ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានបង្ហាញជំនឿថា បេក្ខនារីប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២៦ អាចមានចំនួនជាប់ច្រើនជាងបេក្ខជនប្រុស ខណៈសម្ដេចមានប្រសាសន៍ថា សម្ដេចតែងតាមដាន និងប្រៀបធៀបលទ្ធផលសិក្សារបស់សិស្សស្រី និងសិស្សប្រុសជារៀងរាល់ឆ្នាំ។
ក្នុងកិច្ចប្រជុំជាមួយប្រតិភូក្រុមប្រឹក្សាជាតិកម្ពុជាដើម្បីស្ត្រី នៅវិមានសាមគ្គីភាពនៃព្រឹទ្ធសភា នាថ្ងៃទី១៤ ខែសីហា ឆ្នាំ២០២៦ សម្ដេចតេជោ ហ៊ុន សែន បានមានប្រសាសន៍ថា សម្ដេចនឹងរង់ចាំមើលលទ្ធផលប្រឡងបាក់ឌុបឆ្នាំនេះ ដើម្បីប្រៀបធៀបចំនួនសិស្សស្រី និងសិស្សប្រុសដែលទទួលបានជោគជ័យ។
សម្រាប់ការប្រឡងថ្នាក់ទី១២ ឆ្នាំនេះ តើស្ត្រីជាប់ប៉ុន្មាន? ខ្ញុំនៅតែជឿថា ស្ត្រីនៅឆ្នាំនេះ អាចជាប់ច្រើនជាងបុរសទៀត
សម្ដេចបានបញ្ជាក់ថា សម្ដេចតែងយកចិត្តទុកដាក់តាមដានចំនួនសិស្សស្រី និងសិស្សប្រុស ដែលទទួលបាននិទ្ទេសនីមួយៗ ជាពិសេសនិទ្ទេស A។ នៅពេលចូលរួមពិធីចែកសញ្ញាបត្រតាមសាកលវិទ្យាល័យនានា សម្ដេចក៏តែងពិនិត្យមើលសមាមាត្រនិស្សិតស្រី និងនិស្សិតប្រុសផងដែរ។
លោក ទិត ប៉ារូស អគ្គលេខាធិការងប្រចាំសហព័ន្ធនិស្សិតកម្ពុជានៅបរទេស បានប្រាប់ AMS ថា ជាក់ស្តែង សិស្សស្រីភាគច្រើនខិតខំរៀនសូត្រ និងទទួលបានលទ្ធផលល្អជាងសិស្សប្រុស ដោយសារសិស្សស្រីផ្តោតលើការសិក្សាខ្លាំងជាង ខណៈសិស្សប្រុសមួយចំនួនចំណាយពេលលើការកម្សាន្ត និងការដើរលេង។
លោកបន្តថា និន្នាការដែលសិស្សស្រីខិតខំសិក្សា និងទទួលបានលទ្ធផលល្អ គឺជាសញ្ញាវិជ្ជមានសម្រាប់សង្គម ព្រោះស្ត្រីកម្ពុជាបច្ចុប្បន្នកាន់តែមានឱកាស និងសមត្ថភាពក្នុងការសិក្សា អភិវឌ្ឍជំនាញ បច្ចេកវិទ្យា និងស្វែងរកឱកាសសិក្សានៅក្រៅប្រទេស។
គួរជម្រាបថា ការប្រឡងបាក់ឌុបឆ្នាំ២០២៦ មានបេក្ខជនចូលរួមប្រឡងជាង ១៥ម៉ឺននាក់ ក្នុងនោះបេក្ខនារីមានចំនួនជាង ៨ម៉ឺននាក់។ បច្ចុប្បន្ន ដំណើរការកំណែកំពុងបន្ត ខណៈលទ្ធផលប្រឡងគ្រោងប្រកាសនៅថ្ងៃទី២ ខែកញ្ញា ឆ្នាំ២០២៦ ទូទាំងប្រទេស៕
