រដ្ឋមន្រ្តីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានអំពាវនាវឱ្យ​សាលារៀន​គំរូ និង​សាលា​រៀន​ទាំងអស់ បញ្ចូល​នូវស្មារតី​ស្នេហាជាតិ ការយល់ដឹងពីវប្បធម៌ អរិយធម៌ និងប្រវត្តិសាស្រ្ត ទៅ​ក្នុងកម្មវិធីសិក្សា។ ឯកឧត្តមរដ្ឋមន្រ្តីមានប្រសាសន៍ថា កម្មវិធីទាំងអស់នេះ គឺដើម្បី​អាច​ឱ្យ​យុវជន​យើង​មានស្មារតី​ស្នេហាជាតិ ហើយ​ទោះបី​ជា​ពួកគេ​នៅបរទេស ក៏​នៅ​តែមាន​មនសិការ​ស្រឡាញ់ជាតិដែរ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា គោលដៅសំខាន់ក្នុងវិស័យអប់រំ គឺការបណ្តុះយុវជនឱ្យក្លាយជា ពលរដ្ឋល្អ ដែលមានទាំងស្មារតីស្នេហាជាតិខ្ពស់ និងសមត្ថភាពជាពលរដ្ឋសកល។ ក្នុងន័យនេះ ការសិក្សាប្រវត្តិសាស្ត្រមិនមែនត្រឹមតែជាការចងចាំព្រឹត្តិការណ៍អតីតកាលប៉ុណ្ណោះទេ ថែមទាំងជាការឆ្លុះបញ្ចាំងឱ្យស្គាល់ពីអត្តសញ្ញាណខ្លួនឯង យល់ដឹងពីឬសគល់នៃបញ្ហាដែលបានកើតឡើង និងចំណុចខ្លាំងខ្សោយរបស់ប្រទេសជាតិ ដើម្បីវិភាគ សិក្សាស្វែងយល់ ទប់ស្កាត់កុំឱ្យប្រវត្តិសាស្ត្រអាចកើតឡើងវិញបាន។

ជាមួយ​គ្នានេះ ឯកឧត្តមរដ្ឋមន្រ្តី ក៏​បានណែនាំឱ្យ​ធ្វើ​ការកែលម្អវិធីសាស្ត្របង្រៀនប្រវត្តិសាស្ត្រឱ្យកាន់តែមានភាពទាក់ទាញ ដើម្បីឱ្យយុវជនជំនាន់ក្រោយចេះវិភាគ ស្វែងយល់ពីអរិយធម៌ និងមានមនសិការស្នេហាជាតិទោះក្នុង​កាលៈទេសៈ​មានជម្លោះ ឬសន្តិភាពក៏ដោយ។

ក្រោម​ការ​ដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា រដ្ឋាភិបាល​បាន​អនុវត្ត​យុទ្ធសាស្រ្ត​បញ្ចកោណដំណាក់កាលទី១ ដើម្បីជំរុញ​កំណើនសេដ្ឋកិច្ច ការ​កែលម្អគុណភាព​ជីវភាព ប្រជាពលរដ្ឋ និងការ​អភិវឌ្ឍ​ប្រកប​ដោយ​ចីរភាព សំដៅ​សម្រេច​ចក្ខុវិស័យ​កម្ពុជាឆ្នាំ២០៣០ និង២០៥០។ ក្នុងបរិបទនេះ ការ​អភិវឌ្ឍមូលធនមនុស្ស ជាពិសេស​យុវជន គឺជា​កត្តាស្នូល​សម្រាប់សន្តិភាព ស្ថិរភាព និង​វឌ្ឍនភាពជាតិ។ ការ​បណ្តុះស្មារតីស្នេហាជាតិ ដោយផ្អែក​លើចំណេះដឹង ប្រវត្តិសាស្រ្ត វប្បធម៌ ទំនួល​ខុសត្រូវសង្គម នឹងធ្វើ​ឱ្យ​យុវជនក្លាយ​ជា​កម្លាំងស្នូល​ក្នុងការ​ការពារ និង​កសាងប្រទេស​ជាតិ និង​ចូលរួម​សម្រេច​អនាគត​កម្ពុជា​ប្រកប​ដោយ​សន្តិភាព និង​ចីរភាព៕