ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ករណីនៃវិបត្តិជំងឺភ្លេចភ្លាំង (Dementia) ជាសាកលកំពុងឈានដល់អត្រាមួយដ៏ខ្ពស់ ដោយមានជិត ១០លានករណីថ្មីជារៀងរាល់ឆ្នាំ។ បើយោងតាមអង្គការសុខភាពពិភពលោក បានបង្ហាញថា ស្ថានភាពនៃជំងឺនេះ កើតឡើង បណ្ដាលមកពីជំងឺមួយចំនួន ដែលបំផ្លាញកោសិការប្រសាទបន្តិចម្ដងៗ និងធ្វើឱ្យខូចខួរក្បាល ដែលបណ្ដាលឱ្យចុះខ្សោយមុខងារដំណើរការគិត និងវែកញែកហេតុផល (cognitive function) របស់ខួរក្បាល។
ជាមួយនឹងភាពជឿនលឿនផ្នែក ឱសថ វិទ្យាសាស្ត្រ និងបច្ចេកវិទ្យា មនុស្សមានអត្រាសង្ឃឹមរស់បានយូរជាងមុន ហើយចំនួនប្រជាជនវ័យចំណាស់របស់ពិភពលោកកំពុងកើនឡើង ក្នុងអត្រាដែលមិនធ្លាប់មានពីមុនមក ដែលបង្កើនហានិភ័យនៃជំងឺភ្លេចភ្លាំងកាន់តែខ្ពស់។
យោងតាមរបាយការណ៍ថ្មី របស់ World Happiness Report បានឱ្យដឹងថា នៅពេលដែលចំនួនប្រជាជនវ័យចំណាស់របស់ពិភពលោកបន្តកើនឡើង ចំនួនអ្នកមានជំងឺភ្លេចភ្លាំងក៏ត្រូវបានគេរំពឹងថា កើនឡើងដូចគ្នាដែរ។ ដោយអត្រានេះអាចឈានដល់ប្រហែល ១៣៩លាននាក់ នៅត្រឹមឆ្នាំ២០៥០ ហើយបើគិតត្រឹមឆ្នាំ២០២៣ នេះ មានមនុស្សជាង ៥៥លាននាក់ ដែលកំពុងមានជំងឺភ្លេចភ្លាំងនៅទូទាំងពិភពលោក។
ហានិភ័យនៃជំងឺភ្លេចភ្លាំងច្រើន
យោងតាមអង្គការសុខភាពពិភពលោក បានឱ្យដឹងថា ជំងឺភ្លេចភ្លាំងច្រើន ជាមូលហេតុឈានមុខគេទី៧ នៃការស្លាប់ និងជាមូលហេតុចម្បង ដែលនាំឱ្យមនុស្សធ្លាក់ខ្លួនទៅក្នុងពិការភាព។
ទោះបីជាបច្ចុប្បន្នមិនមានការព្យាបាលសម្រាប់ស្ថានភាពជំងឺនេះក៏ដោយ នៅឆ្នាំ២០២៣ កន្លងទៅនេះ ក្រុមអ្នកចិត្តសាស្ត្រ និងអ្នកស្រាវជ្រាវ របស់អង្គការសុខភាពពិភពលោក កំពុងធ្វើការ ដើម្បីសិក្សាពីវិធីការពារខ្លួន ពីជំងឺនេះដែរ។ ជាលទ្ធផល គឺបានរកឃើញថា មានកត្តាហានិភ័យ ចំនួន ១២ ដែលនាំឱ្យមានការវិវត្តន៍នៃជំងឺភ្លេចភ្លាំងច្រើន ដោយកត្តាទាំងនោះមានដូចជា ការអប់រំបានតិចតួច, ជំងឺលើសឈាម, ការជក់បារី, ភាពធាត់, ជំងឺធា្លក់ទឹកចិត្ត, ភាពអសកម្មនៃរាងកាយ, ជំងឺទឹកនោមផ្អែម, ទំនាក់ទំនងសង្គមតិចតួច, ការប្រើប្រាស់គ្រឿងស្រវឹងច្រើនពេក, បញ្ហារបួសខួរក្បាល និងខ្យល់ពុល។
វិធីកាត់បន្ថយហានិភ័យនៃជំងឺភ្លេចភ្លាំងច្រើន
ការសិក្សាបានបង្ហាញថា មានកត្តាសំខាន់ៗចំនួន ៥ ដែលអ្នកអាចអនុវត្ត ដើម្បីការផ្ដើមការពារខ្លួនពីជំងឺភ្លេចភ្លាំងច្រើន ដែលកត្តាទាំងនោះមានដូចជា ១. មានសកម្មភាពរាងកាយទៀងទាត់, ២. ទទួលទានអាហារដែលនាំឱ្យមានសុខភាពល្អ, ៣. មានទំនាក់ទំនងល្អក្នុងសង្គម, ៤. មានអនាម័យក្នុងការគេងល្អ និង ទី៥. ស្វែងយល់ពីវិធីគ្រប់គ្រងអារម្មណ៍ និងភាពតានតឹង៕
