កម្មវិធី Meet & Greet with Mony បានត្រឡប់មកវិញម្ដងទៀតក្នុងលើកទី៦ ដោយជោគជ័យកាលពីថ្ងៃទី ១៣ ខែកញ្ញា ឆ្នាំ ២០២៦ ដែលជាកម្មវិធីមួយទទួលបានការគាំទ្រពីសំណាក់សិស្សានុសិស្សជាច្រើននាក់ ដោយក្នុងនោះមានចំនួនអ្នកចូលរួមជាង ១៥០ នាក់ រួមមានសិស្សានុសិស្សដែលទើបបញ្ចប់ថ្នាក់សិក្សាកម្រិតមធ្យមសិក្សាទុតិយភូមិ ដែលទទួលបាននិទ្ទេស A, B និង C មកពីបណ្ដាខេត្តក្រុងនានាក្នុងប្រទេស នៅឯមជ្ឈមណ្ឌល AmCam Exchange។

សិស្សានុសិស្សទាំងអស់ត្រូវបានជ្រើសរើសយ៉ាងសម្រិតសម្រាំងតាមរយៈ Bamnang App ចេញពីបេក្ខជនដាក់ពាក្យយ៉ាងច្រើនសន្ធឹកសន្ធាប់ពីគ្រប់ទិសទី ដែលពួកគេបានចំណាយពេលពេញមួយថ្ងៃក្នុងការស្វែងយល់ពីគន្លឹះសិក្សាក្នុងថ្នាក់ឧត្តមសិក្សា ការដាក់អាហារូបករណ៍ក្នុង និងក្រៅប្រទេស ព្រមទាំងការយល់ដឹងពីឱកាសការងារក្នុងសេដ្ឋកិច្ចឌីជីថលដែលកំពុងរីកចម្រើននៅកម្ពុជាផងដែរ។ កម្មវិធី Meet & Greet with Mony 2026 ទទួលបានការទទួលស្គាល់ និងគាំទ្រយ៉ាងពេញទំហឹងពី៖
● ក្រសួងអប់រំ យុវជន និងកីឡា (MoEYS)
● ក្រសួងប្រៃសណីយ៍ និងទូរគមនាគមន៍ (MPTC)
● ស្ថានទូតអាមេរិកប្រចាំកម្ពុជា (U.S. Embassy Phnom Penh)
● អង្គការ EducationUSA
● មជ្ឈមណ្ឌល AmCam Exchange
● GooShop Cambodia
● ព្រមទាំងដៃគូសារព័ត៌មានជាច្រើនទៀត

កម្មវិធីនេះត្រូវបានបង្កើតឡើងដំបូងក្នុងឆ្នាំ ២០២០ ដោយ កញ្ញា សេង រ័ត្នសេដ្ឋាមុនី ដែលជាសហស្ថាបនិក និងជាអគ្គនាយិកាប្រតិបត្តិ (Co-Founder and CEO) នៃក្រុមហ៊ុន Bamnang។ កម្មវិធីនេះបានចាប់ផ្ដើមពីចំណុចតូចមួយ រហូតក្លាយជាវេទិកាដ៏សំខាន់ក្នុងការផ្ដល់ជូននូវឱកាសបង្កើតទំនាក់ទំនងថ្មីៗ ឱកាសទទួលបានអាហារូបករណ៍ និងការទទួលបានចំណេះដឹងល្អៗតាមរយៈការចែករំលែកបទពិសោធន៍ពីវាគ្មិនកិត្តិយស ដែលដើរតួជាស្ពានចងភ្ជាប់វិស័យអប់រំ បច្ចេកវិទ្យា និងសហគ្រិនភាពនៅកម្ពុជាទៅកាន់យុវជនគ្រប់រូប។ ទន្ទឹមនឹងនេះ ព្រឹត្តិការណ៍នាឆ្នាំនេះពិតជាមានប្រទាក់ក្រឡាគ្នាយ៉ាងជិតស្និទ្ធជាមួយទិសដៅរបស់រាជរដ្ឋាភិបាល ក្នុងការអភិវឌ្ឍជំនាញឌីជីថល បណ្ដុះធនធានមនុស្ស និងត្រៀមលក្ខណៈជូនយុវជនសម្រាប់ឱកាសការងារទៅថ្ងៃមុខ។

កម្មវិធីបានចាប់ផ្តើមដោយមតិស្វាគមន៍ពី លោកស្រី Sara Feuerstein ប្រធានការិយាល័យទំនាក់ទំនងសាធារណៈស្តីទី នៃស្ថានទូតអាមេរិកប្រចាំកម្ពុជា បន្តដោយកិច្ចពិភាក្សាក្រោមប្រធានបទ “ការតម្រង់ទិសយុវជន៖ ការជ្រើសរើសជំនាញ ឱកាសអាហារូបករណ៍ និងការតម្រង់ទិសជីវិតនិស្សិតស្របតាមទិសដៅសេដ្ឋកិច្ចជាតិ” ដែលចូលរួមដោយ បណ្ឌិត Matthew Schnek, កញ្ញា សេង រ័ត្នសេដ្ឋាមុនី, លោក ង៉ូវ ម៉េងហ៊ាង និង លោក ជា សុភា (Sophea Chea)។ ចំណែកឯកម្មវិធីនាពេលរសៀល បានបញ្ចប់ទៅដោយវគ្គសំណេះសំណាល (Networking) និងការចាប់ឆ្នោតផ្សងសំណាងយ៉ាងរីករាយសម្រាប់សិស្សានុសិស្ស។
● លោក ង៉ូវ ម៉េងហ៊ាង សហស្ថាបនិក និងប្រធានប្រតិបត្តិ (COO) នៃ Bamnang Housing បានចែករំលែកអំពីសុវត្ថិភាពសិស្ស និងការសម្របខ្លួនទៅនឹងជីវិតរស់នៅទីក្រុង និងបានកំណត់បេសកកម្មរបស់ Bamnang Housing ថាជាសហគមន៍ដែលគាំទ្រសិស្សានុសិស្សក្នុងដំណើរការសិក្សា និងការអភិវឌ្ឍខ្លួនរបស់ពួកគេ មិនមែនត្រឹមតែជាកន្លែងស្នាក់នៅនោះទេ។
● បណ្ឌិត Matthew Schnek ប្រធានស្តីទីនៃសាកលវិទ្យាល័យអាមេរិកាំងភ្នំពេញ (AUPP) បានណែនាំសិស្សានុសិស្សអំពីកម្មវិធីសិក្សា និងឱកាសអាហារូបករណ៍នៅ AUPP ដែលបានផ្តល់នូវរូបភាពកាន់តែច្បាស់លាស់ដល់សិស្សជាច្រើន ក្នុងអំឡុងពេលពួកគេកំពុងពិចារណាជ្រើសរើសសាកលវិទ្យាល័យ។
● លោក Sophea Chea នាយកប្រតិបត្តិនៃ AmCam Exchange និងជាទីប្រឹក្សា EducationUSA បានបិទបញ្ចប់វគ្គវាគ្មិន ជាមួយនឹងប្រធានបទ “ការបើកទ្វារស្រមៃ៖ គន្លឹះសិក្សា និងឱកាសអាហារូបករណ៍ទៅកាន់សហរដ្ឋអាមេរិក និងការអប់រំ STEM” ដែលទទួលបានការចាប់អារម្មណ៍យ៉ាងខ្លាំងពីអ្នកចូលរួម ដែលមានបំណងចង់ទៅសិក្សានៅបរទេស ជាពិសេសនៅសហរដ្ឋអាមេរិក។

«កម្មវិធីនេះគឺលើសពីជំនួប Meet & Greet ធម្មតា ដោយវាជាជំហានដ៏សំខាន់មួយឆ្ពោះទៅកាន់អនាគតឌីជីថល ដែលការអប់រំជួបជាមួយនវានុវត្តន៍» នេះជាប្រសាសន៍របស់ កញ្ញា សេង រ័ត្នសេដ្ឋាមុនី សហស្ថាបនិក និងជាអគ្គនាយិកាប្រតិបត្តិ CEO នៃ Bamnang។ «យើងចង់ឱ្យសិស្សានុសិស្សរបស់យើងមើលឃើញថា គំនិតច្នៃប្រឌិត បច្ចេកវិទ្យា និងភាពក្លាហាន មិនត្រឹមតែអាចផ្លាស់ប្តូរជីវិតរបស់ពួកគេប៉ុណ្ណោះទេ ប៉ុន្តែថែមទាំងអាចផ្លាស់ប្តូរសហគមន៍របស់ពួកគេទៀតផង»។

រយៈពេល ៦ ឆ្នាំបន្ទាប់ពីការចាប់ផ្តើមដំបូងក្នុងឆ្នាំ ២០២០ កម្មវិធី Meet & Greet with Mony បានក្លាយជាព្រឹត្តិការណ៍ដ៏មានសារៈសំខាន់សម្រាប់សិស្សានុសិស្សកម្ពុជា ក្នុងការបោះជំហានដំបូងឆ្ពោះទៅកាន់ភាពជាអ្នកដឹកនាំ តាមរយៈការរៀនសូត្របែបឌីជីថល ហើយនេះជាការបង្ហាញយ៉ាងច្បាស់ពីការប្តេជ្ញាចិត្តរបស់ Bamnang ក្នុងការកសាងអ្នកច្នៃប្រឌិតកម្ពុជាជំនាន់ក្រោយដែលត្រៀមខ្លួនរួចជាស្រេចសម្រាប់អនាគត។ សិស្សានុសិស្សដែលបានចូលរួមព្រឹត្តិការណ៍នេះ បានត្រឡប់ទៅវិញដោយក្តីសង្ឃឹម និងទទួលបានព័ត៌មានចាំបាច់យ៉ាងពេញលេញ សម្រាប់ជំហានបន្ទាប់នៃការអប់រំរបស់ពួកគេ។

អំពី Bamnang (បំណង)៖
បំណង (Bamnang) គឺជាស្ថាប័នឈានមុខគេក្រោមការដឹកនាំរបស់សហស្ថាបនិក កញ្ញា សេង រ័ត្នសេដ្ឋាមុនី និង លោក ង៉ូវ ម៉េងហ៊ាង ដែលត្រូវបានស្គាល់ជាក្រុមហ៊ុន Bamnang Holdings Pte. Ltd. នៅសាំងហ្គាពួរ និងកម្ពុជា ដែលផ្តោតលើការកសាងប្រព័ន្ធអេកូឡូស៊ីសម្រាប់ការរស់នៅ និងការសិក្សារបស់យុវជនកម្ពុជាប្រកបដោយចីរភាព និងគុណភាព។

បំណង (Bamnang) គឺជាកម្មវិធី All-In-One Superapp លក្ខណៈអន្តរជាតិ ដែលជំរុញការលូតលាស់ផ្នែកសិក្សាតាមរយៈការផ្ដល់ជូននូវកន្លែងស្នាក់នៅដែលមានសុវត្ថិភាព តម្លៃសមរម្យ និងបំពាក់ដោយប្រព័ន្ធ IoT ទំនើប (ដូចជាការប្រើប្រាស់ Smart QR Scan សម្រាប់ប្រព័ន្ធចាក់សោរចេញចូលបរិវេណសាខានីមួយៗជាដើម)។ លើសពីនេះ តាមរយៈប្រព័ន្ធគ្រប់គ្រងសិស្សផ្ទាល់ខ្លួន (PSMS) សិស្ស-និស្សិតអាចស្វែងរកជំនាញឯកទេស សាកលវិទ្យាល័យ អាហាររូបករណ៍ និងវិថីអាជីពដែលស្របទៅតាមចំណង់ចំណូលចិត្ត និងសមត្ថភាពជាក់លាក់របស់ពួកគេ តាមរយៈកម្មវិធីផ្សេងៗដូចជា Meet & Greet with Mony 2026 ជាដើម។ ថ្នាលរបស់បំណង (Bamnang App) ក៏អនុញ្ញាតឱ្យសិស្សតាមដានរាល់ទិន្នន័យផ្ទាល់ខ្លួន និងសកម្មភាពនានាដែលពួកគេបានចូលរួម ដើម្បីជាទុនក្នុងការកសាងអនាគតក្នុងនាមជាអ្នកដឹកនាំជំនាន់ក្រោយ។