ក្រសួងអប់រំ យុវជន និងកីឡា កាលពីពេលថ្មីៗនេះ បានដាក់​ឱ្យ​ដំណើរការ​ប្រព័ន្ធអេកូស៊ីសស្តែម​អប់រំបែបឌីជីថល ក្រោម​ការ​គាំទ្រ​ពី​ក្រសួងប្រៃសណីយ៍ និង​ទូរគមនាគមន៍ ក៏​ដូចជា​អង្គការ JICA, UNICEF ក៏​ដូចជា​អង្គការ UNESCO ដោយ​រំពឹងថា ប្រព័ន្ធមួយ​នេះ នឹងជួយ​ដល់កំណែទម្រង់​គ្រូ​បង្រៀនផ្សារ​ភ្ជាប់​ទៅ​នឹង​ការ​រីកចម្រើន​ផ្នែក​បច្ចេកវិទ្យាឌីជីថល។

បើតាម​សេចក្តីប្រកាស​របស់ក្រសួងអប់រំ យុវជន និងកីឡា ប្រព័ន្ធអេកូស៊ីសស្តែមអប់រំ​បែប​ឌីជីថល ជា គម្រោងនៃកិច្ច​សហប្រតិបត្តិការរវាង​ក្រសួងអប់រំ ជាមួយ​នឹង​ក្រសួងប្រៃសណីយ៍ និង​ទូរគមនាគមន៍ លើការបង្កេីតនិងប្រតិបត្តិការថ្នាលអប់រំ​ដោយប្រេី​ប្រាស់​បច្ចេកវិទ្យា​គមនាគមន៍​ព័ត៍មាន​ និង​ប្រព័ន្ធ​ផ្សព្វផ្សាយ។ គម្រោង​មួយ​នេះ គឺដើម្បី​ធ្វើ​ទំនើបកម្ម កម្មវិធីអប់រំទាំង​នៅ​កម្រិតចំណេះដឹងទូទៅ និង​នៅ​គ្រឹះស្ថាន​បណ្តុះបណ្តាល​គ្រូបង្រៀន​នៅ​កម្ពុជា ឱ្យ​ឆ្លើយតប​ទៅនឹង​បរិវត្តកម្មឌីជីថល ស្រប​តាម​យុទ្ធសាស្រ្ត​បញ្ចកោណដំណាក់កាលទី១ នៃរាជរដ្ឋាភិបាល​កម្ពុជា នីតិកាលទី៧។

លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា មានប្រសាសន៍ថា​ គម្រោងនៃកិច្ចសហប្រតិបត្តិការនេះ​ គឺ​ពិត​ជា​មាន​សារៈសំខាន់​ដែល​មិន​អាច​ខ្វះ​បាន​ ដែលជា​ចលករ​ជំរុញ​ល្បឿន​អប់រំ​តាម​បែប​ឌីជីថល​ បង្កើន​ប្រសិទ្ធភាព​សិក្សា​តាម​រយៈ​ការ​ប្រើ​ប្រាស់​បច្ចេកវិទ្យា​ឱ្យ​កាន់​តែ​សកម្ម​ ឆ្លើយ​តប​បរិបទ​តំបន់​ និង​សាកល​លោកនាពេលបច្ចុប្បន្ន​។

ឯកឧត្តម សិត សេង នាយកវិទ្យាស្ថាន​គរុកោសល្យរាជធានីភ្នំពេញ មានប្រសាសន៍ថា តាមរយៈការប្រើប្រាស់ប្រព័ន្ធអេកូស៊ីសស្តែមអប់រំបែបឌីជីថលនេះ នឹងជួយដល់គ្រូឧទ្ទេស និងគរុសិស្សបង្កើតទំនាក់ទំនងជំនាញ ប្រើប្រាស់បច្ចេកវិទ្យាឌីជីថល អភិវឌ្ឍមេរៀនឌីជីថល បង្កើតសមត្ថភាពបញ្ញា ការគិតវិភាគស៊ីជម្រៅប្រកបដោយបំណិនសតវត្សទី២១។

បច្ចុប្បន្ន ប្រពន្ធនេះ មានវីដេអូសរុបចំនួន ១៨៥ ដែលត្រូវ​ផលិតឡើងដោយ គ្រូឧទ្ទេស និងក្រុមការងារ EBC ដោយបានរៀបចំជាប្រព័ន្ធគ្រប់គ្រងសិក្សាបែបឌីជីថល គ្របដណ្ដប់លើមុខវិជ្ជាសរុបចំនួន ៣២មុខវិជ្ជាចាប់ពីឆ្នាំទី១ ដល់ឆ្នាំទី៤ សម្រាប់កម្មវិធីអប់រំគ្រូបង្រៀនកម្រិតថ្នាក់បរិញ្ញាបត្រ គ្រូបង្រៀនកម្រិតបឋមសិក្សា និងកម្រិតមូលដ្ឋាន។

យ៉ាងណាក៏ដោយ ដើម្បីជាការលើក​កម្ពស់​គុណភាពអប់រំ​នៅ​គ្រប់កម្រិតសិក្សា ជាពិសេស​កំណែទម្រង់​គ្រឹះស្ថាន​បណ្តុះបណ្តាលគ្រូ លោកជំទាវ គឹម សេដ្ឋានី បានផ្តល់ជូន​នូវ​សមាសភាពចំនួន៦ ដែលជាធាតុដ៏ចាំបាច់ក្នុង​ការ​ធានា​បាន​នូវ​ប្រសិទ្ធភាព​ និង​គុណភាព​ខ្ពស់នៃ​ការ​បណ្ដុះ​បណ្ដាល​គ្រូបង្រៀន​នៅ​កម្ពុជា រួមមាន ៖ (១).​ ការកែ​លម្អ​កម្មវិធី​បណ្ដុះ​បណ្ដាល​ និងវិក្រឹត្យការគ្រូបង្រៀន​ (២).​ ការអភិវឌ្ឍវិជ្ជាជីវៈ​គ្រូ​ឧទ្ទេសខាងផ្នែកខ្លឹមសារ​មេរៀន​ គរុកោសល្យ​ និងវិធីសាស្ត្រ​បង្រៀន​សម្បូរ​បែប​ និង​ការ​ប្រើប្រាស់​បច្ចេកវិទ្យា​ ឌីជីថល​និង​AI​ ក្នុង​ការ​បង្រៀន​ (៣).​ ការអភិវឌ្ឍហេដ្ឋា​រចនាសម្ព័ន្ធ​ស្របតាមបច្ចេកវិទ្យា​ថ្មី​ៗ​ មន្ទីរ​ពិសោធន៍​ និងបណ្ណាល័យទំនើប​ (៤).​ ការ​អភិវឌ្ឍ​ភាព​ជា​អ្នក​ដឹកនាំ​ និងគ្រប់គ្រង​ (៥).​ ការ​ផ្សារ​ភ្ជាប់​ទ្រឹស្ដី​ទៅនឹង​ការ​អនុវត្ត​កម្មវិធី​គរុកោសល្យ​ និង ​(៦).​ ការធានា​គុណភាព​នៃ​ការ​បណ្ដុះ​បណ្ដាល៕