រលកកម្ដៅកំពុងធ្វើឱ្យទីក្រុងជាច្រើននៅលើពិភពលោកក្លាយជាតំបន់ក្តៅបំផុត ដោយសារហេដ្ឋារចនាសម្ព័ន្ធទីក្រុង ដូចជាផ្លូវថ្នល់ និងអគារ បានស្រូបកម្ដៅពីព្រះអាទិត្យ ហើយបញ្ចេញវិញនៅក្នុងទីក្រុងតែម្ដង ដែលធ្វើទីក្រុងក្លាយជាតំបន់ ដែលមានសីតុណ្ហភាពខ្ពស់ ។ រាប់ចាប់ពីអឺរ៉ុបរហូតដល់ប្រទេសចិន ឥណ្ឌា ប៉ាគីស្ថាន សហរដ្ឋអាមេរិក និងអាហ្រ្វិក សុទ្ធតែកំពុងឡើងកម្ដៅ។ ហេតុផលនេះ បានធ្វើឱ្យទីក្រុងចំនួន ៧ កំពុងបង្កើតដំណោះស្រាយប្រកបដោយភាពច្នៃប្រឌិត ដើម្បីទប់ទល់នឹងរលកកម្ដៅ ដែលកំពុងកើនឡើងជាលំដាប់។

១. គោលនរយោបាយ «Policy of shade» ទីក្រុង Seville ប្រទេសអេស្ប៉ាញ ៖ យោងតាមរបាយការណ៍របស់ Bloomberg បានបង្ហាញថា ទីក្រុង Seville មានកម្ដៅរហូតដល់ ៤០អង្សារ រៀងរាល់រដូវក្តៅ។ ដូច្នេះ គ្មានអ្វីចម្លែកទេ ដែល Seville គឺជាទីក្រុងដំបូងគេរបស់ពិភពលោក ដែលកំពុងរកដំណោះស្រាយទប់ទល់នឹងរលកកម្ដៅ។

ដើម្បីទប់ទល់នឹងការកើនឡើងកម្ដៅ ទីក្រុងអេស្ប៉ាញមួយនេះ បានបង្កើតឱ្យមានទីកន្លែងបែបធម្មជាតិ ដែលសម្បូរម្លប់ និងដើមឈើពាសពេញទីក្រុង។ លោក Antonio Muñoz អភិបាលក្រុង បានហៅ គម្រោងនេះថា «គោលនយោបាយម្លប់ – Policy of shade»។ មិនតែប៉ុណ្ណោះ ទីក្រុងSeville ក៏តែងតែដាំដើមឈើចំនួន 5,000 ដើមរាល់ឆ្នាំដែរ។ ទន្ទឹមនឹងនេះ គេកំពុងប្តូរទៅប្រើប្រាស់សម្ភារៈសំណង់ ដែលអាចទប់ទល់នឹងកម្ដៅបន្ថែមទៀត។

២. គម្រោង Sydney’s tree plan ទីក្រុង Sydney ៖ នៅ Greater Sydney ដែលជាតំបន់គ្របដណ្តប់លើផ្ទៃដី ១,៣ លានហិចតា នៅជុំវិញទីក្រុងនៃប្រទេសអូស្ត្រាលី។ រដ្ឋាភិបាល ក៏មានគម្រោងបង្កើនដើមឈើដោយដាំដើមឈើប្រាំលានបន្ថែមទៀតនៅឆ្នាំ២០៣០ផងដែរ ។ ដើមឈើ កំពុងជួយធ្វើឱ្យទីក្រុងត្រជាក់ជាងមុន ដោយផ្តល់ម្លប់ និងសំណើម។ លើសពីនេះ ពួកវាក៏ស្រូបយក និងរក្សាទុកកាបូនឌីអុកស៊ីត ដែលជួយទប់ទល់នឹងការប្រែប្រួលអាកាសធាតុទៀតផង។

៣. ការពិសោធន៍លាបថ្នាំផ្លូវ ពណ៌ស ទីក្រុង Los Angeles ៖ នៅទីក្រុង Los Angeles សហរដ្ឋអាមេរិក អាជ្ញាធរក្រុងបានធ្វើការពិសោធន៍លើការលាបពណ៌ផ្លូវពណ៌សនៅឆ្នាំ២០១៩។ គោលបំណង គឺបញ្ចេញកាំរស្មីព្រះអាទិត្យត្រឡប់ទៅក្នុងលំហវិញ ដើម្បីឱ្យតំបន់ជុំវិញនោះត្រជាក់។ ដងផ្លូវចំនួនដប់ក្នុងសង្កាត់ចំនួនដប់ បាននិងកំពុងលាបពណ៌រហូតមកដល់ពេលនេះ។ មន្ត្រីនិរន្តរភាពទីក្រុងនិយាយថា ថ្នាំលាបពណ៌សធ្វើឱ្យផ្ទៃផ្លូវ និងតំបន់ជុំវិញត្រជាក់ នៅពេលអាកាសធាតុក្ដៅខ្លាំង។

៤. អាគារដែលមានរបាំងការពារកម្ដៅថ្ងៃ នៃទីក្រុង Abu Dhabi ៖ ការប្រែប្រួលអាកាសធាតុនឹងជម្រុញឱ្យទីក្រុងនេះមានសីតុណ្ហភាពជាមធ្យមលើសពី ៥០អង្សា នៅអំឡុងសតវត្សរ៍ទី២១នេះ ។ លក្ខខណ្ឌរលកកម្ដៅក្ដៅខ្លាំងបែបនេះ អាចធ្វើឱ្យទីក្រុងនេះមិនអាចរស់នៅបាន។ ប៉ុន្តែការរចនាអាគារប្រកបដោយភាពច្នៃប្រឌិត អាចជួយកាត់បន្ថយកម្ដៅក្នុងអាគារ និងអនុញ្ញាតឱ្យមនុស្សអាចរស់នៅបាន។ ជាក់ស្ដែងអគារ Al Bahar ត្រូវបានបំពាក់ដោយអេក្រង់បត់ ដែលគ្រប់គ្រងដោយកុំព្យូទ័រ ដើម្បីបើក និងបិទ សម្រាប់ផ្តល់ម្លប់សម្រាប់អ្នកនៅក្នុងអាគារ។

៥. ការបង្កើត Cool islands ក្នុងទីក្រុង Paris ៖ ទីក្រុងប៉ារីសកំពុងឆ្លើយតបទៅនឹងវិបត្តិអាកាសធាតុ ដោយបង្កើតឱ្យមាន «កោះត្រជាក់ – Cool islands» ចំនួន ៨០០ កន្លែងទូទាំងទីក្រុង។ ទីកន្លែងទាំងនោះមានដូចជា សួនច្បារ កន្លែងបាញ់ទឹក និងអគារសាធារណៈដូចជា អាងហែលទឹក និងសារមន្ទីរជាដើម។តំបន់ Cool island អាចជួយកាត់បន្ថយកម្ដៅចន្លោះពី ២ ទៅ ៤អង្សារ។ លើសពីនេះ ទីក្រុងប៉ារីសក៏មានគម្រោងដាំដើមឈើចំនួន ១៧០,០០០ ដើមនៅឆ្នាំ ២០២៦ផងដែរ។

៦. យុទ្ធនាការ Green rooftops ក្នុងទីក្រុង Rotterdam ៖ ការដាំដើមឈើបៃតងនៅលើដំបូលអាគារ អាចជួយឱ្យទីក្រុងនានារក្សាភាពត្រជាក់ និងកាត់បន្ថយរលកកម្ដៅបានមួយកម្រិត។ ទីក្រុង Rotterdam នៅប្រទេសហូឡង់បានបង្កើតគម្រោងមួយមានឈ្មោះ Rotterdam Rooftop Walk ដើម្បីដោះស្រាយវិបត្តិអាកាសធាតុ។ ទីក្រុងនេះនឹងមានដំបូលពណ៌បៃតងជាង ៩០០,០០០ ម៉ែត្រការ៉េ។ ដំបូលពណ៌បៃតងអាចកាត់បន្ថយសីតុណ្ហភាពក្នុងទីក្រុងបានរហូតដល់ ១៥អង្សារឯណោះ នេះបើយោងតាម United States Environmental Protection Agency។

៧. គម្រោង Green Corridors ក្នុងទីក្រុង Medellin ៖ ទីក្រុង Medellin ដែលត្រូវបានគេស្គាល់ថា ជាទីក្រុងធំជាងគេទីពីររបស់ប្រទេសកូឡុំប៊ី បានបង្កើតឱ្យមាន «ច្រករបៀងពណ៌បៃតង – green corridors» ចំនួន ៣០កន្លែង ដើម្បីទប់ទល់នឹងរលកកម្ដៅ។ យោងតាមទីភ្នាក់ងារព័ត៌មាន Reuters ដើមឈើរាប់ពាន់ដើមដូចជា កាលព្រឹក្ស(Palm) ឫស្សី និងរុក្ខជាតិត្រូពិចត្រូវបានដាំនៅតាមចិញ្ចើមផ្លូវ សួនច្បារ និងផ្លូវចរាចរណ៍ដ៏មមាញឹក ដោយផ្តល់កន្លែងម្លប់សម្រាប់មនុស្សធ្វើដំណើរ៕