ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
របាយការណ៍ថ្នាក់តំបន់ នៃរង្វាយតម្លៃលទ្ធផលសិក្សាកម្រិតបឋមសិក្សានៅតំបន់អាស៊ីអាគ្នេយ៍ ឆ្នាំ២០២៤ (SEA-PLM 2024) ដែលចេញផ្សាយនៅថ្ងៃទី៤ ខែធ្នូ ឆ្នាំ២០២៥ ដោយលេខាធិការដ្ឋាន SEAMEO មានមូលដ្ឋាននៅទីក្រុងម៉ានីល ប្រទេសហ្វីលីពីន បានបង្ហាញពីសិស្សកម្ពុជា ដែលមានសមត្ថភាពគួរឱ្យកត់សម្គាល់ ក្នុងនោះរបាយការណ៍រកឃើញថា សិស្សឆ្នើមកម្ពុជាដែលកំពុងរៀននៅថ្នាក់ទី៥ ពួកគេមានសមត្ថភាពធ្វើបានល្អប្រហាក់ប្រហែលនឹងសិស្សបញ្ចប់ការអប់រំនៅបឋមសិក្សា នៃប្រទេសក្នុងតំបន់ ដែលបានចូលរួមក្នុងការរង្វាយតម្លៃ។
រង្វាយតម្លៃលទ្ធផលសិក្សាកម្រិតបឋមសិក្សានៅតំបន់អាស៊ីអាគ្នេយ៍ ហៅកាត់ថា SEA-PLM គឺជាកម្មវិធីថ្នាក់តំបន់ដែលត្រូវបានរៀបចំឡើង ដើម្បីវាស់ស្ទង់ និងតាមដានលទ្ធផលសិក្សារបស់សិស្ស សម្រាប់ប្រទេសក្នុងតំបន់អាស៊ីអាគ្នេយ៍។ កម្មវិធី SEA-PLM ផ្តោតជាចម្បងលើសិស្សថ្នាក់ទី ៥ (Grade 5) ដោយវាស់ស្ទង់សមត្ថភាពលើមុខវិជ្ជាមូលដ្ឋានសំខាន់ៗដូចជា អំណាន (Reading Literacy), សំណេរ (Writing Literacy), គណិតវិទ្យា (Mathematical Literacy) និងភាពជាពលរដ្ឋសកល (Global Citizenship)។
ប្រទេសកម្ពុជាបានចូលរួមអនុវត្តរង្វាយតម្លៃថ្នាក់តំបន់ SEA-PLM លើកទី១ នៅឆ្នាំ២០១៩ និងលើកទីនៅឆ្នាំ២០២៤ ជាមួយបណ្តាប្រទេសក្នុងតំបន់អាស៊ីអាគ្នេយ៍ ដោយលទ្ធផលបង្ហាញថា សិស្សកម្ពុជាទទួលបានពិន្ទុជាមធ្យមផ្នែកអំណានកើនឡើង ៦ពិន្ទុ (២៩០ ក្នុងឆ្នាំ២០១៩ កើនដល់ ២៩៦ ក្នុងឆ្នាំ២០២៤) និងពិន្ទុជាមធ្យមផ្នែកគណិតវិទ្យាកើនឡើង ១២ពិន្ទុ (២៨៩ ក្នុងឆ្នាំ២០១៩ កើនដល់ ៣០១ ក្នុងឆ្នាំ២០២៤)។ អត្រាសិស្សដែលមានសមត្ថភាពអំណានកម្រិតខ្ពស់ (ពីកម្រិត៥ឡើងទៅ) បានកើនឡើងពី ២៧% ក្នុងឆ្នាំ២០១៩ ដល់ ៣៩% ក្នុងឆ្នាំ២០២៤។ ក្នុងចំណោមសិស្សទាំងនេះ អត្រាសិស្សឆ្នើមបានកើនឡើងពី ១១% ក្នុងឆ្នាំ២០១៩ ដល់ ១៨% ក្នុងឆ្នាំ២០២៤។
អត្រាសិស្សដែលមិនអាចអានអត្ថបទងាយៗបានស្ទាត់ (ចាប់ពីកម្រិត ៣ ចុះក្រោម) បានថយចុះពី ៤៧% ក្នុងឆ្នាំ២០១៩ មកនៅត្រឹម ៣៧% ក្នុងឆ្នាំ២០២៤។ ចំណែកផ្នែកគណិតវិទ្យា អត្រាសិស្សដែលមានសមត្ថភាពខ្ពស់ (ពីកម្រិត ៥ ឡើងទៅ) បានកើនឡើងពី ៣៩% ក្នុងឆ្នាំ២០១៩ ដល់ ៦២% ក្នុងឆ្នាំ២០២៤។ ក្នុងចំណោមសិស្សទាំងនេះ អត្រាសិស្សឆ្នើមបានកើនឡើងពី១៩% នៅឆ្នាំ២០១៩ ដល់៤០% នៅឆ្នាំ២០២៤។
របាយការណ៍ក៏បានកត់សម្គាល់ដែរថា ទោះបីជាសិស្សឆ្នើមទាំងនេះកំពុងរៀននៅថ្នាក់ទី៥ ក៏ដោយ ក៏ពួកគាត់មានសមត្ថភាពធ្វើបានល្អប្រហាក់ប្រហែលនឹងសិស្ស ដែលនៅកម្រិតបញ្ចប់ការអប់រំនៅបឋមសិក្សាក្នុងបណ្តាប្រទេសដទៃទៀតដែលបានចូលរួម។ អត្រាសិស្សដែលមានសមត្ថភាពទាប (ចាប់ពីកម្រិត ៣ ចុះក្រោម) បានថយចុះពី៣៦% ក្នុងឆ្នាំ២០១៩ មកនៅត្រឹម ២០% ក្នុងឆ្នាំ២០២៤៕
យ៉ាងណាបើតាមប្រកាសរបស់ក្រសួងអប់រំ ការប្រកាសជាផ្លូវការ «របាយការណ៍ថ្នាក់ជាតិនៃរង្វាយតម្លៃលទ្ធផលសិក្សារបស់សិស្សកម្រិតបឋមសិក្សានៅតំបន់អាស៊ីអាគ្នេយ៍ – ឆ្នាំ២០២៤ (SEA-PLM 2024) របស់ប្រទេសកម្ពុជា ក្រសួងគ្រោងនឹងធ្វើឡើងនៅថ្ងៃទី២២ ខែធ្នូ ឆ្នាំ២០២៥ ខាងមុខ៕
