែលទទួលស្គាល់ដោយក្រុមហ៊ុន Google ។

កុមារ Rishi មិនត្រឹមតែជាអ្នកអភិវឌ្ឍន៍កម្មវិធីបច្ចេកវិទ្យាឆ្នើមប៉ុណ្ណោះទេ រូបគេជាអ្នកនិពន្ធសៀវភៅ និងជាយូធូបប័រ (Youtuber) ដ៏ល្បីល្បាញផងដែរ ។ នៅឆ្នាំ២០២៣ Rishi បានទទួលពានរង្វាន់បច្ចេកវិទ្យា Pradhan Mantri Rashtriya Bal Puraskar Award ក្នុងនាមជាអ្នកអភិវឌ្ឍន៍កម្មវិធីបច្ចេកវិទ្យាឆ្នើមពីនាយករដ្ឋមន្ត្រីឥណ្ឌា Narendra Modi ។ លើសពីនេះ Rishi ក៏បានជាសមាជិកក្លឹបអ្នកមានភាពឆ្លាតវៃខ្ពស់បំផុត (High IQ Society) របស់ Mensa International Club ឬអាចហៅថា Member of the Mensa Society ។

នៅក្នុងកិច្ចសម្ភាសន៍ជាមួយទូរទស្សន៍ India TV នាថ្ងៃទទួលពានរង្វាន់អ្នកអភិវឌ្ឍន៍បច្ចេកវិទ្យា Rishi បាននិយាយថា

“ពានរង្វានដែលខ្ញុំទទួលបាននៅថ្ងៃនេះជាជោគជ័យដ៏អស្ចារ្យ ! វាពិតជាពិសេសណាស់សម្រាប់រូបខ្ញុំ ដោយសារខ្ញុំទទួលបានការអប់រំគ្រប់យ៉ាងពីម្តាយឪពុករបស់ខ្ញុំរហូតមកដល់ពេលនេះ”។ 

ងាកមកនិយាយពីការអប់រំវិញ Rishi បានចូលរៀនដំបូងនៅថ្នាក់មត្តេយ្យសិក្សា ហើយគ្រូបង្រៀនរបស់គេទទួលស្គាល់ថា Rishi ជាក្មេងមានភាពវ័យឆ្លាតបំផុត និងមានទេពកោសល្យផ្នែកវិទ្យាសាស្ត្រ ។ អាយុ ៣ឆ្នាំកុមាររូបនេះ អាចពិព័ណ៌នាយ៉ាងក្បោះក្បាយពីលក្ខណៈពិសេសរបស់ភពនីមួយៗ ប្រព័ន្ធព្រះអាទិត្យ និងចំណេះដឹងនានាស្តីពីចក្រវាឡ ។ អាយុ ៥ឆ្នាំបានចូលសិក្សាកម្មវិធីសរសេរកូដលើកដំបូង ។ 

កុមារ Rishi មានទីកន្លែងកំណើតនៅរដ្ឋ Bengaluru ប្រទេសឥណ្ឌា ហើយគេបានអភិវឌ្ឍន៍កម្មវិធីទូរស័ព្ទចំនួន៣ រួមមាន IQ Test App សម្រាប់កុមារ,  កម្មវិធីចំណេះដឹងពីប្រទេសនានាក្នុងពិភពលោក Countries of the World App, និងកម្មវិធី Covid Helpline Bangalore App ព្រមទាំងបាននិពន្ធសៀវភៅចំនួនពីរចំណងជើងជាស៊េរីដែលនិយាយពីចំណេះដឹងវិទ្យាសាស្ត្រ ។ ទន្ទឹមគ្នានេះ រដ្ឋមន្ត្រីក្រសួងអភិវឌ្ឍន៍កិច្ចការនារី និងកុមារ លោកជំទាវ Smriti Irani បានដាក់រហ័សនាមឱ្យ Rishi ថា “Pastaman” ។

គួររំលឹកដែរថា លោក Albert Einstein បានក្លាយជាអ្នកប្រាជ្ញរូបវិទ្យាដ៏មានកេរ្តិ៍ឈ្មោះល្បាញល្បីនៅក្នុងពិភពលោក ហើយក្នុងចំណោមអ្នកសិក្សារូបវិទ្យាតែងយកទ្រឹស្តីរបស់គាត់ទៅសិក្សាលើបាតុភូតផ្សេងៗ ។ លោក Einstein មិនដែលធ្វើតេស្តពិន្ទុ IQ ទេ ប៉ុន្តែផ្អែកលើកំណត់ត្រាប្រវត្តិសាស្ត្ររបស់គាត់ អ្នកសិក្សាបានប៉ាន់ប្រមាណថា លោកមានពិន្ទុ IQ ប្រហែល ១៦០ពិន្ទុ ៕