ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការលេងវីដេអូហ្គេម ផ្ដល់ឱកាសដ៏អស្ចារ្យសម្រាប់មនុស្សគ្រប់វ័យ ជាពិសេសកុមារ ដែលពួកគេអាចរៀនសូត្រ បង្កើនគំនិតច្នៃប្រឌិត និងការបង្កើតទំនាក់ទំនង។ ប៉ុន្តែទន្ទឹមនឹងគុណសម្បត្តិ វីដេអូហ្គេម ក៏អាចបង្កផលប៉ះពាល់អវិជ្ជមានលើជីវិតកុមារផងដែរ ការញៀនហ្គេម បង្កើតទំនាក់ទំនងខុសមនុស្ស ការប្រើអំពើហិង្សា ឬការចំណាយប្រាក់ដែលមិនត្រឹមត្រូវជាដើម។ ដូច្នេះ តើមាតាបិតា អាចចូលរួមជាមួយកូនបែបណា ដើម្បីឱ្យកុមារអាចលេងវីដេអូហ្គេម ដោយមិនប៉ះពាល់សុខភាព និងជីវិតពួកគេ?
ជុំវិញសំណួរនេះ Unicef បានណែនាំថា ដើម្បីជួយកុមារឱ្យលេងហ្គេម ដោយមិនបង្កផលប៉ះពាល់អវិជ្ជមាន គឺមាតាបិតា ត្រូវលេងហ្គេមជាមួយកុមារ។ ឪពុកម្ដាយ ត្រូវអង្គុយចុះ ហើយបង្រៀនកុមារអំពីរបៀបលេងហ្គេមដែលត្រឹមត្រូវ។ អនុញ្ញតឱ្យពួកគេបង្ហាញសមត្ថភាព និងជំនាញរបស់គេ ដោយរីករាយ។
លទ្ធផលដែលទទួលបានពីការស្រាវជ្រាវ និងសម្ភាសន៍ជាមួយឪពុកម្ដាយ ដែលអនុវត្តវិធីសាស្ត្រនេះ គឺបន្ទាប់ពីអនុវត្តរួច, ទស្សនៈ និងផ្នត់គំនិតឪពុកម្ដាយចំពោះការលេងហ្គេមរបស់កូនបានផ្លាស់ប្ដូរ ហើយកូន និងឪពុកម្ដាយ អាចមានការសន្ទនាបើកចំហកាន់តែច្រើនអំពីការលេងវីដេអូហ្គេម។
ការចូលរួមលេងជាមួយកូន គឺជាការជួយកូនក្នុងការស្វែងរកចំណង់ចំណូលចិត្តរបស់គេបន្ថែមទៀត ហើយអាចជំរុញឱ្យកុមារសិក្សាស្វែងយល់អំពីការលេងហ្គេមដ៏ត្រឹមត្រូវ។ លើសពីនេះ កុមារក៏អាចយល់ពីគុណតម្លៃ នៃការមានចំណង់ចំណូលចិត្តក្នុងរូបភាពវិជ្ជមាន។ ខណៈកុមារនឹងគិតថា អ្នកជាអាណាព្យាបាល យល់ពីពួកគេ និងយល់អំពីការលេងហ្គេម។
នៅពេលដែលកូនរបស់អ្នកយល់ថា អ្នកយល់ពីការលេងហ្គេម គេនឹងជឿលើអ្វីដែលអ្នកពន្យល់ពួកគេអំពីហ្គេម។ ប្រសិនបើអ្នកពន្យល់គេថា ការលេងហ្គេមក្នុងមួយថ្ងៃ១ម៉ោង ឬ២ម៉ោង គឺគ្រប់គ្រាន់ កុមារជឿលើអ្វីដែលអ្នកនិយាយ ជាជាងដែលអ្នកស្ដីបន្ទោស និងប្រាប់ពួកគេថា គេកំពុងតែធ្វើរឿងឆោតល្ងង់ ហើយនេះគឺជាការខ្ជះខ្ជាយពេលវេលា។
ការប្រាប់កុមារថា ការលេងហ្គេមជារឿងដែលខ្ជះខ្ជាយពេលវេលា វិចារណញ្ញាណរបស់គេ នឹងយល់ថា នេះមិនមែនជាការពិតទេ។ ព្រោះគេយល់ថា ការដែលធ្វើរឿងដែលខ្លួនស្រឡាញ់ចូលចិត្ត មិនមែនជារឿងដែលខ្ជះខ្ជាយពេលវេលានោះទេ។
ការកសាងមូលដ្ឋានរួមនេះ អនុញ្ញាតឱ្យអ្នកមានការសន្ទនាបើកចំហបន្ថែមជាមួយកូន អំពីរបៀបលេងហ្គេមដែលត្រឹមត្រូវ, ពេលវេលាសមស្របដែលគេអាចលេងហ្គេម និងមនុស្សដែលគេសេពគប់ និងលេងហ្គេមជាមួយបាន។
នៅក្នុងសម័យបច្ចេកវិទ្យានេះ ការហាមឃាត់មិនឱ្យកុមារលេងហ្គេម គឺជារឿងមួយ ដែលពិបាក ប៉ុន្តែអាណាព្យាបាលអាចបង្ហាញផ្លូវ និងណែនាំកុមារអំពីការលេងហ្គេមសមស្រប ហើយអនុញ្ញាតឱ្យគេរីករាយ ក្នុងពិភពលោករបស់គេ៕
