ក្នុង​វ័យ​ជាសិស្សនិស្សិត តែងជួបការលំបាកក្នុងការតាំងវិន័យខ្លួនឯង ជាពិសេសនៅពេលមានកិច្ចការសាលាច្រើន ឬជិតដល់ថ្ងៃប្រឡងជាដើម។ មនុស្សជាច្រើនជ្រើសរើសអត់គេង ឬគេងតិចដើម្បីរៀនឱ្យ​បានច្រើន ប៉ុន្តែតើវាពិតជាមានប្រសិទ្ធិភាពទេ?

តាមការសិក្សារបស់អ្នក​វិទ្យាសាស្ត្រ ការមិនគេងអាចធ្វើឱ្យ​ជួបផលវិបាកអាក្រក់ជាងអ្វីដែលអ្នកបានគិត។

១. តើសិស្សនិស្សិតត្រូវការគេងប៉ុន្មានម៉ោងក្នុងមួយថ្ងៃ?

អង្គការសុខភាពពិភពលោក (WHO) បានណែនាំថា សិស្សវ័យជំទង់ដែលមាន​វ័យ​ចន្លោះ ១៣ ទៅ១៨ឆ្នាំ ត្រូវការគេង​យ៉ាងហោចណាស់ ៨ ទៅ១០ម៉ោងក្នុងមួយថ្ងៃ។ ដោយឡែកនិស្សិតពេញវ័យ (១៨ឆ្នាំឡើងទៅ) ត្រូវការគេង​ចន្លោះពី៧ ទៅ៩ម៉ោងក្នុងមួយថ្ងៃ។

ការគេងមិនគ្រប់គ្រាន់អាចបណ្តាលឱ្យ​ អស់កម្លាំង មានអារម្មណ៍ស្រពិចស្រពិល, ការចងចាំ និងសមត្ថភាពរៀនសូត្រថយចុះ, ប្រព័ន្ធភាពស៊ាំនឹងជំងឺចុះខ្សោយ។

២. អត្ថប្រយោជន៍ នៃការគេង

ក. បង្កើនសមត្ថភាពរៀនសូត្រ ៖ ក្នុងពេលគេង ខួរក្បាលរបស់អ្នកធ្វើការរៀបចំចងចាំអ្វីដែលអ្នកបានរៀនពីថ្ងៃ។ ដូច្នេះ​ការគេងគ្រប់គ្រាន់ជួយឱ្យ​អ្នកយល់លឿន ចងចាំបានយូរ និងដោះស្រាយបញ្ហាបានល្អប្រសើរ។

ខ. ថែរក្សាសុខភាពផ្លូវចិត្ត ៖ សិស្សដែលគេងមិនគ្រប់គ្រាន់មានហានិភ័យកើតអារម្មណ៍អវិជ្ជមាន ដូចជា រងសំពាធ, ភ័យខ្លាច ឬអារម្មណ៍ងាយឆេវឆាវ។ ដូច្នេះ​ការ​គេង​គ្រប់គ្រាន់ នឹង​ជួយពង្រឹងសុខភាពរាងកាយដូចជា​ជួយ​ដល់ប្រព័ន្ធឈាម, កាត់បន្ថយហានិភ័យនៃជំងឺបេះដូង ឬជំងឺទឹកនោមផ្អែម ព្រមទាំង​ជួយ​ដល់​ប្រព័ន្ធភាពស៊ាំក្នុងខ្លួន។

៣. មធ្យោបាយគេងឱ្យ​បានគ្រប់គ្រាន់ ទោះមានកិច្ចការច្រើន

កំណត់ពេលគេងជាទៀងទាត់ ៖ រៀបចំ​កាលវិភាគគេង និងភ្ញាក់ឱ្យ​បានត្រឹមត្រូវ។

កុំប្រើឧបករណ៍អេឡិចត្រូនិកមុនគេង ៖ ពន្លឺខៀវពីទូរស័ព្ទធ្វើឱ្យ​អ្នកពិបាកគេង។

ធ្វើចិត្តស្ងប់មុនគេង ៖ អានសៀវភៅ ស្តាប់តន្ត្រី ឬធ្វើយ៉ាហ្គា អាចជួយ​អ្នក​ឱ្យ​មានអារម្មណ៍​ស្ងប់ល្អមុនពេលចូលគេង។ ហើយ​ជាមួយគ្នា​នេះ ត្រូវ​ចៀសវាងការផឹកកាហ្វេ ឬភេសជ្ជៈមានជាតិស្ករខ្ពស់ ក្នុងរយៈពេល៦ម៉ោងមុនគេង។

៤. តើអាចធ្វើដូចម្តេចបើមានកិច្ចការច្រើនពេក?

ប្រសិន​បើ​អ្នក​មាន​កិច្ចការ​សាលា​ច្រើន​ត្រូវ​ធ្វើ ដូច្នេះ សូមសាកល្បងប្រើបច្ចេកទេសដូចជា Pomodoro (រៀន២៥នាទី សម្រាក៥នាទី)។ រៀនមុនពេលគេង ព្រោះ​ខួរក្បាលចងចាំល្អបំផុតនៅពេលអ្នកគេងភ្លាមបន្ទាប់ពីរៀន។ កុំពន្យាពេល ត្រូវធ្វើកិច្ចការភ្លាម ដើម្បីជៀសវាងការអត់គេង៕