ការស្ម័គ្រចិត្តបរិច្ចាគពេលវេលា ថវិកា ឬក៏កម្លាំងថាមពល ទៅជួយអ្នកដទៃ ទោះមិនបានធ្វើឱ្យពិភពលោកទាំងមូលមើលទៅប្រសើរភ្លាមៗ ប៉ុន្តែវាធ្វើឱ្យអ្នកទទួលបានភាពរីកចម្រើនជាងមុន ។ ការសិក្សាបានរកឃើញថា ការ​ស្ម័គ្រ​ចិត្ត​ជួយ​ទៅ​ដល់សហគមន៍ ជាកត្តានាំឱ្យយើងរីករាយ មានសុភមង្គល ដែល​នាំ​ឱ្យ​មានសុខភាព​ផ្លូវចិត្ត​កាន់តែប្រសើរ។

យោងតាមគេហទំព័រ UCL បានបង្ហាញអំពីអត្ថប្រយោជន៍១០ចំណុច ដែលអ្នកនឹងទទួលបានបន្ទាប់ពីផ្តល់ជំនួយទៅកាន់អ្នកដទៃ ៖

១.ទទួលបាន​អារម្មណ៍ល្អៗ ៖ ពេលដែលបានជួយអ្នកដទៃ វាអាចបណ្តុះសិរីរាង្គខួរក្បាលឱ្យមានការផ្លាស់ប្តូរទាញភ្ជាប់ទៅនឹងសុភមង្គល ។ ការពង្រឹងអារម្មណ៍ល្អ និងសុខុមាលភាព អាចបណ្តាលមកពីភាពសកម្មរបស់រាងកាយ ដែលទទួលបានមកពីការស្ម័គ្រចិត្តដោយសុទ្ធចិត្ត ហើយវាធ្វើឱ្យយើងកាន់តែសកម្មនៅក្នុងសង្គមបានច្រើនជាងមុន។

២.ជំរុញអារម្មណ៍ឱ្យមានភាពជាម្ចាស់ ៖ ការជួយទៅកាន់អ្នកដទៃ អាចជួយឱ្យយើងបង្កើតបានមិត្តថ្មីៗ ហើយមានទំនាក់ទំនងកាន់តែជិតស្និតនៅក្នុងសហគមន៍ ដែលជំរុញបន្ថែមនូវភាពស្និតស្នាល និងភាពជាម្ចាស់។ សកម្មភាពជួយ ដែលមានឱកាសជួបមុខគ្នាដោយផ្ទាល់ ដូចជាការស្ម័គ្រចិត្តចុះចែកអាហារ អាចជំរុញឱ្យកាត់បន្ថយភាពឯកា និងទម្លាប់ផ្តាច់ខ្លួននៅដាច់ដោយឡែក។

៣.បង្កើតគោលបំណង ៖ ការសិក្សាមួយបានបង្ហាញថា ការជួយ ឬស្ម័គ្រចិត្ត បានអន្ទងចំណូលចិត្តមនុស្ស ឱ្យមានលំនឹង ការកំណត់គោលបំណង ឬគោលដៅ និងស្វែងរកអត្តសញ្ញាណនៃខ្លួនឯង ។ ដោយហេតុថា ការជួយអ្នកដទៃធ្វើឱ្យអារម្មណ៍របស់អ្នកហាក់ទទួលបានរង្វាន់អ្វីមួយ ដែលជួយបំពេញភាពខ្វះចន្លោះ និងបង្កើនថាមពល ផ្តល់អំណាចទៅកាន់ខ្លួនឯង ស្គាល់ពីអ្វីដែលខ្លួនចង់បាន។

៤.ពង្រឹងទស្សនៈវិជ្ជមាន ៖ ការជួយអ្នកដទៃ ជាពិសេសអ្នកដែលទទួលបានឱកាស ឬសំណាងតិចតួចជាងខ្លួនអ្នក គឺអាចជួយបណ្តុះការគិត ដោយផ្អែកលើទស្សនៈ ឬគោលជំហរច្បាស់មួយ ហើយនឹងជំរុញឱ្យអ្នកមានភាពវិជ្ជមាននៅក្នុងស្ថានភាពបច្ចុប្បន្ន។

៥.បណ្តុះឥទ្ធិពល ៖ ការសិក្សាមួយបានរកឃើញថា នៅពេលដែលមនុស្សកាន់តែបង្ហាញស្នាដៃ នោះក៏កាន់តែជំរុញឱ្យអ្នកដទៃធ្វើដូច្នោះដែរ។ ឥទ្ធិពលនេះអាចបញ្ជូន​តាមរយៈសហគមន៍ នាំឱ្យបុគ្គលជាច្រើនទៀតមានការផ្លាស់ប្តូរ ដោយងាកទៅផ្តល់តម្លៃនៃកិច្ចការស្ម័គ្រចិត្ត ឬជួយអ្នកដទៃ ដែលធ្វើឱ្យមនុស្សចេះជួយគ្នាមានចំនួនកើនឡើងច្រើនជាងមុន។

៦.ជួយឱ្យអ្នកមានអាយុវែង ៖ ការស្ម័គ្រចិត្តជួយអ្នកដទៃបានទៀងទាត់ អាចអភិវឌ្ឍន៍សមត្ថភាពរបស់អ្នកឱ្យចេះគ្រប់គ្រងនូវ​ភាពតានតឹង និងកាត់បន្ថយជំងឺរ៉ាំរ៉ៃផងដែរ ទន្ទឹមគ្នានោះវាក៏បានទាញស្មារតីឱ្យចេះពេញចិត្តជាមួយនឹងខ្លួនឯងបានច្រើនជាងមុន។

៧.មានថាមពលបន្តទៅមុខ ៖ ការជួយអ្នកដទៃក៏បានបង្រៀនឱ្យអ្នក ចេះជួយខ្លួនឯងផងដែរ ប្រសិនបើអ្នកមានបទពិសោធន៍លំបាកពីមុនមក វាក៏ជាវិធីមួយជួយឱ្យអ្នកអាចត្រឡប់ទៅស្វែងយល់ពីស្ថានភាពរបស់អ្នកកាលពីមុន ។ ស្ម័គ្រចិត្តគឺជាការផ្តល់អ្វីមួយដោយគ្មានក្ដីរំពឹងផលសងត្រឡប់មកវិញក៏ពិតមែន ប៉ុន្តែតែងតែបណ្តុះនូវ​ក្ដីសង្ឃឹមទៅកាន់ខ្លួនអ្នក។

៨.ជំរុញសេចក្ដីគោរពទៅកាន់ខ្លួនឯង ៖ មនុស្សដែលមានឱកាសស្ម័គ្រចិត្តត្រូវបានគេរកឃើញថា មានការគោរពខ្លួនឯងខ្ពស់ (High self-esteem) ហើយក៏នាំឱ្យបុគ្គលប្រភេទនេះមានទំនុកចិត្តលើខ្លួនឯងខ្ពស់ដូចគ្នា។ ទន្ទឹមគ្នានោះវាក៏អាចជំរុញសុខមាលភាពគ្រប់ផ្នែកទាំងអស់។ អត្ថប្រយោជន៍នៃការស្ម័គ្រចិត្ត ឬជួយអ្នកដទៃ វាអាស្រ័យលើថា តើអ្នកអនុវត្តន៍មានភាពស្ថិតស្ថេរដែរឬទេ? ដូច្នេះហើយ ការជួយអ្នកដទៃឱ្យមានភាពទៀងទាត់ នោះទំនុកចិត្តខ្ពស់ក៏នឹងកើនឡើងទៅតាមនោះដែរ។

៩.បង្កើតមិត្តភាពរឹងមាំ ៖ នៅពេលអ្នកជួយអ្នកដទៃ គឺអ្នកកំពុងតែផ្តល់ក្ដីរំភើបទៅកាន់ពួកគេ។ អ្នកអាចអនុវត្តន៍ជាមួយមិត្តភ័ក្រ្តផ្ទាល់តែម្តង ដើម្បីពង្រឹងមិត្តភាព។ ការក្លាយជាបំណែកមួយក្នុងភាគល្អ ហើយផ្តល់ទៅកាន់មិត្តរបស់អ្នក វាជំរុញឱ្យមិត្តភាពមានរយៈពេលយូរអង្វែង។

១០.ក្លាយជាមនុស្សទឹកកន្លះកែវ ៖ ប្រភេទមនុស្សទឹកកន្លះកែវ គឺជាក្រុមមនុស្សដែលតែងតែរៀនសូត្រពីមជ្ឈដ្ឋានជុំវិញខ្លួនបន្ថែមជានិច្ច។ ការផ្តល់ផលជាវិជ្ជមានទៅលើនរណាម្នាក់ វាអាចជួយឱ្យអកប្បកិរិយា និងទស្សនៈវិស័យរបស់អ្នក មើលទៅមានភាពផ្លាស់ប្តូរក្នុងផ្លូវល្អដូចគ្នា។ អ្នកជំនាញបានលើកឡើងថា ការសម្តែងចេញនៅសេចក្ដីមេត្តា ជំរុញឱ្យអារម្មណ៍របស់អ្នកកើននូវផ្នត់គំនិត សុទិដ្ឋិនិយម កាន់តែច្រើនជាងមុន៕