ការសន្សំប្រាក់កាស ជាចំណែកមួយជួយឱ្យការប្រើប្រាស់ថវិកាបានល្អ ហើយនៅពេលដែលអ្នក​បានរៀបចំកញ្ចប់ថវិកាបានរៀបរយ ឬមានទម្លាប់ក្នុងការតាមដានការចាយវាយជាទៀងទាត់ កត្តាទាំងអស់នេះក៏បានបង្កើនលទ្ធផលនៃការសិក្សាបានល្អ និងការស់នៅដែលមានភាពសមរម្យផងដែរ។ ប៉ុន្តែជាដំបូង អ្នកត្រូវដឹងឱ្យជាក់អំពីបុព្វហេតុនៃការសន្សំជាមុនសិនថា តើអ្វីទៅជាវត្ថុបំណងដែលត្រូវការលុយសន្សំ ហើយវាមានភាពសំខាន់កម្រិតណា? ឧទាហរណ៍គោលដៅគឺការរស់នៅទីក្រុង! ដូច្នេះការសន្សំគឺដើម្បីមករស់នៅទីក្រុង។

តាមរយៈ UCAS បានបង្ហាញអំពីការប្រើប្រាក់កាសឱ្យបានល្អដើម្បីបង្កើនផលិតភាពនៃការសិក្សា ៖

១. មានផែការហិរញ្ញវត្ថុ ៖ ផែនការហិរញ្ញវត្ថុបានបង្កើនទំនុកចិត្តដល់សិស្សក្នុងការចាប់ផ្តើមសិក្សានៅ​មហាវិទ្យាល័យ ហើយជំហាននៃការធ្វើផែនការ​នេះ មិនមែនត្រូវសន្សំលុយ ឬរក្សាលុយទាំងអស់នោះទេ គឺមានន័យថា ដឹងពីទំហំនៃតម្រូវការចំណាយផ្ទាល់ខ្លួន ធ្វើយ៉ាងណាកុំចាំដល់ចាយលុយអស់ហើយ ទើបរកមើលវិក័យប័ត្រចាស់ៗថា តើបាត់លុយទៅណា?

២. រកមើលកម្មវិធីដែលគាំទ្រដោយរដ្ឋាភិបាល ៖ ការស្វែងរកកញ្ចប់ជំនួយពីរដ្ឋាភិបាលផ្ទាល់ មិនថា ជាការរៀនជំនាញ ឬការសិក្សាមហាវិទ្យាល័យរយៈពេលបួនឆ្នាំនោះទេ វាបានជួយសម្រាលបន្ទុកយ៉ាងច្រើនទៅកាន់ការចាយវាយ ជាងនេះទៅទៀតវាក៏ជាឱកាសមួយក្នុងការសម្រួចជំនាញឱ្យចំតម្រូវការជាក់ស្តែងក្នុងសង្គមផងដែរ ព្រោះកញ្ចប់ថវិកាដែលផ្តល់ឱ្យដោយរដ្ឋាភិបាលដើម្បីបង្កើនភាពរីកចម្រើនក្នុងសង្គមផង និងជាការបំពេញភាពខ្វះចន្លោះនៃជំនាញណាមួយផង។

៣. ធ្វើការក្រៅម៉ោង ៖ ដើម្បីរៀនឱ្យមានប្រសិទ្ធភាពទៅបាន ត្រូវការពេលវេលាសមស្របមួយក្នុងការស្វ័យសិក្សា ប៉ុន្តែចុះបើជីវភាពមិនអំណោយផល នោះសិស្សក៏គ្មានជម្រើសអ្វីក្រៅពីធ្វើការបន្ថែមដែរ ប៉ុន្តែក្នុងនាមជានិស្សិតក្នុងកម្រិតដំបូងៗក៏គួរផ្តល់អាទិភាពក្នុងការកសាងគ្រឹះឱ្យរឹងមាំ បើត្រូវធ្វើការ គួរស្វែងរកការងារក្រៅម៉ោង ឬការងារដែលប្រើពេលខ្លីៗ ដើម្បីសល់ពេលវេលាក្នុងការសិក្សាឱ្យបានពេញលេញ៕