ការបង្កើតបរិយាកាសសិក្សា ឬការជ្រើសរើសទីតាំងរៀនសូត្រ ជាកត្តាមួយក្នុងចំណោមកត្តាជាដទៃទៀត ដើម្បីជំរុញការសិក្សា ក៏ដូចជាការបង្កើនប្រសិទ្ធភាពនៃការសិក្សា និងភាពច្នៃប្រតិដ្ឋ។ តើការរៀបចំកន្លែងសិក្សាបែបណាទើបផ្តល់ប្រសិទ្ធភាពបន្ថែម? ហើយថា តើបរិយាកាសនៅក្នុងបន្ទប់សិក្សាគួរមានអ្វីខ្លះ និងកាត់បន្ថយអ្វីខ្លះ ទើបទទួលបាននូវការបំផុសគំនិត និងការជំរុញទឹកចិត្តឱ្យផ្សារភ្ជាប់ជាមួយនឹងការសិក្សា?

តាមរយៈគេហទំព័រ University of St. Augustine for Health Sciences បានបង្ហាញគន្លឹះមួយចំនួនក្នុងការបង្កើតបរិយាសកាមួយដែលជំរុញទឹកចិត្តសិស្សឱ្យចង់រៀនសូត្រ ឬក៏ការបង្កើនផលិតភាពនៃការសិក្សា ៖

រៀបចំបរិយាកាស ៖ ជាការពិត ប្រសិទ្ធភាពនៃការសិក្សាមានច្រើនប្រភេទ ប៉ុន្តែហេតុអ្វីបានជាការរៀបចំកន្លែងឱ្យបានល្អគួរចាត់ទុកជាចំណុចចាប់ផ្តើមដំបូង? ព្រោះបរិយាកាសជាអ្វីដែលនៅក្បែរខ្លួនជាងគេ ជាពិសេសនោះគឺបរិយាកាសផ្ទាល់ខ្លួននេះតែម្តង។ ការផ្តល់អាទិភាពក្នុងការរៀចំ មិនត្រឹមតែជាការជំរុញចិត្តក្នុងការសិក្សាប៉ុណ្ណោះទេ ប៉ុន្តែវាក៏ផ្តល់នូវអារម្មណ៍ល្អ និងជាកន្លែងមួយដែលទទួលបានការសម្រាកយ៉ាងពេញលេញផងដែរ ការសម្រាកនេះទៀតសោត គឺរួមបញ្ចូលទាំងគុណភាពគេង ព្រោះគេងមានភាពប្រទាក់ក្រឡាគ្នា ទៅកាន់គ្រប់ផ្នែកមិនថា ការសិក្សា ការងារ និងការប្រាស្រ័យទាក់ទង។

ការផ្លាស់ទីតាំង ៖ ត្បិតទីតាំងផ្ទាល់ខ្លួន បានរួមចំណែកក៏ពិតមែន ប៉ុន្តែការបង្កើតបាននូវភាពច្នៃប្រតិដ្ឋ និងការបង្កើនប្រសិទ្ធភាព ក៏ត្រូវការភាពខុសប្លែកពីសព្វមួយដងដែរ ដូចនេះការផ្លាស់ប្តូរទីតាំងដែលមានភាពខុសប្លែកគ្នា មិនថាទៅហាងកាហ្វេ ឬទៅបណ្ណាល័យ ឬក៏ទីតាំងសាធារណៈណាមួយដែលជួយជំរុញការផ្តោត និងការផ្ចង់ស្មារតី។

ឧស្សាហ៍ទៅកន្លែងដែលផ្តល់នូវការផ្តោត ​៖ បន្ទាប់ពីកែច្នៃ ឬក៏សាកល្បងកន្លែងខុសៗគ្នាហើយ គួរកត់សម្គាល់ថា កន្លែងណាដែលផ្តល់ប្រសិទ្ធភាពជាងគេ មិនថានៅហាងកាហ្វេ ឬក៏នៅផ្ទះនោះទេ ប្រសិនបើរកឃើញ គួរចំណាយពេលឱ្យបានច្រើននៅទីតាំងដែលផ្តល់ប្រសិទ្ធភាពទាំងនោះឱ្យបានច្រើនជាងគេ។

ស្តាប់ភ្លេង ឬចម្រៀង ៖ តន្រ្តី ឬភ្លេង មិនត្រឹមតែកំដរអារម្មណ៍ឱ្យទទួលបានូវការកម្សាន្តប៉ុណ្ណោះទេ ប៉ុន្តែក៏បានជួយឱ្យស្មារតីមានភាពស្មឹងស្មាធិ៍ផងដែរ ប៉ុន្តែគួរស្តាប់ភ្លេងដែលជួយដល់ការរំងាប់ផ្លូវចិត្តឱ្យបានច្រើនជាងចម្រៀងដែលមានលាយឡំចម្រៀង ព្រោះវានាំឱ្យកាត់ចង្វាក់នៃការផ្តោត។

ជៀសវាងការរំខាន ៖ សម្ភារទាំងឡាយ ដែលងាយនាំចិត្តឱ្យប្រើប្រាស់ គួរតែទុកឱ្យឆ្ងាយ ឬក៏បិតចោលតែម្តង ដូចជាការបិទសម្លេងរោទ៍ទូរស័ព្ទ ការប្រើប្រាស់បណ្តាញសង្គម និងការបង្កសម្លេងរំខានមកពីមជ្ឈដ្ឋានដទៃទៀតដូចជា ទូរទស្សន៍ ការជជែកគ្នាឮៗពីអ្នកផ្ទះជាដើម។

ជ្រើសរើសអាហារសម្រន់ដោយភាពឈ្លាសវៃ ៖ ការទុកឱ្យពោះទទេ ហើយបង្កើតបានជាអាការឃ្លាន ក៏អាចនាំឱ្យបង្កការរំខានដល់ការសិក្សាបានដែរ ដូចនេះប្រសិនបើចាំបាច់ ត្រូវត្រៀមអាហារសម្រន់ គួរមានភាពឈ្លាសវៃក្នុងការជ្រើសរើស ដូចជាផ្លែឈើ ទឹកដោះគោស្រស់ ឬអាហារទាំងឡាយណាដែលរួមចំណែកដល់ការបង្កើនភាពស្រស់ស្រាយ៕