ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាបានបង្ហាញថា កុមារម្នាក់ៗសុទ្ធតែមានសមត្ថភាពនិងសក្តានុពលខ្ពស់លើការសិក្សាមុខវិជ្ជាគណិតវិទ្យា សិល្បៈ វិទ្យាសាស្ត្រសង្គម ព្រមទាំងគំនិតច្នៃប្រឌិតអស្ចារ្យជាច្រើនផ្សេងៗគ្នា។ ប៉ុន្តែវាមិនមែនគ្រប់កុមារទាំងអស់សុទ្ធសឹងតែមានសក្តានុពលទាំងនេះទេ អាស្រ័យលើភាពឆ្លាតវៃរបស់កុមារ និងការដឹកនាំរបស់ម្តាយឪពុកបន្ថែម។ ខាងក្រោមនេះ ជាគន្លឹះសំខាន់ប្រាំពីរចំណុចជួយឱ្យកុមារចូលចិត្តសិក្សាតាមរយៈជំនួយពីម្តាយឪពុក។
១. បង្កើតបរិយាកាសរីករាយនិងកក់ក្តៅនៅក្នុងគ្រួសារ៖ កុមារគ្រប់រូបត្រូវការក្តីស្រឡាញ់ពីម្តាយឪពុកគ្រប់ពេលវេលា។ រូបភាពនៃសេចក្តីស្រឡាញ់ទាំងនោះមានដូចជា ការទំនុកចិត្ត បរិយាកាសកក់ក្តៅ ពាក្យពេចន៍ថ្នាក់ថ្នម និងភាពទន់ភ្លន់ជាដើម។ ទង្វើវិជ្ជមានទាំងនេះនឹងជួយឱ្យកុមារក្លាយជាក្មេងល្អដោយមិនដឹងខ្លួននៅពេលពួកគេចាប់ផ្តើមធ្វើដំណើរដ៏អស្ចារ្យក្នុងជីវិត។ ចំណងទាក់ទងស្និទ្ធស្នាលនៅក្នុងគ្រួសារមានឥទ្ធិពលយ៉ាងខ្លាំងដល់ការសិក្សារបស់កុមារ។
២. ផ្តល់អាហារូបត្ថម្ភត្រឹមត្រូវដល់កុមារ៖ របបអាហារនិងអាហារូបត្ថម្ភត្រឹមត្រូវសម្រាប់កុមារ ផ្ទុយពីអាហារទាំងឡាយណាដែលធ្វើឱ្យកុមារឆ្អែត ឬមិនឃ្លានអាហារ។ វ័យកុមារគួរតែទទួលអាហារសរីរាង្គ ដូចជាបន្លែ ផ្លែឈើស្រស់ឱ្យបានច្រើន ព្រមទាំងជៀសវាងអាហារណាដែរមានសារជាតិប្រៃពេក ផ្អែមពេក ភេសជ្ជៈកំប៉ុង និងអាហារមានខ្លាញ់ច្រើនដូចជាអាហារបំពងគ្រប់ប្រភេទ (Fast food) ។ ការផ្តល់អាហារូបត្ថម្ភត្រឹមត្រូវដល់កុមារនឹងជួយពង្រឹងប្រព័ន្ធភាពសុំា និងមានតួនាទីគាំទ្រដល់ការអភិវឌ្ឍខួរក្បាលរបស់កុមារ។
៣. ជំរុញឱ្យមានចលនានិងហាត់ប្រាណឱ្យបានទៀងទាត់៖ កុមារមានវិចារណញ្ញាណពីធម្មជាតិក្នុងការអង្កេតនិងស្វែងយល់ពីទំនាក់ទំនងរវាងសកម្មភាពនិងការគិតរបស់ពួកគេ។ កាលណាម្តាយឪពុកព្យាយាមជំរុញឱ្យកុមារមានសកម្មភាពរាងកាយ នោះគំនិតច្នៃប្រឌិតរបស់ពួកគេនឹងកើតឡើងជាបន្តបន្ទាប់ អាចជួយឱ្យកុមារមានទំនាក់ទំនងល្អជាមួយមនុស្សជុំវិញខ្លួន។
៤. បំផុសឱ្យកុមារធ្វើសកម្មភាពល្អបំផុតដែលអាចធ្វើបាន៖ នៅពេលកូនរបស់អ្នកធ្វើសកម្មភាពអ្វីមួយ សូមកុំផ្លាស់ប្តូរវាភ្លាមៗបន្ទាប់ពីធ្វើបានពីរបីនាទី តែផ្ទុយទៅវិញត្រូវបំផុសគំនិតវិជ្ជមានជំរុញការអនុវត្តរបស់ពួកគេឱ្យបានច្រើន និងធ្វើឱ្យកាន់តែល្អប្រសើរបន្តិចម្តងៗ។ ចំណុចនេះកុមារនឹងរីករាយពេលដែលធ្វើអ្វីមួយបានល្អឥតខ្ចោះ ដើម្បីទទួលបានបទពិសោធន៍ផង បង្កើនការចងចាំផង ពង្រឹងស្មារតី និងផ្តោតអារម្មណ៍លើកិច្ចការបានល្អ។
៥.ចំណាយពេលវេលាជាមួយកូន ៖ ម្តាយឪពុកត្រូវប្រើប្រាស់ពេលវេលាឱ្យមានតម្លៃក្នុងបុព្វហេតុបណ្តុះបណ្តាលកូន។ ត្រូវគ្រប់គ្រងលើពេលវេលាប្រចាំថ្ងៃផ្ទាល់ខ្លួនឱ្យបានល្អ បង្កើតរឿងនិទានសម្រាប់កូន និងចូលរួមយ៉ាងសកម្មជាមួយកូន។ កុមារចូលចិត្តរៀនតាមរយៈរឿងនិទាន ស្តាប់ចង្វាក់ភ្លេង ច្រៀងចម្រៀង គូរគំនូរ ចម្អិនម្ហូប ដេរប៉ាក់ ហើយសមត្ថភាពនៃការគិតរបស់ពួកគេអាចអភិវឌ្ឍបានយ៉ាងល្អតាមរយៈការលេងកីឡា។
៦. បង្រៀនកូនកុំប្រញាប់ប្រញាល់ ៖ ជំហានដំបូងកុមាររៀនតាមរយៈរបស់ដែលមាននៅជុំវិញខ្លួនពួកគេ ដូចជា ផ្កា សត្វ ដុំថ្ម និងរបស់ជាច្រើនទៀត។ ពួកគេលេងបណ្តើរ រៀនកត់ចំណាំបណ្តើរ និងចាប់ផ្តើមគិតស្រមើស្រមៃរូបភាពផ្សេងៗក្នុងពិភពលោក។ ដំណាក់កាលនេះម្តាយឪពុកមិនត្រូវបង្ខំឱ្យកុមារដឹងគ្រប់រឿងនោះទេ ដោយសារកុមារអាចទទួលយកចំណេះ និងយល់ពីរូបភាពអ្វីមួយតាមអាយុរបស់ពួកគេ។
៧.ស្តាប់និងលើកទឹកចិត្តកូនដោយវិជ្ជមាន ៖ កូនតូចរបស់អ្នកតែងព្យាយាមនិយាយប្រាប់អ្នកពីអ្វីដែលពួកគេបានឃើញ។ សកម្មភាពនេះម្តាយឪពុកនឹងហត់ឆ្លើយ ឬធុញទ្រាន់សំណួរដដែលៗរបស់កូន ប៉ុន្តែចំណុចល្អមួយពេលនេះត្រូវនៅក្បែរ ឆ្លើយសំណួរ និងលើកទឹកចិត្តកូនឱ្យរក្សាគំនិតវិជ្ជមានជាប់ជានិច្ច។
