ការរីកចម្រើននៃបច្ចេកវិទ្យា AI នៅឆ្នាំ២០២៥ បានបង្កើតមហាសេដ្ឋីថ្មីជាង ៥០នាក់ ដោយភាគច្រើនជាសហគ្រិន​ជំរុញការបង្កើតថ្មី ផ្អែកលើគម្រូ AI, ហេដ្ឋារចនាសម្ព័ន្ធ និងកម្មវិធី ដែលកំពុងផ្លាស់ប្ដូរជីវភាពរស់នៅប្រចាំថ្ងៃ។

ខែមករា គឺជាពេលវេលាដ៏សំខាន់មួយ សម្រាប់ការប្រកួតប្រជែងបច្ចេកវិទ្យា AI នៅពេលដែលក្រុមហ៊ុនចិន DeepSeek បានបង្ហាញគម្រូ AI ប្រភពបើកចំហរបស់ខ្លួន ដែលត្រូវបានបង្កើតឡើង ដោយប្រើថាមពលកុំព្យូទ័រតិចជាងគម្រូក្រុមហ៊ុនធំៗរបស់អាមេរិក។ របកគំហើញនេះ បានជំរុញឱ្យស្ថានិក DeepSeek លោក Liang Wenfeng ក្លាយជាមហាសេដ្ឋីតែមួយប៉ព្រិចភ្នែក ដោយទ្រព្យសម្បត្តិសុទ្ធរបស់លោកឥឡូវនេះ ត្រូវបានគេប៉ាន់ប្រមាណថា មានចំនួន ១១,៥ ពាន់លានដុល្លារ, នេះបើយោងតាម Forbes។

ការផ្ដល់មូលនិធិ Blockbuster ក្នុងឆ្នាំ២០២៥ សម្រាប់ក្រុមហ៊ុនដូចជា Anthropic, Safe Superintelligence, OpenAI និង Anysphere បានជំរុញការកើនឡើង នៃមហាសេដ្ឋីថ្មីបន្ថែមទៀត ដោយជំរុញការវាយតម្លៃរបស់ពួកគេដល់កម្រិតកំណត់ត្រា។

ក្រុមហ៊ុនចាប់ផ្ដើមអាជីវកម្ម AI បានទាក់ទាញការវិនិយោគជាង ២០០ពាន់លានដុល្លារក្នុងឆ្នាំ២០២៥ ដែលមានចំនួន ៥០ភាគរយ នៃមូលនិធិសកលទាំងអស់ កើនឡើង១៦ភាគរយ ពីឆ្នាំ២០២៤, នេះបើយោងតាម Crunchbase។

ក្រុមហ៊ុន AI ឯកជន ដែលមានតម្លៃចាប់ពី១ពាន់លានដុល្លារឡើងទៅ បានកើនឡើងដល់ ៤៩៨ ដោយមានតម្លៃសរុប ២,៧ពាន់ពាន់លានដុល្លារ, នេះបើយោងតាមការរាយការណ៍របស់ CNBC។

ប្រាក់រាប់ពាន់លានដុល្លារ បានហូរចូលទៅក្នុងក្រុមហ៊ុនប្រភេទធុរកិច្ចថ្មី ដែលអភិវឌ្ឍបញ្ញាសិប្បនិម្មិត (AI) ពហុម៉ូឌុល តាមរយៈរូបភាព វីដេអូ និងសំឡេង។ ក្នុងចំណោមពួកគេ សហស្ថាបនិក ElevenLabs គឺលោក លោក Mati Staniszewski និងលោក Piotr Dabkowski បានក្លាយជាមហាសេដ្ឋី បន្ទាប់ពីក្រុមហ៊ុនចាប់ផ្តើមអាជីវកម្មសំឡេង AI ដែលគៀងគរទឹកប្រាក់បាន ១០០លានដុល្លារ និងកើនតម្លៃដល់ ៦,៦ពាន់លានដុល្លារក្នុងខែតុលា។

ឧបករណ៍ ដែលជំរុញដោយបញ្ញាសិប្បនិម្មិត សម្រាប់អាជីវកម្ម រួមទាំងការសរសេរកូដ និងការវិភាគទិន្នន័យ ក៏បានប្រែក្លាយសហគ្រិនទៅជាមហាសេដ្ឋីផងដែរ រួមទាំងសហស្ថាបនិក Anysphere ដែលទទួលបានតម្លៃ ២៩ពាន់លានដុល្លារ សម្រាប់ក្រុមហ៊ុនក្នុងខែវិច្ឆកា។

ដោយសារតែតម្រូវការមជ្ឈមណ្ឌលទិន្នន័យកើនឡើង ក្រុមហ៊ុនដែលផ្គត់ផ្គង់ហេដ្ឋារចនាសម្ព័ន្ធស្នូលសម្រាប់ AI បានបង្កើតមហាសេដ្ឋីថ្មី ១២រូប ក្នុងឆ្នាំ២០២៥។ ទោះជាយ៉ាងណាក៏ដោយ ការប្រណាំងប្រជែងនេះបានពង្រីកលើសពីម៉ូឌែល និងផ្នែករឹងទៅជាការប្រកួតប្រជែងផ្នែកធនធានមនុស្សយ៉ាងខ្លាំងក្លា។ ការប្រកួតប្រជែងនេះ បានឈានដល់កម្រិតកំពូលនៅក្នុងខែមិថុនា នៅពេលដែល Meta បានទិញភាគហ៊ុន ៤៩ភាគរយ នៃក្នុងក្រុមហ៊ុន Scale AI ក្នុងតម្លៃជាង ១៤ពាន់លានដុល្លារ។

ជាផ្នែកមួយនៃកិច្ចព្រមព្រៀងនេះ នាយកប្រតិបត្តិ និងសហស្ថាបនិកអាយុ ២៨ឆ្នាំ Alexandr Wang ដែលបានក្លាយជាមហាសេដ្ឋីជាលើកដំបូងក្នុងឆ្នាំ២០២២ បានចូលរួមជាមួយ Meta ក្នុងនាមជាប្រធានផ្នែក AI។ ប្រតិបត្តិការនេះមានតម្លៃប្រហែល ២៩ពាន់លានដុល្លារ និងបានធ្វើឱ្យ Lucy Guo អាយុ ៣១ឆ្នាំ ដែលជាសហស្ថាបនិកជាមួយ Wang បានក្លាយជាមហាសេដ្ឋីស្ត្រីក្មេងជាងគេបំផុតលើពិភពលោក មានទ្រព្យសម្បត្តិសរុបប្រមាណ ១,៤ ពាន់លានដុល្លារ។

កាលពីឆ្នាំមុន យើងក៏បានឃើញចំនួនមហាសេដ្ឋី ដែលក្លាយជាសេដ្ឋីដោយខ្លួនឯង ក្នុងវ័យ២០ឆ្នាំ កើនឡើងគួរឱ្យកត់សម្គាល់ផងដែរ ដោយមនុស្សជាច្រើនបានទាញប្រយោជន៍ពីការរីកចម្រើនយ៉ាងឆាប់រហ័សរបស់ AI, នេះបើយោងតាមរបាយការណ៍របស់ Fortune។

លោក Andrew McAfee អ្នកស្រាវជ្រាវដ៏សំខាន់មួយរូប នៅសាកលវិទ្យាល័យ Massachusetts Institute of Technology បានប្រាប់ CNBC ថា AI កំពុងបង្កើតទ្រព្យសម្បត្តិផ្ទាល់ខ្លួនក្នុងល្បឿនមួយដែលលើសពីការរីកចម្រើនផ្នែកបច្ចេកវិទ្យាកាលពីមុន។ McAfee បាននិយាយថា “ត្រឡប់ទៅមើលទិន្នន័យជាង ១០០ឆ្នាំមុនវិញ យើងមិនដែលឃើញទ្រព្យសម្បត្តិត្រូវបានបង្កើតឡើងក្នុងទំហំ និងល្បឿនលឿនបែបនេះទេ”៕