ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការនិយាយស្តីល្អគឺជាកត្តាសំខាន់ក្នុងការកសាងទំនាក់ទំនងកាន់តែប្រសើរជាមួយមនុស្សជុំវិញខ្លួន។ ប៉ុន្តែពេលខ្លះយើងអាចនិយាយអ្វីមួយដោយមិនបានគិតវែងឆ្ងាយ ដែលអាចប៉ះពាល់ដល់អារម្មណ៍របស់អ្នកដទៃដោយមិនបានចាប់អារម្មណ៍។ តើមានវិធីសាស្ត្រអ្វីខ្លះដើម្បីជួយឱ្យយើងទប់ស្កាត់ការនិយាយស្តីដែលអាចបង្កផលប៉ះពាល់ដល់ផ្លូវចិត្តអ្នកដទៃ?
តាមរយៈគេហទំព័រ parade បានបង្ហាញគន្លឹះមួយចំនួនក្នុងការកាត់បន្ថយ ឬការទប់ស្កាត់ ពីការនិយាយទាំងឡាយណាដែលប៉ះពាល់ផ្លូវចិត្តអ្នកដទៃ ដោយមានរៀបរាប់លម្អិតនៅខាងក្រោម ៖
ការរង់ចាំ ៖ រៀងរាល់ពេលមានការជជែកជាក្រុម ឬនៅក្នុងចំណោមមនុស្ស ជាពិសេសមនុស្សមានភាពខុសប្លែកគ្នាច្រើន ការទុកចន្លោះដោយមិនប្រញាប់ក្នុងការនិយាយវាយតម្លៃ ឬការបញ្ចេញមតិ ជាឱកាសមួយជួយរំលឹកខ្លួនឯងកុំឱ្យនិយាយប្រធានបទ ឬប្រយោគដែលពុំចាំបាច់ ក៏ដូចជាមានពេលក្នុងការគិត និងជួយឱ្យខួរក្បាលមានពេលគ្រប់គ្រាន់ក្នុងការទប់ចិត្តកុំឱ្យនិយាយតាមអារម្មណ៍ ដែលនាំឱ្យមានការស្តាយក្រោយនាពេលណាមួយ។
ការចាប់ផ្តើមនិយាយនៅវេនបន្ទាប់ ៖ កំឡុងពេលដែលត្រូវការប្រយ័ត្នប្រយែងខ្លាំងចំពោះការប្រើប្រាស់ពាក្យសំដី ជាពិសេសក្នុងស្ថានការណ៍ ដែលក្តោបព័ត៌មាន ឬប្រធានបទមិនទាន់អស់ ការនិយាយក្រោយគេ ឬបន្ទាប់ពីនរណាម្នាក់អាចជាចំណុចមួយក្នុងការកាត់បន្ថយការប៉ះពាល់អ្នកដទៃ។ ប្រសិនបើនៅក្នុងក្រុមមិនមានភាពចាំបាច់ក្នុងការឱ្យលោកអ្នកនិយាយមុនទេ នោះការស្តាប់អ្នកដទៃផ្តល់ឱកាសឱ្យទទួលបានព័ត៌មានបន្ថែម និងអាចឆ្លើយតបចំៗប្រធានបទដែលកំពុងជជែក។ ការអនុវត្តបែបនេះ បានផ្តល់នូវការនិយាយដែលមានការពិចារណា និងការសម្រេចចិត្តថា គួរចែករំលែកចំណុចណា និងរក្សាទុកចំណុចណា។
សរសេរគំនិតនៅក្នុងកម្មវីធីឌីជីថលបន្ថយការនិយាយខ្លាំងៗចេញមកក្រៅ ៖ បច្ចេកវិទ្យាមានភាពបត់បែននិងលឿនរហ័ស រួមទាំងអាចប្រើប្រាស់នៅច្រើនកន្លែង តួយ៉ាងដូចជាទូសរ័ព្ទ ឬកុំព្យូទ័រជាដើម។ ប្រើប្រាស់ភាពទាន់សម័យនៃបច្ចេកវិទ្យា ក្នុងការកាត់បន្ថយកំហឹងជំនួសឱ្យការបង្កើនភាពស្មុគស្មាញ និងលើសលប់ តាមរយៈការសរសេរ អំពីគំនិតដែលបានគិតក្នុងចិត្ត ជាពិសេសនៅពេលមានអារម្មណ៍ថាខឹង គួរតែសរសេរអំពីអ្វី ដែលលោកអ្នកចង់និយាយកំឡុងពេលកំពុងតែខឹង។ ការសរសេរចុះ មិនត្រឹមតែជួយឱ្យខ្លួនឯងមានការពិចារណា និងបន្ថយភាពខឹងសម្បារនោះទេ ប៉ុន្តែក៏ជាការជៀសកុំឱ្យប្រើប្រាស់ពាក្យអសុរោះ ឬក៏ពាក្យដែលប៉ះពាល់ដល់ការផ្សារភ្ជាប់ទំនាក់ទំនងនោះដែរ។ ហើយបើនៅតែមិនបាត់ខឹងសម្បារ ក៏មិនអីដែរ អាចបន្តជជែកជាមួយភាគីម្ខាងទៀត ប៉ុន្តែតាមរយៈការសរសេរយ៉ាងហោចណាស់ ក៏បានគិត ដែលជាការរួមចំណែកកាត់បន្ថយអាការស្តាយក្រោយ ឬបន្ថយសកម្មភាពការនិយាយទាំងកំហឹងជាដើម៕
