ការចិញ្ចឹមកូនឱ្យក្លាយជាមនុស្សល្អ មានសុជីវធម៌ និងអាចជួយខ្លួនឯងបាន គឺជាបំណងប្រាថ្នារបស់ឪពុកម្តាយគ្រប់រូប។ ទោះជាយ៉ាងណា នៅក្នុងសង្គមសព្វថ្ងៃ មានកុមារជាច្រើនដែលក្លាយជាក្មេងទម្រើស ដោយសារការអប់រំមិនត្រឹមត្រូវ ឬការខ្វះការយកចិត្តទុកដាក់ពីឪពុកម្តាយជាដើម។

ក្នុងអត្ថបទនេះ យើងនឹងបង្ហាញពីគោលការណ៍ចំនួន៥ ដែលឪពុកម្តាយអាចយកទៅអនុវត្ត​ក្នុងការ​ចិញ្ចឹមកូន កុំ​ឱ្យ​ពួកគេ​ក្លាយ​ទៅជា​ក្មេង​ទម្រើស និងប្រែទៅជា​មនុស្ស​រឹងមាំ អាចជួយ​ខ្លួនឯងបាននៅថ្ងៃអនាគត ៖

១. កំណត់ព្រំដែន កុំឱ្យកូនហួសហេតុពេក ៖ កុមារដែលធំឡើងដោយគ្មានច្បាប់វារៈ ឬដែនកំណត់ មានឱកាសខ្ពស់ក្លាយជាមនុស្សទំនើងតាមចិត្ត។ ដូច្នេះ ឪពុកម្តាយគួរកំណត់ច្បាស់លាស់ជាមួយពួកគេ​ដូចជា ម៉ោងលេង, ការប្រើប្រាស់អេក្រង់, ការចំណាយលុយជាដើម។ ឧទាហរណ៍ អនុញ្ញាតឱ្យ​លេងត្រឹម២ម៉ោងក្នុងមួយថ្ងៃ កំណត់ពេលវេលា​នៃការមើលទូរទស្សន៍ ឬថែមប្លេត បង្រៀនពួកគេឱ្យចេះសន្សំ និងយល់ពីតម្លៃលុយ។ ការប្រកាន់ខ្ជាប់លើច្បាប់ទាំងនេះ នឹងជួយឱ្យកូនអ្នកយល់ពីភាពជាអ្នកដឹកនាំខ្លួនឯង។

២. បង្រៀនកូនឱ្យចេះធ្វើការងារផ្ទះ ៖ ការស្រាវជ្រាវបានបង្ហាញថា កុមារដែលត្រូវបានបង្រៀនឱ្យ​ទទួលខុសត្រូវលើការងារផ្ទះដូចជា ការរៀបចំម្ហូបអាហារ ការសម្អាតបន្ទប់ផ្ទាល់ខ្លួន ការជួយថែរក្សាសត្វចិញ្ចឹម នៅពេលប្រឈមនឹងបញ្ហា ពួកគេអាចដោះស្រាយបាន និងមានភាពជឿជាក់លើខ្លួនឯងកាន់តែច្រើន ព្រោះការប្រកាន់ខ្ជាប់លើការងារផ្ទះនឹងជួយឱ្យ​កូន របស់អ្នកយល់អំពីតម្លៃនៃការងារ ហើយមានសមត្ថភាពគ្រប់គ្រងអារម្មណ៍ កំហឹង និងស្គាល់ពីភាពបរាជ័យ។

៣. មិនត្រូវព្រមគ្រប់ពេល ត្រូវចេះនិយាយ “ទេ” ៖ ការបំពេញតាមចំណង់បានគ្រប់យ៉ាងរបស់កូន ធ្វើឱ្យពួកគេមានអារម្មណ៍ថា ខ្លួនអាចទទួលបានអ្វីៗដោយមិនខិតខំ។ ដូច្នេះ ឪពុកម្តាយគួរចេះបដិសេធនៅពេលចាំបាច់។​ កុមារដែលទទួលការខកចិត្តនឹងអាចរៀនអំពីការតស៊ូ និងការដោះស្រាយបញ្ហា។ នេះជាសមត្ថភាពដ៏សំខាន់ សម្រាប់ជួយដល់ពួកគេនៅពេលពេញវ័យ ពួកគេអាចទប់ទល់ នឹងបញ្ហារបស់ខ្លួនដោយមានភាពតស៊ូ។

៤. លើកទឹកចិត្តកូនឱ្យខិតខំដើម្បីសម្រេចគោលដៅ ៖ កុមារមួយចំនួនក្លាយជាមនុស្សមិនឱ្យ​តម្លៃនូវអ្វីដែលពួកគេមាន ព្រោះវាបានមកដោយងាយស្រួលខ្លាំងពេក។ បែបនេះធ្វើឱ្យ​គេងាយប៉ះពាល់នឹងបញ្ហាបាក់ទឹកចិត្តនៅពេលដែលពួកគេមិនបានអ្វីតាមបំណងដែលពួកគេចង់បាន។ ជំនួសឱ្យការផ្តល់អ្វីៗដោយងាយៗ អ្នកអាចប្រើរបៀប “ប្រាក់រង្វាន់សម្រាប់ការខិតខំ” ដូចជា បើកូនចង់ទទួលបានសម្ភារៈថ្មី អ្នកអាចកំណត់លក្ខខណ្ឌថា ត្រូវបញ្ចប់កិច្ចការសាលាឱ្យបានល្អសិន, បង្រៀនពួកគេឱ្យចេះសន្សំលុយដើម្បីទិញអ្វីដែលពួកគេចង់បាន

៥. បណ្តុះទម្លាប់ឱ្យ​ចេះបកស្រាយ ៖ ប្រសិនបើកូនអ្នកចង់បានអ្វីដែលអ្នកមិនទាន់ប្រាកដថា គួរឱ្យ​ឬអត់ អ្នកអាចសួរពួកគេឱ្យ​បញ្ចេញមតិពន្យល់អំពីហេតុផល។ ក្នុងករណីនេះអ្នកក៏អាចផ្តល់ឱ្យ​ពួកគេទៅតាមចម្លើយដែលសមស្របទៅតាមហេតុផលផងដែរ៕