បច្ចុប្បន្នពិភពលោកបានទទួលស្គាល់ថា អ៊ីស្រាអ៊ែលជាប្រទេសមួយដែលបានអភិវឌ្ឍន៍វិស័យកសិកម្មរីកចម្រើនគួរឱ្យកត់សម្គាល់ ព្រមទាំងបានបង្កើតទំនើបកម្មកសិកម្មជាច្រើន ។ វិស័យកសិកម្មមិនត្រឹមតែជាផលិតកម្មស្បៀងអាហារជួយដល់សេដ្ឋកិច្ចប្រជាជនអ៊ីស្រាអ៊ែលប៉ុណ្ណោះទេ វិស័យមួយនេះក៏កំពុងក្លាយជាមុខវិជ្ជាសិក្សាដ៏សំខាន់សម្រាប់និស្សិតក្នុងប្រទេស និងនិស្សិតពីក្រៅប្រទេសធ្វើដំណើរទៅសិក្សាជំនាញកសិកម្មផងដែរ ។ តើហេតុអ្វីបានជាប្រទេសអ៊ីស្រាអ៊ែលខ្លាំងខាងវិស័យកសិកម្ម និងអប់រំកសិកម្ម ? ខាងក្រោមនេះជាមូលហេតុទាំង ១០ចំណុចដែលបង្ហាញពីសក្តានុពលវិស័យកសិកម្មរបស់អ៊ីស្រាអ៊ែល ។

១. បរិបទប្រវត្តិសាស្ត្រ ៖ អ៊ីស្រាអ៊ែលមានប្រវត្តិអភិវឌ្ឍន៍កសិកម្មតាំងពីដើមសតវត្សទី២០ ។ អ្នកដឹកនាំប្រទេសនេះបានកំណត់ទស្សនៈវិស័យលើកកម្ពស់កសិកម្មជាអាទិភាពក្នុងការអភិវឌ្ឍន៍សង្គម និងសេដ្ឋកិច្ច ។ ជាបន្តបន្ទាប់ អ៊ីស្រាអ៊ែលបានខិតខំប្រែក្លាយដីដែលស្ងួតហួតហែងទៅជាផ្ទៃដីដាំដុះដ៏រស់រវ៉ើកឡើងវិញ និងបង្កើតបច្ចេកទេសកសិកម្មប្រកបដោយភាពច្នៃប្រតិដ្ឋ និងចាត់ទុកគំនិតច្នៃប្រតិដ្ឋជាមូលដ្ឋានគ្រឹះសម្រាប់ការអនុវត្តកសិកម្មទំនើប ។

២. អ៊ីស្រាអ៊ែលមានជំនាញគ្រប់គ្រងទឹក ៖ អ៊ីស្រាអ៊ែលប្រឈមមុខនឹងការខ្វះខាតទឹកដោយសារប្រទេសនេះស្ថិតនៅតំបន់អាកាសធាតុស្ងួត និងពាក់កណ្តាលស្ងួត។ ជាការឆ្លើយតបចំពោះដំណោះស្រាយបញ្ហាទឹក ប្រទេសនេះបានបានកែច្នៃប្រព័ន្ធធារាសាស្ត្រទំនើប និងបច្ចេកវិទ្យាក្នុងការគ្រប់គ្រងទឹកបានយ៉ាងប្រសើរ ។ គេបានចាត់ទុកនយោបាយទឹកជាស្នូលនៃវិស័យកសិកម្ម និងជាអាទិភាពដែលត្រូវអភិវឌ្ឍន៍ ។ ការគ្រប់គ្រងធនធានទឹកបានល្អនេះ ជាកត្តាសំខាន់ជួយដល់វិស័យកសិកម្មទោះបីពិភពលោកប្រឈមនឹងបញ្ហាប្រែប្រួលអាកាសធាតុយ៉ាងណាក្តី ។

៣. ការស្រាវជ្រាវ និងនវានុវត្តន៍ ៖ អ៊ីស្រាអ៊ែលបានយកចិត្តទុកដាក់យ៉ាងខ្លាំងលើការស្រាវជ្រាវ និងការអភិវឌ្ឍក្នុងវិស័យកសិកម្ម ។ ស្ថាប័នដូចជា សាកលវិទ្យាល័យ Hebrew of Jerusalem មជ្ឈមណ្ឌលស្រាវជ្រាវ Volcani Center និងមជ្ឈមណ្ឌលស្រាវជ្រាវកសិកម្មអ៊ីស្រាអ៊ែល (IARO) ជាដើម តែងស្រាវជ្រាវទំនើបកម្មកសិកម្មជាប្រចាំ ដើម្បីកែលម្អទិន្នផលដំណាំ អភិវឌ្ឍបច្ចេកវិទ្យាថ្មីៗ និងដោះស្រាយបញ្ហាប្រឈមផ្នែកកសិកម្ម ។

៤. ផ្តោតការអភិវឌ្ឍកសិកម្មច្បាស់លាស់ ៖ អ៊ីស្រាអ៊ែលស្ថិតនៅជួរមុខនៃប្រទេសកសិកម្មមានភាពច្បាស់លាស់ ដោយសារប្រទេសនេះបានចំណាយហិរញ្ញវត្ថុជាច្រើនពង្រឹងគុណភាពបច្ចេកវិទ្យាកសិកម្ម ដូចជា ឧបករណ៍ចាប់សញ្ញាស្វ័យប្រវត្តិលើដំណាំ យន្តហោះគ្មានមនុស្សបើកបម្រើដល់ការស្រោចស្រព និងការប្រើប្រាស់បច្ចេកវិទ្យាវិភាគទិន្នន័យផ្សេងៗដើម្បីបង្កើនប្រសិទ្ធភាពការអនុវត្តកសិកម្ម ។

៥. ប្រព័ន្ធអប់រំដាក់បញ្ចូលចំណេះដឹងកសិកម្ម ៖ ប្រព័ន្ធអប់រំកម្រិតឧត្តមសិក្សារបស់អ៊ីស្រាអ៊ែលដែលបណ្តុះបណ្តាលលើការងារកសិកម្ម រួមទាំងសាកលវិទ្យាល័យកសិកម្ម និងស្ថាប័នស្រាវជ្រាវនានា បានពង្រឹងជំនាញវិទ្យាសាស្ត្រកសិកម្ម និងផ្នែកពាក់ព័ន្ធនឹងវិស័យកសិកម្មក្នុងកម្មវិធីសិក្សារបស់ខ្លួន ។ ស្ថាប័នទាំងនោះផ្តល់ឱ្យនិស្សិតនូវមូលដ្ឋានគ្រឹះចំណេះដឹងដ៏រឹងមាំនៅក្នុងវិទ្យាសាស្ត្រកសិកម្ម និងបច្ចេកវិទ្យា ។ ជារួមស្ថាប័នបណ្តុះបណ្តាលមានគោលដៅតែមួយគត់ពង្រឹងគុណភាពអប់រំរបស់និស្សិតតាមរយៈការស្រាវជ្រាវ និងបណ្តុះបណ្តាល ។

៦. ការគាំទ្រពីរដ្ឋាភិបាល ៖ រដ្ឋាភិបាលអ៊ីស្រាអ៊ែលបានគាំទ្រយ៉ាងខ្លាំងដល់ការអភិវឌ្ឍន៍កសិកម្មតាមរយៈគោលនយោបាយ ការផ្តល់មូលនិធិ និងគំនិតផ្តួចផ្តើមផ្សេងៗ ។ ការគាំទ្រនេះរួមបញ្ចូលទាំងការវិនិយោគលើការស្រាវជ្រាវ ហេដ្ឋារចនាសម្ព័ន្ធ និងការផ្ទេរបច្ចេកវិទ្យាកសិកម្មដល់កសិករ ។

៧. ស្មារតីសហគ្រិនកសិកម្ម ៖ រដ្ឋាភិបាលអ៊ីស្រាអ៊ែលមានវប្បធម៌លើកទឹកចិត្តសហគ្រិនភាព និងការច្នៃប្រតិដ្ឋក្នុងវិស័យកសិកម្ម ។ ស្មារតីនេះបានចូលរួមពង្រីងគោលដៅកសិករ និងអ្នកស្រាវជ្រាវឱ្យសហការគ្នាអនុវត្តបច្ចេកវិទ្យាថ្មីៗ និងវិធីសាស្រ្តធ្វើកសិកម្មដែលមានភាពជាម្ចាស់ ឬកសិករដែលមានផ្នត់គំនិតជាសហគ្រិន ។

៨. កិច្ចសហប្រតិបត្តិការអន្តរជាតិ ៖ អ៊ីស្រាអ៊ែលកំពុងចូលរួមយ៉ាងសកម្មក្នុងកិច្ចសហការអន្តរជាតិ និងភាពជាដៃគូក្នុងការស្រាវជ្រាវ និងអភិវឌ្ឍន៍កសិកម្ម ។ ប្រទេសនេះបានអនុញ្ញាតឱ្យមានការផ្លាស់ប្តូរចំណេះដឹង និងអនុវត្តការងារកសិកម្មដល់សិក្ខាកាម និងសិស្សនិស្សិតមកសិក្សាស្វែងយល់ពីជុំវិញពិភពលោក ។ បច្ចុប្បន្នអ៊ីស្រាអ៊ែលបានផ្តល់អាហារូបករណ៍ និងផ្តល់ឱកាសចុះកម្មសិក្សាជាច្រើនដល់និស្សិតអន្តរជាតិ ។

៩. វិស័យកសិកម្មចម្រុះ ៖ វិស័យកសិកម្មរបស់អ៊ីស្រាអ៊ែលមានភាពចម្រុះ ហើយផ្ទៃដីភាគច្រើនគ្របដណ្តប់ដោយដំណាំកសិកម្ម បសុសត្វ និងសកម្មភាពកសិឧស្សាហកម្មជាច្រើន។ ភាពចម្រុះនេះអនុញ្ញាតឱ្យមានការអប់រំ និងការស្រាវជ្រាវយ៉ាងទូលំទូលាយអំពីព័ត៌មានពាក់ព័ន្ធនឹងវិស័យកសិកម្ម ។

១០. ជោគជ័យក្នុងការសម្របខ្លួនទៅនឹងបញ្ហាប្រឈមអាកាសធាតុ ៖ អ៊ីស្រាអ៊ែលមានបទពិសោធន៍ខ្ពស់ក្នុងការបន្សាំខ្លួនគ្រប់គ្រងការដាំដុះស្របតាមលក្ខខណ្ឌអាកាសធាតុស្ងួតហួតហែង និងពាក់កណ្តាលស្ងួត ដោយប្រើប្រាស់បច្ចេកវិទ្យាទំនើប និងកំណត់ទីតាំងដំណាំតាមភូមិសាស្ត្រច្បាស់លាល់ និងមិនងាយទទួលរងហានិភ័យពីការប្រែប្រួលអាកាសធាតុ ។

គួរបញ្ជាក់ថា តាមរយៈការប្តេជ្ញាចិត្តចំពោះការស្រាវជ្រាវ និងការច្នៃប្រតិដ្ឋរបស់អ្នកសិក្សាលើវិស័យកសិកម្ម ព្រមទាំងមានការគាំទ្រពីរដ្ឋាភិបាលលើគម្រោងនានាពាក់ព័ន្ធនឹងកសិកម្ម ប្រទេសអ៊ីស្រាអ៊ែលកំពុងធ្វើដំណើរលើវិថីកសិកម្មយ៉ាងលឿនរហ័ស និងបានក្លាយជាប្រទេសផ្តល់ការអប់រំលើការងារកសិកម្មឈានមុខមួយធៀបនឹងបណ្តាប្រទេសសេដ្ឋកិច្ចជឿនលឿនក្នុងពិភពលោកឯទៀត ។ កសិកម្មមិនត្រឹមតែផ្តល់នូវធនធានស្បៀងប៉ុណ្ណោះទេ ប៉ុន្តែកសិកម្មនៅអ៊ីស្រាអ៊ែលជាផ្នែកនៃដង្ហើមនៃសេដ្ឋកិច្ចជាតិ និងការអភិវឌ្ឍន៍វិស័យនានាផងដែរ៕