ក្រោយ​ពី​រដ្ឋាភិបាលចិន​បើក​ប្រទេស​ឡើងវិញ ជា​ការកត់សម្គាល់ឃើញថា យុវជន​កម្ពុជា​ជាច្រើន​មានចំណាប់អារម្មណ៍​ជា​ខ្លាំង​ក្នុង​ការ​បន្ត​សិក្សា​នៅ​ប្រទេសចិន តាមរយៈ​ការ​ប្រឡង​ប្រជែង​ទទួលបានអាហារូបករណ៍ និង​ការ​ស្នើ​សុំ​អាហារុបករណ៍​តាម​អនឡាញ​ទៅ​កាន់សាលា​ផ្ទាល់។ នេះជា​ការ​លើក​ឡើង​របស់ កញ្ញា ហោ រស្មី ប្រធាន​សមាគមនិស្សិតកម្ពុជា​ប្រចាំប្រទេសចិន អាណត្តិទី៦ ក្នុង​កិច្ចប្រជុំស្តីពី «ការណែនាំក្នុងការរៀបចំឯកសារអាហារូបករណ៍ ការជ្រើសរើសជំនាញ និងសាកលវិទ្យាល័យល្បីៗនៅប្រទេសចិន ដើម្បីបន្តការសិក្សានៅប្រទេសចិន ឆ្នាំសិក្សា២០២៣-២០២៤» កាលពីពេលកន្លងទៅ។

បើតាម​ការ​លើក​ឡើង​របស់ កញ្ញា រស្មី បច្ចុប្បន្ននេះ មាននិស្សិតកម្ពុជាចំនួន១០១០នាក់​កំពុងតែសិក្សា​នៅ​ខេត្ត​ក្រុង​ចំនួន២៦​ទូទាំង​ប្រទេសចិន ក្នុងនោះមាននិស្សិតថ្នាក់បណ្ឌិតចំនួន១៨នាក់ ថ្នាក់បរិញ្ញាបត្រជាន់ខ្ពស់ចំនួន ២២៣នាក់ ថ្នាក់បរិញ្ញាបត្រចំនួន៧០៧ នាក់ បរិញ្ញាបត្ររង ចំនួន៣នាក់ និងថ្នាក់ភាសាចិន ចំនួន៥៩នាក់ ដោយសម្រាប់​និស្សិតស្រីសរុបមាន​ចំនួន៤៣២នាក់ ។

កញ្ញា ហោ រស្មី បន្ថែមថា និស្សិតអាហារូបករណ៍កម្ពុជា ត្រូវចាត់ទុកថា គឺជានិស្សិតដំបូងគេដែលបានត្រឡប់ចូលប្រទេសចិនវិញមុនគេក្នុងចំណោមនិស្សិត​មក​ពី​ប្រទេស​ជាច្រើនទៀតក្រោយពីមានវិបត្តិកូវីដ-១៩ ដោយមានការជួយជ្រោមជ្រែងពីរដ្ឋាភិបាលចិន និងរាជរដ្ឋាភិបាលកម្ពុជា ។

លោក អ៊ុំ វុទ្ធទី ស្ថាបនិកនិងប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំប្រទេសចិន បាន​ឱ្យដឹងថា សម្រាប់ឆ្នាំសិក្សា​២០២៣-២០២៤ មាន​និស្សិតកម្ពុជាចំនួន៦៧រូបបានជាប់អាហារូបករណ៍ទៅសិក្សានៅប្រទេសចិននាពេលខាងមុខ ។ លោក អ៊ុំ វុទ្ធទី ក៏បានបញ្ជាក់ផងដែរថា និស្សិតកម្ពុជាទាំងអស់ដែលសិក្សានៅប្រទេសចិន ទាំងនិស្សិតអាហារូបករណ៍ និងនិស្សិតបង់ថ្លៃ សុទ្ធតែជាសមាជិក សមាជិការបស់សមាគមនិស្សិតកម្ពុជាប្រចាំសាធារណរដ្ឋប្រជាមានិតចិន ប្រៀបបាននឹងរស់នៅក្នុងផ្ទះតែមួយ គ្រួសារខ្មែរតែមួយ ដែលចាំបាច់ត្រូវការសាមគ្គីភាព និងឯកភាពផ្ទៃក្នុងរឹងមាំ ដើម្បីអនាគតខ្លួនឯង គ្រួសារ និងសង្គមជាតិ ។

ជាមួយ​គ្នា​នេះ លោក អ៊ុំ វុទ្ធទ្ធី ក៏​បានធ្វើ​ការ​ណែនាំអំពីពីការជ្រើសរើសជំនាញ និងការជ្រើសរើសសាកលវិទ្យាល័យល្បីៗទៅតាមជំនាញទូទាំងប្រទេសចិនដល់និស្សិតឱ្យដាក់ពាក្យទៅសិក្សា ជាពិសេសខាងសមាគមន៍ណែនាំសាកលវិទ្យាល័យនៅទីក្រុងប៉េកាំង ទីក្រុងសៀងហៃ ទីក្រុងធានជីន ទីក្រុងគ័នចូវ និងខេត្តក្រុងផ្សេងៗមួយចំនួនទៀត ។ លោក វុទ្ធទ្ធី ក៏​បានណែនាំដល់បេក្ខជនពីការ​តម្រូវឱ្យបំពេញឯកសារ CSC តាមOnline ដែលជាការដាក់ពាក្យចូលក្នុងសាកលវិទ្យាល័យនៅប្រទេសចិនក្រោយជាប់ជាបេក្ខភាពអាហារូបករណ៍របស់ក្រសួងអប់រំ យុវជន និងកីឡា ។

ក្នុងនោះ​បេក្ខជនត្រូវត្រៀមឯកសារចាំបាច់មួយចំនួនដូចជា Recommendation Letter ២ច្បាប់ (ចេញពីលោកគ្រូ អ្នកគ្រូនៅសាលាឬសាកលវិទ្យាល័យដែលបានរៀន) លិខិតថ្កោលទោស សញ្ញាបត្រមធ្យមសិក្សាទុតិយភូមិសម្រាប់ថ្នាក់បរិញ្ញាបត្រ និងសញ្ញាបត្របរិញ្ញាបត្រសម្រាប់ថ្នាក់បរិញ្ញាបត្រជាន់ខ្ពស់ ប្រតិបត្តិពិន្ទុ លិខិតបញ្ជាក់សុខភាព និងគម្រោងសិក្សារបស់បេក្ខជនជាដើម ៕