ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – លើកឡើងក្នុងបទបង្ហាញ និងកិច្ចពិភាក្សាស្ដីពី “សារៈសំខាន់នៃអំណានចំពោះការសិក្សា” ដើម្បីអបអរសាទរទិវាជាតិអំណាន លើកទី៨ កាលបីថ្ងៃទី១១ ខែមីនា ឆ្នាំ២០២៣ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា អំណានជាមាគ៌ាឆ្ពោះទៅបរិវត្តកម្មវិស័យអប់រំ។
ឯកឧត្តមបណ្ឌិតសភាចារ្យ ហង់ជួន ណារ៉ុន លើកឡើងថា ដើម្បីអាចសម្រេចបានគោលដៅនៃការអភិវឌ្ឍសហសវត្សរ៍ក្នុងវិស័យអប់រំ (SDG4) ដែលធានាបានថា ការអប់រំមួយដែលមានគុណភាព ប្រកបដោយបរិយាបន្ន មានសមធម៌ និងការសិក្សាពេញមួយជីវិត អំណានគឺជាមូលដ្ឋានគ្រឹះក្នុងការបរិវត្តកម្មវិស័យអប់រំក្នុងបរិបទប្រទេសកម្ពុជា។
រដ្ឋមន្រ្តីក្រសួងអប់រំ បញ្ជាក់បន្ថែមថា នៅទូទាំងពិភពលោកកុមារទៅរៀននៅសាលា គឺមិនចេះអានអក្សរ និងមិនចេះសរសេរបានត្រឹមត្រូវ មានប្រមាណជា ៣០ទៅ៤០% ដែលធ្វើឱ្យប៉ះពាល់គុណភាពអប់រំ នេះមានន័យថា មិនមែនត្រឹមតែនៅកម្ពុជាទេ គឺប្រមាណជា ៥០០លាននាក់ក្នុងពិភពលោកសិស្សដែលទៅរៀននៅសាលាហើយមិនចេះអាន និងសរសេរស្ទាត់ជំនាញ។ ទន្ទឹមគ្នានេះ ជាពិសេស នៅពេលមានការរីករាលដាលនៃជំងឺកូវីដ-១៩ ចំនួនពីរឆ្នាំ សាលាបិទទ្វារ សិស្សរៀនតាមប្រព័ន្ធអនឡាញ ហើយនៅពេលបើកសាលាឡើងវិញ គឺបានប៉ះពាល់ទៅដល់ការសម្រេចបាននូវគោលដៅនៃការអភិវឌ្ឍសហសវត្សរ៍ក្នុងវិស័យអប់រំ (SDG4)។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
“ប្រសិនបើយើងមិនជំរុញអំណានទេ មិនធ្វើបរិវត្តកម្មវិស័យអប់រំទេ គឺមិនសម្រេចបានគោលដៅអប់រំនេះទេ”
រដ្ឋមន្រ្តីក្រសួងអប់រំ បានលើកឡើងផងដែរថា ការធ្វើបរិវត្តកម្មវិស័យអប់រំ ដែលមាន ៣ចំណុច រួមមាន៖
ទី១. ត្រូវបង្រៀនសិស្សឱ្យចេះអាន និងសរសេរអក្សរច្បាស់៖ ការលើកកម្ពស់អំណានដំបូង គណិតដំបូង ថ្នាក់ទី១ ដល់ថ្នាក់ទី៣ ជាមូលដ្ឋានគ្រឹះជួយសិស្សឱ្យចេះអាន និងសរសេរអក្សរច្បាស់ ដែលបានរៀបចំឡើងដោយក្រសួងអប់រំ យុវជន និងកីឡា។ ទន្ទឹមគ្នានេះ បង្រៀនគ្រូឱ្យចេះពីវិធីសាស្រ្តបង្រៀនធ្វើយ៉ាងម៉េចឱ្យសិស្សចេះអានឱ្យស្ទាត់ ។ ម៉្យាងវិញទៀត វិធីសាស្រ្តបង្រៀនតាមបែបសរុប គឺជួយបង្រៀនឱ្យសិស្សឆាប់ចេះអាន ឆាប់ចេះសរសេសរ និងមានសៀវភៅអានបន្ថែម។
ទី២. ផ្ដោតលើការបណ្ដុះបណ្ដាលគ្រូ៖ ដើម្បីឱ្យវិស័យអប់រំមានគុណភាព គឺត្រូវផ្ដោតលើការបង្កើនគុណវុឌ្ឍគ្រូ ការបណ្ដុះឱ្យគ្រូមានស្ដង់ដារវិជ្ជាជីវៈគ្រូបង្រៀន ចេះទាំងខ្លឹមសារមេរៀន ចេះវិធីសាស្រ្តបង្រៀន និងយល់ដឹងអំពីការវិវត្តរបស់សិស្សផងដែរ។ ម៉្យាងវិញទៀត ប្រសិនគ្រូផ្តោតតែលើខ្លឹមសារមេរៀន គឺគ្រូមិនដឹងថាត្រូវបង្រៀនសិស្សរបៀបម៉េចឱ្យសិស្សចេះ និងឆាប់ចាំ ដូច្នេះ គ្រូបង្រៀនត្រូវផ្ដោតលើការស្រាវជ្រាវបន្ថែម។
ទី៣. ការប្រើប្រាស់បច្ចេកវិទ្យាក្នុងការអប់រំ៖ ចំណេះដឹងបច្ចេកវិទ្យាក៏ជាផ្នែកមួយសំខាន់ទាំងការរៀន និងបង្រៀន។ ទន្ទឹមគ្នានេះ ចំណុចដែលបានរៀបរាប់ទាំងពីរខាងលើ ការប្រើប្រាស់បច្ចេកវិទ្យា រួមផ្សំជាមួយកំណែទម្រង់សាលារៀន គឺមានគោលដៅធ្វើយ៉ាងណាផ្សារភ្ជាប់ការអប់រំ ឆ្លើយតបទៅនឹងការវិវត្តសង្គម ឆ្លើយតបនឹងទីផ្សារការងារ ហើយអំណានគឺជាគន្លឹះ ។
ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានបន្ថែមថា ប្រសិនបើយើងអត់អានសៀវភៅទេ យើងមិនអាចចាប់យកចំណេះដឹងថ្មីៗបានទេ ហើយយើងក៏មិនអាចរៀនសូត្របន្ថែមឱ្យទាន់ការវិវត្តថ្មីៗនៅក្នុងពិភពលោកបានទេ។ ដូច្នេះ អំណានជាមូលដ្ឋានគ្រឹះឆ្ពោះទៅបរិវត្តកម្មវិស័យអប់រំ ប៉ុន្តែទាមទារឱ្យមានការចូលរួមចាំបាច់ពីឪពុកម្ដាយ និងសង្គមទាំងមូលត្រូវតែគាំទ្រការអាន និងលើកទឹកចិត្តអ្នកនិពន្ធផងដែរ៕
