ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – លើកឡើងនៅក្នុងពិធីសម្ពោធពិព័រណ៍លក់សៀវភៅ «Big Bad Wolf Cambodia» នៅផ្សារទំនើបអូឡាំព្យា កាលពីពេលថ្មីៗនេះ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន មានប្រសាសន៍ថា បើទោះបច្ចុប្បន្នជាសម័យជឿនលឿន នៃបច្ចេកវិទ្យាអេឡិចត្រូនិកក្តី ប៉ុន្តែសៀវភៅដែលបោះពុម្ព គឺនៅតែមានសារៈប្រយោជន៍សម្រាប់អ្នកអានជានិច្ច។
ឯកឧត្តមរដ្ឋមន្រ្តីបញ្ជាក់ថា ប្រសិនបើយើងអានសៀវភៅអេឡិចត្រូនិក នោះយើងអាចនឹងពិបាកគូស តែបើសៀវភៅបោះពុម្ព គឺងាយស្រួល ដោយគ្រាន់តែគូស ឬបិទស្ទីកឃ័រ នោះគឺយើងអាចបើកអានសៀវភៅស្រួល និងភ្លាមៗ , ដូច្នេះសៀវភៅមានប្រយោជន៍ខ្លាំង មិនថាសម័យនេះ ជាសម័យអេឡិចត្រូនិចខ្លាំង ហើយថា សៀវភៅអត់ប្រយោជន៍នោះ គឺមិនពិតនោះទេ។
ឯកឧត្តម ខៀវ កាញារីទ្ធ ក៏បានលើកឡើងដែរថា បច្ចុប្បន្នយុវជនកម្ពុជាមានឱកាសបានមើល និងអានសៀវភៅបានច្រើន ខុសគ្នាកាលពីឆ្នាំ១៩៨០ ឬ១៩៩០ ដែលមនុស្សមានការអានសៀវភៅតិច។ ឯកឧត្តមបន្តថា ការអានតិចនេះ គឺដោយសារតែសម័យនោះគ្មានសៀវភៅសម្រាប់អាន និងពេលនោះប្រជាពលរដ្ឋរវល់នឹងការរកស៊ីចិញ្ចឹមជីវិត ប៉ុន្តែសម័យនេះ យុវជន ក្មេងៗ ចូលចិត្តអានសៀវភៅ ហើយសៀវភៅក៏សំបូរបែប និងបោះពុម្ពស្អាត មានខ្លឹមសារល្អទៀត។
តាមការអះអាងរបស់រដ្ឋមន្ត្រីក្រសួងព័ត៌មាន ការអានសៀវភៅ គឺធ្វើឱ្យមនុស្សមានការចងចាំច្រើនជាងការមើលទូរទស្សន៍ គឺដោយសារ ៣០ភាគរយនៃអាន និង៧០ភាគរយវិភាគ ដែលជាហេតុធ្វើឱ្យខួរក្បាលមានការវិត្តន៍លឿន។
ឯកឧត្តម ខៀវ កាញារីទ្ធ
“ការអានសៀវភៅគឺជាការចាំបាច់ណាស់ ដែលយើងមិនត្រូវ ចោលនោះទេ យើងអានអ្វីក៏ដោយឱ្យតែអាន។ ពេលនេះវិបត្តិលើពិភពលោកគឺការមើលលេង TikTok ផងដែរ”
ចំណែកលោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំយុវជន និងកីឡា ក៏បានលើកឡើងដែរថា សៀវភៅគឺជាស្ពាន ចំណេះគឺជាយាន្ត សម្រាប់ឱ្យយើង ធ្វើដំណើរទៅកាន់ភាពជោគជ័យ។
បើតាមលោកជំទាវ ទន់ សាអ៊ីម យុវជនយើងគួរតែយកចិត្តទុកដាក់ចំពោះសៀវភៅ ដោយសារតែនៅតាមបណ្តាប្រទេសណាក៏ដោយ ក៏ត្រូវការមានធនធានមនុស្សដែលមានចំណេះដឹង, ផ្ទុយទៅវិញ បើចំណេះមិនបានមកពីការសិក្សានោះទេ តើបានមកពីណា ? តាមការបញ្ជាក់របស់លោកជំទាវ ការសិក្សាមានច្រើន គឺតាមការអាន ការមើល ការស្តាប់ជាដើម ដូច្នេះសៀវភៅគឺជាទុនដែលធ្វើការបណ្តុះចំណេះបន្ថែមទៀតផងដែរ៕
