យុវជនរាប់រយនាក់​​មក​ពី​គ្រប់តំបន់​កំពុងតែជួបជុំគ្នានៅ​ក្បែរ​ជើងភ្នំគូលែន ក្នុងស្រុក​បន្ទាយស្រី ខេត្ត​សៀមរាប ក្នុង​កម្មវិធីបោះជំរំជាសកលលើកទី១០ ក្រោមប្រធានបទ “យុវជន និងមរតកសន្តិភាព៖ ទស្សនាសៀមរាប ឆ្នាំ២០២៤” ដែល​ប្រព្រឹត្តទៅចាប់ពីថ្ងៃទី១៦-២១ ធ្នូ ។ មន្រ្តីជាន់ខ្ពស់​អគ្គនាយកដ្ឋាន​យុវជន​និយាយថា ការបោះជំរំយុវជនជាសកល ជាឱកាសបង្កើតទំនាក់ទំនង បំផុសគំនិត ជំរុញលើកទឹកចិត្តយុវជនឱ្យទទួលបានចំណេះដឹងថ្មីៗ។

លោក រស់ ភារៈ តំណាងគណៈកម្មការរៀបចំកម្មវិធី មានប្រសាសន៍ថា តាមរយៈការចូលរួមក្នុងការបោះជំរំ យុវជនជាសមាជិកជំរំ នឹងទទួលបាននូវការអភិវឌ្ឍសមត្ថភាព និងបំណិនផ្នែកបច្ចេកវិទ្យាព័ត៌មាន ឌីជីថល ការបង្កើតគំនិតថ្មី និងឱកាសភ្ជាប់បណ្តាញទំនាក់ទំនង ស្មារតីសហគ្រិនភាព ភាពជាអ្នកដឹកនាំ ចូលរួមលើកស្ទួយផ្សព្វផ្សាយវិស័យទេសចរណ៍ វប្បធម៌ ពង្រឹងកាយសម្បទា ស្មារតីមនុស្សធម៌ ចរិយាធម៌ សុខភាពផ្លូវចិត្ត យល់ពីហានិភ័យនៃការប្រើប្រាស់ហិរញ្ញវត្ថុ ដោយមិនមានមូលដ្ឋានច្បាស់លាស់ ពិសេស ស្វែងយល់ពីដំណើរស្វែងរក «សន្តិភាព» ដែលមានតម្លៃមិនអាចគណនាបានជូនជាតិមាតុភូមិ។

បើតាមលោក រស់ ភារៈ កម្មវិធីបោះជំរុំ​រយៈពេល​១សប្តាហ៍នេះ យុវជន​នឹង​ត្រូវ​ចូលរួមសកម្មភាពជាច្រើនដូចជា កម្មវិធីសប្បុរសធម៌, ការ​សិក្សា​ស្វែង​យល់អំពីជីវភាពរស់នៅរបស់ប្រជាពលរដ្ឋ​នៅខេត្តសៀមរាប ជាពិសេសនៅក្នុងស្រុកបន្ទាយស្រី, ការ​ចូលរួមសកម្មភាពជាមួយសាលាពលទាហានទី៤ ក៏​ដូចជា​ការ​ស្តាប់ ការសិក្សា​រៀនសូត្រនូវ​ចំណេះដឹងថ្មីៗពាក់ព័ន្ធទៅនឹងប្រវត្តិសាស្រ្ត ទេសចរណ៍ជាដើម។

ក្នុង​ពិធីបើកជាផ្លូវការ ការបោះជំរំយុវជនជាសកលលើកទី១០ លោកស្រី ទេព ស៊ីណាត អគ្គនាយករង នៃអគ្គនាយកដ្ឋានយុវជន បានថ្លែង​ដោយកោតសរសើរចំពោះការខិតខំប្រឹងប្រែង របស់ថ្នាក់ដឹកនាំ ក្រុមការងារ អគ្គនាយកដ្ឋានយុវជន និងយុវជន ស្ម័គ្រចិត្ត ចំពោះការរៀបចំកម្មវិធីប្រកបដោយគុណតម្លៃនេះ។ ជាមួយគ្នាលោកស្រីក៏​សូមឱ្យការបោះជំរំនេះ ក្លាយជាឱកាសនៃការបង្កើតទំនាក់ទំនង បំផុស ជំរុញ និងលើកទឹកចិត្ត។

“នៅពេលដែលប្អូនៗត្រឡប់ទៅវិញ ខ្ញុំសង្ឃឹមថា ប្អូនៗនឹងនាំយកទៅជាមួយមិនគ្រាន់តែអនុស្សាវរីយ៍ល្អៗ ថែមទាំងស្មារតីទទួលខុសត្រូវថ្មីមួយ គឺបេសកកម្មកសាងសង្គមមួយដែលធ្វើឱ្យសន្តិភាពមិនមែនត្រឹមតែជាក្តីសុបិនប៉ុណ្ណោះទេ គឺជាសន្តិភាពដែល មានពិតតាមរយៈ សកម្មភាព របស់ ប្អូនៗផ្ទាល់”

បើតាម​បណ្តាញផ្លូវការ​របស់​ជំរំយុវជន​ជាសកល ក្នុងរយៈពេល​ប៉ុន្មានថ្ងៃមកនេះ នៃការ​បោះជំរំជា​សាកលលើកទី១០ យុវជនបានរៀន​អំពី​ការ​ប្រើប្រាស់​ហិរញ្ញវត្ថុ, ចូលរួម​កិច្ច​ពិភាក្សា​ពី​ការ​អភិវឌ្ឍមូលធន​យុវជន តាមរយៈ​ការងារ​ស្ម័គ្រចិត្ត, ចូលរួមចែករំលែកក្តីស្រឡាញ់​ជាមួយ​សិស្សានុសិស្ស​នៅ​សាលា​បឋមសិក្សា​ថ្មជល់, ស្វែង​យល់ពីការ​ទស្សនា​សៀមរាប ក៏​ដូចជា​ស្តាប់ឱវាទអប់រំចរិយាធម៌ ពី​សម្តេចព្រះព្រហ្មរតនមុនី ពិន សែម ឧត្តម​ប្រឹក្សា​គណៈសង្ឃនាយក​គណៈមហានិកាយ សមាជិកថេរសភាសង្ឃ នៃព្រះរាជាណាចក្រកម្ពុជា និង​ជា​ចៅអធិការវត្តព្រះរាជបូណ៌ ជាដើម៕