ការសិក្សា​នៅមហាវិទ្យាល័យ ឬសាកលវិទ្យាល័យ គឺខុសប្លែកពីការសិក្សានៅថ្នាក់វិទ្យាល័យ ។ នៅមហាវិទ្យាល័យ​និស្សិត​តម្រូវ​ឱ្យ​សិក្សា​តែមួយ​ពេលប៉ុណ្ណោះ​សម្រាប់​ជំនាញរបស់ខ្លួន។ ការសេសសល់ពេលវេលានេះ បានធ្វើ​ឱ្យ​សិស្ស​ទើបបញ្ចប់ថ្នាក់វិទ្យាល័យដែលពួកគេធ្លាប់តែរវល់រៀនពេញមួយថ្ងៃនោះ មួយចំនួនបានជ្រើសរើស​យក​ការរៀនពីរមហាវិទ្យាល័យ ព្រោះពួកគេយល់ថា ការមានជំនាញច្រើនជួយពួកគេងាយស្រួលទទួលបានការងារធ្វើជាដើម ។ តែយ៉ាងណាមានមតិខ្លះទៀតលើកឡើងដែរថា ការរៀនពីរមហាវិទ្យាល័យធ្វើ​ឱ្យនិស្សិតហត់នឿយ មិនអាចផ្តោតទៅលើជំនាញណាមួយ​ឱ្យ​ពិតប្រាកដជាដើម ដូច្នេះ តើការជ្រើសរើសរៀនពីរមហាវិទ្យាល័យក្នុងពេលតែមួយនេះ វាជាជម្រើសដ៏ល្អសម្រាប់សិស្ស និស្សិតដែរ ឬទេ?

លោកជំទាវ ថេ សុខា អគ្គលេខាធិការសភាមុខរបរ និង​មីក្រូសហគ្រាសកម្ពុជា (CPMEC) បានចែករំលែកពីបទពិសោធន៍ផ្ទាល់ខ្លួន ដោយថា ក្រោយ​ចប់វិទ្យាល័យ លោកជំទាវបានប្រឡងជាប់មហាវិទ្យាល័យ គ្រានោះលោកជំទាវរៀន២សាកលវិទ្យាល័យ​ក្នុងពេលដំណាលៗគ្នា ។ ការជ្រើសរើសរៀនច្រើនមហាវិទ្យាល័យក្នុងពេលដំណាលៗគ្នានេះ ព្រោះលោកជំទាវយល់ឃើញថា ក្នុងភាពជាយុវវ័យគួរតែប្រើប្រាស់​ឱ្យ​អស់លទ្ធភាព​នូវ​ពេលវេលាដែលមាន ដូច្នេះពេលនោះលោកជំទាវក៏រៀនពីរមហាវិទ្យាល័យ​ក្នុងពេលដំណាលគ្នា ហើយនៅពេលល្ងាចចប់ម៉ោងសិក្សា លោកជំទាវត្រូវទៅបង្រៀនភាសាអង់គ្លេសទៀតដើម្បីរកប្រាក់កម្រៃបន្ថែម។

បើតាមលោកជំទាវ ថេ សុខា យុវជនគួរបណ្តុះខ្លួនឯងដើម្បីមាន​ឱកាសដើម្បីទៅរៀនជំនាញបន្ថែម ព្រោះប្រសិនបើមិនបានអភិវឌ្ឍន៍ខ្លួនដោយ​រៀនយកជំនាញ​ណាបន្ថែមទៀតនោះទេ គឺហាក់បីដូចជាបាត់បង់​ឱកាសហើយ។

លោកឧកញ៉ា ប៉ិច បូឡែន អ្នកជំនាញផ្នែកអប់រំ និងជានាយកបណ្តាញសាលារៀនវ៉េស្ទឡាញ លើកឡើងថា ប្រសិនបើយុវសិស្សគ្រាន់តែចង់បានចំណេះ​ដឹងភាសាអង់គ្លេស ហើយសម្រេចចិត្តរៀនពីរមហាវិទ្យាល័យ គឺលោកមិនលើកទឹកចិត្តទេ ។ បើតាមលោកឧកញ៉ា ប៉ិច បូឡែន យុវសិស្សគួររៀនជំនាញមួយឱ្យច្បាស់ ហើយ​យកមួយពេលទៀតធ្វើការស្រាវជ្រាវ ធ្វើ​កិច្ច​ការសង្គម​ស្ម័គ្រចិត្ត ដើម្បីយកបទពិសោធន៍ទាំងសាលា ទាំងសង្គមមកបញ្ចូលគ្នា។

បើយើងរៀនពីរមហាវិទ្យាល័យមួយឆមាស ៥ ទៅ៦មុខ ពីរមហាវិទ្យាល័យ១០មុខជាង យើងទៅបានចំណេះជំនាញយ៉ាងម៉េចកើត?…

លោកឧកញ៉ា ប៉ិច បូឡែន

លោកឧកញ៉ាបញ្ជាក់ជាថ្មីថា យុវជនគួរ​គិត​ពីគោលដៅអាជីព​ឱ្យ​បានច្បាស់ រួចរៀនតែមួយ​ជំនាញបានហើយ និង​យកពេលមួយ​ទៀតចុះស្តារ ចុះសាកល្បងការងារ ដើម្បីយកបទពិសោធន៍។

សម្រាប់លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា លើកឡើងថា ការសិក្សា​នៅមហាវិទ្យាល័យ ឬសាកលវិទ្យាល័យនេះ បើពិនិត្យ​មើលការសិក្សា​នៅ​ប្រទេស​ផ្សេងពីកម្ពុជា គឺកម្រមាននិស្សិត ឬយុវជន​ទៅរៀនពីរ ឬបីមហាវិទ្យាល័យបានណាស់ ពោលគឺគេរៀនតែមួយមហាវិទ្យាល័យ​ប៉ុណ្ណោះ ដោយគេរៀនពេញមួយថ្ងៃ ពោលគឺគេស្នាក់នៅសាកលវិទ្យាល័យ​តែម្តង ដោយ​មិន​មានពេលវេលា​មក​ខាងក្រៅដើម្បីរៀន​សាលាផ្សេង​ទៀត ឬរៀនពីរបីមហាវិទ្យាល័យ​នោះឡើយ។

ដូច្នេះចំពោះទស្សនៈរបស់លោក យុវជន​យើង មុននឹងរៀន ឬក៏ជ្រើសរើស​មហាវិទ្យាល័យ គឺត្រូវជ្រើសរើសឱ្យត្រូវ​នឹង​ចំណង់ចំណូលចិត្តរបស់ខ្លួន ឧប្បនិស្ស័យរបស់ខ្លួន រួមនឹងការពិចារណាពីទីផ្សារការងារផងដែរ ហើយរៀនមួយជំនាញ ឬមួយមហាវិទ្យាល័យឱ្យច្បាស់ ហើយ​សល់ពេលវេលា​ធ្វើកិច្ចការមហាវិទ្យាល័យ កិច្ចការសង្គម ឬក៏ហាត់ការបន្ថែម ដើម្បីទទួលបានទាំងចំណេះដឹង បទពិសោធន៍ការងារ ទំនាក់ទំនងសង្គម។

ប្រសិនបើគាត់សិក្សាច្បាស់ គាត់ធ្វើការច្បាស់ គាត់មានក្រមសីលធម៌ល្អ គាត់មានទំនាក់ទំនងល្អ ដូច្នេះអត្រាជោគជ័យច្រើន…

លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា

យ៉ាងណាក៏ដោយសម្រាប់សិស្សនិស្សិតដែលមានលទ្ធភាព មកពីគ្រួសារធូរធា ឬក៏​មានបណ្តាញទំនាក់ទំនងការងារស្រាប់ លោកបណ្ឌិតមិនហាមឃាត់ក្នុងការរៀនពីរបីជំនាញ ឬពីរបីមហាវិទ្យាល័យនោះទេ ប៉ុន្តែសម្រាប់យុវជនដែលមិន​មានលទ្ធភាពច្រើន គឺគួរតែរៀនមួយមហាវិទ្យាល័យ បូកជាមួយនឹងការសិក្សាជំនាញខ្លី ដែល​គាំទ្រ​ទៅដល់ជំនាញខ្លួន និងហាត់ការងារ ទាំងនេះ គឺជាអ្វីដែលលោកបណ្ឌិតជឿជាក់ថា យុវជន​នឹង​អាច​ទទួលបានជោគជ័យនៅក្នុងអាជីពសិក្សា​របស់ខ្លួន៕