អ្នកជំនាញបានបង្ហាញថា ការចាប់ផ្តើមថ្ងៃថ្មីដោយភាពប្រញាប់ប្រញាល់ តានតឹង ឬខ្វះផែនការច្បាស់លាស់ អាចជាឫសគល់ នៃបញ្ហាផ្លូវចិត្ត ដែលវា​នឹង​ប៉ះពាល់ដល់ផលិតភាពពេញមួយថ្ងៃ។ ផ្ទុយទៅវិញ ការយកចិត្តទុកដាក់កសាង ទម្លាប់ពេលព្រឹកវិជ្ជមាន មិនថាដោយការក្រោកពីព្រលឹម ផឹកទឹក ហាត់ប្រាណ ឬការធ្វើសមាធិនោះទេ គឺជាទម្លាប់ដ៏សំខាន់មួយដែលជួយពង្រឹងភាពម្ចាស់ការលើខ្លួនឯង កាត់បន្ថយភាពស្មុគស្មាញ និងបង្កើតកម្លាំងចិត្ត សម្រាប់សម្រេចគោលដៅប្រចាំថ្ងៃ។

តាមរយៈគេហទំព័រ Calm បានបង្ហាញពីគន្លឹះមួយ​ចំនួន ក្នុងការបង្កើតទម្លាប់ពេលព្រឹកដ៏រឹងមាំ ដែលជាមូលដ្ឋានគ្រឹះនាំទៅរកជីវិតប្រចាំថ្ងៃដែលមានតុល្យភាព និងប្រសិទ្ធភាពខ្ពស់។

សារៈសំខាន់នៃការរក្សាទម្លាប់នៅពេកព្រឹក ៖ ធ្លាប់ទេ? ក្រោកភ្លាមបិទម៉ោងរោទ៍ភ្លាម ឬក៏ក្រោកមកទាំងប្រញាប់ប្រញាល់ គ្មានកម្លាំងនៅក្នុងខ្លួន ភ្លេចនេះ ភ្លេចនោះ រហូតដល់ភ្លេចការងារសំខាន់ ឬក៏មួយទៀតងើបមក ដោយអារម្មណ៍តប់ប្រមល់យកតែម្តង! កត្តាដ៏ស្មុគស្មាញទាំងនេះ អាចបណ្តាលមកពីមួយចំណែកនៃការរៀបចំទម្លាប់ពេលព្រឹកមិនបានត្រឹមត្រូវ ឬមិនបានល្អ។

ដូច្នេះការរៀបចំ ឬក៏រក្សាទម្លាប់ពេលព្រឹកឱ្យបានល្អ បានពង្រឹងភាពម្ចាស់ការចំពោះខ្លួនឯង មិនថា ការគិត ការសម្រេចចិត្តអនុវត្តសកម្មភាពដែលឆ្លើយតបនឹងភាពវិជ្ជមានឱ្យបានពេញមួយថ្ងៃ និងការជឿជាក់លើការសម្រេចចិត្តក្នុងការរស់នៅបន្តដោយភាពវិជ្ជមានសម្រាប់ថ្ងៃថ្មី។

សកម្មភាពដែលគួរធ្វើនៅពេលក្រោកឡើងភ្លាមៗ ៖ មិនថាក្នុងមួយព្រឹកៗ លោកអ្នកមានពេលប៉ុន្មានម៉ោង ឬក៏ប៉ុន្មាននាទីនោះទេ​! នៅពេលដែលក្រោកភ្លាម មុន ឬក្រោយចូលបន្ទប់ទឹក អ្វីដែលគួរនឹកដល់មុនគេ គឺការទទួលទានទឹក ហើយជាកិច្ចបន្តបន្ទាប់ គឺធ្វើឱ្យរាងកាយមានចលនាមិនថា ដើរ ហាត់ប្រាណ រត់ ហាត់យូហ្កា ឬក៏ការពត់ដៃ ពត់ជើងនោះទេ! អ្វីដែលសំខាន់ គឺកុំនៅស្ងៀម។ បន្ថែមពីនោះ គួរបន្តអនុវត្តន៍សកម្មភាពទាំងឡាយណាដែលរួមចំណែកដល់ការអប់រំចិត្តដូចជាការសមាធិ ការដកដង្ហើមវែងៗ ដែលធ្វើយ៉ាងណាឱ្យមានសតិរំឮកដឹង។ ជាងនេះទៅទៀត នៅមានសកម្មភាពសំខាន់ៗបន្ថែមដូចជា ការទទួលទានអាហារពេលព្រឹកមិនច្រើនពេកមិនតិចពេក ព្យាយាមកុំប៉ះទូរស័ព្ទពេលក្រោកពីគេងភ្លាម ការសរសេរកំណត់ហេតុនៅក្នុងសៀវភៅ ឬក្រដាស ស្តាប់ភ្លេង ឬចម្រៀងដែលនាំឱ្យអារម្មណ៍ស្រស់ស្រាយមានភាពវិជ្ជមាន ធ្វើផែនការសម្រាប់ថ្ងៃថ្មី រៀបចំបន្ទប់គេងឱ្យស្អាត និងទុកចន្លោះនៅពេលព្រឹកធ្វើសកម្មភាព ឬរៀបចំខ្លួនមួយៗដោយមិនបង្ខំៗ ធ្វើយ៉ាងណាឱ្យមានសតិក្នុងខ្លួន។

កាលដែលមិនបានធ្វើផែនការសកម្មភាពទុកមុន ឬក៏ការតាំងចិត្តថា នឹងទៅកន្លែងណាមួយ វាគឺអន្ទាក់ក្នុងការទាញលោកអ្នកឱ្យត្រឡប់ទៅគេងវិញ និងអូសបន្លាយពេលវេលា ទោះបីជាចិត្តមិនចង់ក្ដី ហើយប្រសិនបើគ្មានទម្លាប់ ឬការតាំងចិត្តរៀបចំផែនការពីល្ងាចទេ ការចាប់ផ្តើមថ្ងៃថ្មីក៏នឹងមានភាពផុយស្រួយផងដែរ។ ជារួមមកវិញ ការបង្កើតទម្លាប់ល្អនៅពេលព្រឹក បានជួយសម្រួលដល់ការសម្រេចចិត្តក្នុងការធ្វើសកម្មភាពដែលផ្តល់នូវភាពវិជ្ជមាន ជួយកាត់បន្ថយស្រេ្តស និងការកសាងកម្លាំងចិត្ត បង្កើនផលិតភាពជាមួយនឹងថាមពលពិសេសជាងថ្ងៃដែលមិនបានយកចិត្តទុកដាក់ជាមួយទម្លាប់វិជ្ជមាន។

ដំណាក់កាលកសាងទម្លាប់ ៖ ការបង្កើតទម្លាប់ល្អ វាអាចល្អមើល ឬពិរោះស្តាប់ នៅពេលដែលត្រូវលើកជាប្រធានបទមកជជែកគ្នា ប៉ុន្តែដំណាក់កាលកសាងទម្លាប់ដោយផ្ទាល់វិញហាក់មិនរលូន មិនងាយស្រួលប៉ុន្មានទេ ថ្ងៃខ្លះធ្វើបាន ថ្ងៃខ្លះអត់បាន! ហើយពេលខ្លះមានកម្លាំងក្នុងការចាប់ផ្តើមហើយ ប៉ុន្តែពិបាកក្នុងការរក្សាឱ្យបានជាប់លាប់ ដូច្នេះ តើត្រូវធ្វើបែបណា? ចំណុចដែលគួរចាប់ផ្តើមដំបូងនោះ គឺការព្យាយាមចូលគេងនៅម៉ោងដដែល​ និងក្រោកនៅម៉ោងដដែល, ជៀសវាងការមានទម្លាប់បិទម៉ោងរោទ៍, ចាប់ផ្តើមទម្លាប់វិជ្ជមានពីសកម្មភាពតូចៗ និងងាយស្រួលក្នុងការអនុវត្ត បង្កើនភាពរីករាយនៅពេលព្រឹក ការរៀបកាលវិភាគ និងធ្វើផែនការសកម្មភាពទុកជាមុននៅពេលល្ងាច។

បន្ថែមពីនោះ ការនិយាយប្រាប់មនុស្សស្និទ្ធស្នាលអំពីអ្វីដែលកំពុងអនុវត្តន៍ អាចជាការរំលឹកគ្នា ឬការប្រកួតប្រជែងគ្នាក្នុងការអនុវត្តឱ្យកាន់តែជាប់លាប់ និងចំណុចចុងក្រោយគឺរក្សាភាពអត់ធ្មត់អំឡុងពេលផ្លាស់ប្តូរ ប្រសិនបើមានការអាក់ខាន ឬក៏ការប្រែប្រួលនៅត្រង់ចំណុចណាមួយ គួរមានភាពបត់បែន និងបន្តអនុវត្តន៍ ទោះបីជាមានការខកខានខ្លះក៏ដោយ ធ្វើយ៉ាងណាកុំឱ្យការពន្យារពេលកើតមានជាញឹកញាប់ រហូតក្លាយទៅជាទម្លាប់មិនល្អវិញ៕