រកឃើញម្ចាស់ជ័យលាភីប្រកួតនិយាយជាសាធារណៈស្ដីអំពីថ្នាំជក់

ភ្នំពេញ – ក្រោយពីឆ្លងកាត់ការប្រកួតអស់ជាច្រើនជុំ ទីបំផុតបានរកឃើញបេក្ខជនចំនួន៣រូប ដែលឈ្នះជ័យលាភីក្នុងកម្មវិធីប្រកួតនិយាយសាធារណៈវគ្គផ្ដាច់ព្រ័ត្រ លើប្រធានបទ ក្រោមប្រធានបទ « វិធានការដំឡើងពន្ធថ្នាំជក់ » ។

បេក្ខជនជ័យលាភីទាំង៣រូបនោះ រួមមាន ជ័យលាភីលេខ១ បានទៅលើ កញ្ញា ស៊ិប ស្រីលៀប ជាសិស្សវិទ្យាល័យនេតយ៉ង, ជ័យលាភីលេខ២ បានទៅលើ លោក រ័ត្ន ច័ន្ទនេត្រ ជានិស្សិតសាកលវិទ្យាល័យពុទ្ធិសាស្រ្ត និងជ័យលាភីលេខ៣ បានទៅលើ កញ្ញា ប៉ែលិន លក្ខិណា ជានិស្សិតសាកលវិទ្យាល័យឥន្រ្ទវិជ្ជា ។

ក្នុងនោះបេក្ខជនជ័យលាភីលេខ១ ទទួលបានថវិកា ២លានរៀល, ជ័លាភីលេខ ២ ទទួលបានថវិកា ១លានពីរសែនរៀល និងជ័យលាភីលេខ៣ ទទួលបានថវិកា ៨សែនរៀល ដោយភ្ជាប់ជាមួយមេដាយ និងលិខិតសរសើរពីសាកលវិទ្យាល័យពុទ្ធិសាស្ត្រ និងអង្គការ CMH ។

បើតាមការលើកឡើងរបស់យុវជនឆ្នើមនៅក្នុងកម្មវិធីប្រកួតនិយាយសាធារណៈ ស្ដីពី វិធានការពន្ធថ្នាំជក់ ក្នុងវគ្គផ្ដាច់ព្រ័ត្រថា ការប្រើប្រាស់ផលិតផលថ្នាំជក់ ជាបន្ទុកមួយសម្រាប់រដ្ឋាភិបាលក្នុងការដោះស្រាយ ដោយសារការប្រើប្រាស់ផលិតផលថ្នាំជក់បានបង្កឱ្យប្រជាពលរដ្ឋ ឈឺ ស្លាប់ ពិការ ក្នុងនោះប្រជាពលរដ្ឋកម្ពុជាប្រមាណ ១៥០០០បានស្លាប់ដោយសារតែការជក់បារី។ មិនតែប៉ុណ្ណោះ ការប្រើប្រាស់ថ្នាំជក់ក៏ធ្វើឱ្យខាតបង់ថវិកាប្រមាណ ៦៤៩ លានដុល្លារ ដែលស្មើនឹង៣ភាគរយនៃផលិតផលក្នុងស្រុកសរុប របស់កម្ពុជាផងដែរ។

គួរជម្រាបជូនថា កម្មវិធីប្រកួតនិយាយជាសាធារណៈ ក្រោមប្រធានបទ វិធានការដំឡើងពន្ធថ្នាំជក់ ត្រូវរៀបចំឡើងដោយសាកលវិទ្យាល័យពុទ្ធិសាស្រ្ត សហការជាមួយអង្គការចលនាសដើម្បីសុខភាពកម្ពុជា (CMH) ក្នុងគោលបំណងផ្ដល់ឱកាសឱ្យយុវជនដឹងពីទស្សនៈបំភ័ន្តរបស់ក្រុមហ៊ុន និងការពិតជាក់ស្តែង ព្រមទាំងផ្ដល់ឱកាសឱ្យយុវជនចូលរួមក្នុងកិច្ចការលើកកម្ពស់សុខភាពសាធារណៈ តាមរយៈការដំឡើងពន្ធថ្នាំជក់៕

កញ្ញា វ៉ាន គីមសល់ | Ms. Van Kimsal

កញ្ញា វ៉ាន គីមសល់ បញ្ចប់ការសិក្សាបរិញ្ញាបត្រអក្សរសាស្រ្ដខ្មែរនៅសាកលវិទ្យាល័យភូមិន្ទភ្នំពេញ ឆ្នាំ២០២១ ។ បច្ចុបន្នកញ្ញាជាអ្នករាយការណ៍ព័ត៌មានអប់រំឱ្យសារព័ត៌មាន AMS Education ។