ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងពិធីសំណេះសំណាលជាមួយបុគ្គលិកអប់រំ និងសិស្សានុសិស្ស នៅវិទ្យាល័យ ហ៊ុន សែន ចុងកាល់ ខេត្តឧត្តរមានជ័យ កាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍លើកទឹកចិត្តដល់ក្មួយៗសិស្សានុសិស្សថ្នាក់ទី១២ ដែលត្រៀមប្រឡងសញ្ញាបត្រមធ្យមសិក្សាទុតិយភូមិខាងមុខនេះ ឱ្យបន្តខិតខំប្រឹងប្រែងរៀនសូត្រ ដើម្បីទទួលបានលទ្ធផលល្អប្រសើរ។
ឯកឧត្ដមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ដោយយល់ឃើញពីស្ថានភាពរបស់សិស្សានុសិស្សដែលត្រូវជម្លៀស គឺភាគច្រើនមិនបានយកសៀវភៅសិក្សាគោលមកតាមនោះ ដូច្នេះក្រសួងបានរៀបចំយន្តការគាំទ្រក្នុងការផ្តល់សៀវភៅសិក្សាគោលឱ្យបានពេញលេញជូនដល់ក្មួយៗសិស្សានុសិស្សគ្រប់រូបដែលបានជម្លៀសខ្លួន ដើម្បីអាចបន្តការសិក្សាបានដោយខ្លួនឯងឱ្យទាន់មុនពេលបើកបវេសនកាលឆ្នាំថ្មី។ ទន្ទឹមនឹងនេះ ក្រសួងក៏មានផែនការជួសជុល និងកសាងអគារសាលារៀនដែលខូចខាតឡើងវិញ ដើម្បីឱ្យសិស្សានុសិស្សអាចសិក្សារៀនសូត្រក្នុងបរិយាកាសល្អប្រសើរ ហើយក្រសួងក៏មានផែនការផ្តល់អាទិភាពអភិវឌ្ឍនៅតំបន់ជាយដែននេះផងដែរ។
រដ្ឋមន្ត្រីក្រសួងអប់រំ បញ្ជាក់ថា ពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ ក្រសួងសម្រេចថា នឹងរៀបចំនៅទីរួមស្រុកពួក ខេត្តសៀមរាប សម្រាប់ការប្រឡងរបស់សិស្សមកពីខេត្តឧត្តរមានជ័យ។ ឯកឧត្ដមបណ្ឌិតសភាចារ្យ ហង់ជួន ណារ៉ុន ស្នើមន្ទីរយកចិត្តទុកដាក់ និងសហការណ៍ ជាមួយមន្ទីរខេត្តសៀមរាប និងត្រៀមរៀបចំកន្លែងស្នាក់នៅ និងកន្លែងប្រឡង ហើយចំពោះសិស្សដែលកំពុងភៀសខ្លួនទៅខេត្តផ្សេង ក្រសួងអនុញ្ញាតិឱ្យប្រឡងនៅទីតាំងនោះតែម្តង។
ជាមួយគ្នានេះ ដើម្បីជាការទទួលស្គាល់ និងថ្លែងអំណរគុណយ៉ាងជ្រាលជ្រៅដល់បុគ្គលិកអប់រំទាំងអស់ក្នុងខេត្តឧត្តរមានជ័យ ក្រសួងបានស្នើសុំពីនាយករដ្ឋមន្ត្រីកម្ពុជា នូវមេដាយមុនីសារាភ័ណ្ឌ ថ្នាក់មហាសេរីវឌ្ឍន៍ ប្រគល់ជូនប្រធានមន្ទីរអប់រំ យុវជន និងកីឡា ខេត្តឧត្តរមានជ័យ តំណាងឱ្យលោកគ្រូអ្នកគ្រូ និងមន្ត្រីអប់រំខេត្តឧត្តរមានជ័យ ដែលបានយកអស់កម្លាំងកាយចិត្តបំពេញភារកិច្ចប្រកបដោយមនសិការទទួលខុសត្រូវខ្ពស់ក្នុងបុព្វហេតុអភិវឌ្ឍធនធានមនុស្សនៅកម្ពុជា៕
