ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រោមបទពិសោធន៍ជាអ្នកផ្សងព្រេងឡើងភ្នំ បោះតង់ និងថតរូបជាង២០ឆ្នាំ លោក ជួន ភិរម្យ បានស្វែងយល់និងរៀនសូត្រពីភារកិច្ចជាច្រើនក្នុងការត្រៀមខ្លួននឹងឧបសគ្គផ្សេងៗ ។ ថ្មីៗនេះលោកក៏បានសម្រេចគោលដៅក្នុងការឡើងទៅកាន់តំបន់ Everest Base Camp ដែលជាតំបន់ខ្ពស់មួយសម្រាប់ភ្ញៀវទេសចរទៅកម្សាន្តដែលមានទីតាំងនៅស្ថិតនៅជួរភ្នំហិមាល័យ ។
នៅក្នុងបទពិសោធន៍ឡើងជួរភ្នំដែលមានកម្ពស់ខ្ពស់ជាងគេលើកនេះ លោក ជួន ភិរម្យ បានប្រាប់ឱ្យដឹងថា លោក និងសមាជិក៣នាក់ទៀតបានចំណាយពេល១១ថ្ងៃសម្រាប់ឡើង និងចុះមកវិញ ។ លោកបន្ថែមថា ក្នុងដំណើរផ្សងព្រេងលើជួរភ្នំហិមាល័យនេះ លោកបានទៅដល់ភ្នំដែលមានកម្ពស់ខ្ពស់ពីរគឺ ភ្នំ Kalapatther មានរយៈកម្ពស់៥៥៥០ម៉ែត្រ និង តំបន់ Everest Base Camp (EBC) មានរយៈកម្ពស់៥៣៦៤ម៉ែត្រ ។
លោក ជួប ភិរម្យ
” ខ្ញុំបានត្រៀមខ្លួន និងហ្វឹកហាត់ខ្លួនឯងក្នុងការឡើងភ្នំជាច្រើនទាំងក្នុងប្រទេស និងក្រៅប្រទេសជាង២០ឆ្នាំដើម្បីស្គាល់ពីកិច្ចការផ្សេងៗគួរធ្វើក្នុងកំឡុងពេលឡើងភ្នំ”
អ្នកផ្សងព្រេងបោះតង់រូបនេះបន្តថា ការឡើងភ្នំលើកនេះបានបន្ថែមបទពិសោធន៍ថ្មីៗជាច្រើនដល់លោកដូចជា បច្ចេកទេសក្នុងការឡើងភ្នំដែលមានកម្ពស់ខ្ពស់ ការថែរក្សានិងរៀបចំស្បៀងសម្រាប់រយៈពេលយូរ របៀបសម្របខ្លួនឱ្យស៊ាំនឹងអាកាសធាតុដែលត្រជាក់ខ្លាំងនិងបរិស្ថានជុំវិញខ្លួនក្នុងការប្រើកម្លាំងច្រើន ការប្រយ័ត្នខ្លួនក្នុងឧបសគ្គផ្សេងៗនៅពេលធ្វើដំណើរ ការចំណាយទិញសេវាកម្មផ្សេងៗនៅលើកំពូលភ្នំជាដើម ។
លើសពីនេះលោកបានចាប់អារម្មណ៍ទៅលើសេវាកម្មដែលខាងសហគមន៍នៅតំបន់នោះមានសម្រាប់ភ្ញៀវទេសចរដូចជា សេវាកម្មប្រើប្រាស់អ៊ីនធើណិតនៅលើភ្នំ កន្លែងសេវាកម្មងូតទឹក និងហាងអាហារជាដើមប៉ុន្តែនៅកន្លែងតំបន់កាន់តែខ្ពស់តម្លៃនៃសេវាកម្មទាំងនោះកាន់តែថ្លៃ ។ ជាមួយគ្នានេះ អ្នកនាំផ្លូវភ្នំ ឬហៅថា mountain guider មានជំនាញច្បាស់លាស់ក្នុងការណែនាំ និងមើលថែភ្ញៀវទេសចរបានយ៉ាងល្អប្រសើរដែលអាចធ្វើឱ្យយើងមានភាពកក់ក្ដៅ និងទុកចិត្ត។
ជាមួយគ្នានេះ លោក ជួន ភិរម្យ បានលើកឡើងថា ការឡើងភ្នំក៏ជាកីឡាមួយប្រភេទជួយដល់សុខភាពរាងកាយឱ្យកាន់តែរឹងមាំ បន្ថែមថាមពលផ្លូវចិត្តឱ្យកាន់តែរីករាយ និងអត្ថប្រយោជន៍ផ្សេងៗផងដែរ ។ ប្រសិនបើអ្នកស្រលាញ់វិស័យបោះតង់ ឡើងភ្នំមានបំណងចង់ឡើងភ្នំដែលមានកម្ពស់ខ្ពស់ត្រូវពង្រឹងសមត្ថភាពរាងកាយឱ្យបានមាំមួនតាមរយៈការហាត់ប្រាណ ចាប់ផ្ដើមឡើងភ្នំនៅក្នុងប្រទេសឱ្យបានច្រើនគួរសមសិនមុនឡើងភ្នំដែលមានកម្ពស់ខ្ពស់ និងដើម្បីទទួលបានបទពិសោធន៍ក្នុងការរៀបចំទុកដាក់សម្ភារៈផ្សេងៗ ។
លោក ជួន ភិរម្យ
“បញ្ហាពុលភ្នំ ដែលបណ្ដាលមកពីសម្ពាធភ្នំជាអ្វីដែលអ្នកឡើងភ្នំបានជួប ដូចនេះរាងកាយរឹងមាំ និងការដឹងពីរបៀបបន្ស៊ាំខ្លួនឱ្យបានល្អជាតួនាទីចាំបាច់ដែលអ្នកឡើងភ្នំ និងអ្នកនាំផ្លូវត្រូវយកចិត្តទុកដាក់”
គួរបញ្ជាក់ដែរថា លោក ជួន ភិរម្យ ជាអ្នកចូលចិត្តថតរូប និងធ្វើដំណើរផ្សងព្រេងក្នុងប្រទេសក្រៅប្រទេសដូចជាប្រទេសម៉ាឡេស៊ី ឥណ្ឌូណេស៊ីជាដើមដែលមានរយៈពេលជាង២០ឆ្នាំ ៕
