បច្ចុប្បន្ន បណ្ដាញសង្គមស្ទើរតែក្លាយជាផ្នែកមួយក្នុងការបម្រើឱ្យសកម្មភាពក្នុងការរស់នៅរបស់មនុស្ស ជាពិសេសយុវជនដែលបានចំណាយពេលវេលាជាច្រើនក្នុងការតាមដានព័ត៌មានផ្សេងៗ ។ ទន្ទឹមគ្នានេះ ការអប់រំយុវជនឱ្យប្រើប្រាស់បណ្ដាញសង្គមប្រកបដោយប្រសិទ្ធភាព មានការត្រិះរិះពិចារណា និងការទទួលខុសត្រូវខ្ពស់ ជារឿងសំខាន់និងចាំបាច់ក្នុងសតវត្សទី២១។

លោក ជី សុផាត អ្នកផលិតមាតិកាអប់រំអំពីចំណេះដឹងឌីជីថល លើកឡើងថា សព្វថ្ងៃយុវជនអាចទាញប្រយោជន៍ពីការប្រើប្រាស់បណ្ដាញសង្គមបានតាមរយៈការរៀនសូត្រ ដកស្រង់យកបទពិសោធន៍ កសាងកេរ្តិ៍ឈ្មោះ បង្កើតអាជីវកម្ម ផ្សព្វផ្សាយចំណេះដឹង ឬសាច់រឿងផ្សេងទៀតដែលមិនប៉ះពាល់ដល់អ្នកដទៃ។ ទន្ទឹមគ្នានេះ យុវជនមួយចំនួនទៀតប្រើប្រាស់បណ្ដាញសង្គមដើម្បីកម្សាន្ត ប៉ុន្តែកុំឱ្យការកម្សាន្តនោះលើសលប់ពេកដែលអាចនាំជាបញ្ហាមកដល់ខ្លួនឯង។

អ្នកផលិតមាតិកាអប់រំអំពីចំណេះដឹងឌីជីថល បន្ថែមថា យុវជនអាចដឹងពីចំណុចល្អនៃបណ្ដាញសង្គម គឺការស្រូបយកចំណុចដែលអាចឱ្យខ្លួនឯងរីកចម្រើន។ សម្រាប់ចំណុចដែលគួរជៀសវាង គឺចំណុចណាដែលជះឥទ្ធិពលមិនល្អ ធ្វើឱ្យមានបញ្ហាស្មារតី ងប់ងល់លើការប្រើប្រាស់បណ្ដាញសង្គម ឬក្រោមការអូសទាញផ្សេងៗជារូបភាពហិង្សាជាដើម។

បើតាម លោក ជី សុផាត សម្រាប់វេទិកា (Platform) ដែលមិនសមគោលបំណង និងគោលដៅរបស់ខ្លួន យុវជនគួរចាប់ផ្ដើមតម្រង់ទិសវេទិកា (Platform) ក្នុងបណ្ដាញសង្គមឱ្យត្រូវនឹងគោលបំណងរបស់ខ្លួន ដោយព្យាយាមដកខ្លួនចេញពីមាតិកាមិនល្អទាំងនោះ។ ក្នុងនោះទី១. យុវជនអាចជំនះវេទិកា (Platform) ក្នុងបណ្ដាញសង្គម ដោយការដាក់បញ្ចូលខ្លឹមសារល្អៗ និងស្រង់យកតែខ្លឹមសារល្អៗដែលសមស្របជាមួយខ្លួន, ទី២. សម្រេចចិត្តចាកចេញពីវេទិកា (Platform) ក្នុងបណ្ដាញសង្គមដែលមិនមានប្រយោជន៍សម្រាប់ខ្លួនតែម្ដង។

សម្រាប់ ឯកឧត្តម ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាល មានប្រសាសន៍ថា សព្វថ្ងៃនេះ មានព័ត៌មានក្លែងក្លាយ ឬព័ត៌មានបំផ្លើសបំភ្លៃខុសពីការពិតជាច្រើនត្រូវបានផ្សព្វផ្សាយនៅលើបណ្តាញសង្គមដែលធ្វើឱ្យប្រជាពលរដ្ឋ ឬយុវជនមួយចំនួនភាន់ច្រឡំ។ ដូច្នេះ ជាការចាំបាច់ណាស់ដែលប្រជាពលរដ្ឋ ឬយុវជនត្រូវមានមូលដ្ឋានក្នុងការពិចារណា ឬផ្ទៀងផ្ទាត់ដើម្បីឱ្យដឹងថា ព័ត៌មានណាពិត ឬក្លែងក្លាយ។  

ឯកឧត្តម ប៉ែន បូណា បញ្ជាក់បន្ថែមថា នៅពេលយុវជនឃើញព័ត៌មានណាមួយផ្សព្វផ្សាយនៅក្នុងបណ្ដាញសង្គមហ្វេសប៊ុក កុំទាន់ជឿភ្លាម ត្រូវត្រឡប់មកសួរសំណួរខ្លួនឯង តើរឿងនេះបានប្រភពមកពីណា? អ្នកណាជាអ្នកនិយាយ? មានឯកសារភស្តុតាងមកបង្ហាញទេ? ប្រសិនបើមានសំឡេងគេនិយាយ ត្រូវយកមកស្ដាប់ឱ្យយល់ តើគេចង់និយាយពីអ្វី? បើមានឯកសារ សេចក្ដីប្រកាសព័ត៌មាន មើលឱ្យច្បាស់ថា តើគោលបំណងគេចង់និយាយអំពីអ្វី? ទើបសម្រេចចិត្តជឿ ឬមិនជឿ។

ប្រធានអង្គភាពអ្នកនាំពាក្យរាជរដ្ឋាភិបាល បន្តថា ប្រសិនយុវជនរកឃើញប្រភពច្បាស់លាស់ ត្រូវអាន និងស្ដាប់ឱ្យយល់សេចក្ដីសិន ចាំសម្រេចចិត្ត ហើយអាចបញ្ចេញមតិ ឬចែករំលែកប្រសិនយល់ថារឿងនោះល្អ។ ផ្ទុយទៅវិញបើសិនជាយុវជនយល់ថា រឿងនោះមានកំហុសឆ្គង ឬខ្វះចន្លោះកន្លែងណាមួយ យុវជនអាចបញ្ចេញមតិយោបល់ រិះគន់ស្ថាបនា និងកែលម្អ ប្រកបដោយការទទួលខុសត្រូវ និងមានប្រយោជន៍សម្រាប់សង្គម៕