ក្រសួងការងារ និង​បណ្តុះបណ្តាល​វិជ្ជាជីវៈ បាន​​ប្រកាស​ថា សាលា Thai Nguyen College នៃប្រទេស​វៀតណាម នឹងផ្តល់អាហារូបករណ៍​កម្រិត​សញ្ញាបត្រ​ជាន់ខ្ពស់​បច្ចេកទេស សិក្សា​រយៈពេល៤ឆ្នាំ ដល់​សិស្ស​កម្ពុជា​ចំនួន ៧២កន្លែង។

លក្ខខណ្ឌនៃ​ការជ្រើសរើស ៖ បេក្ខជន​ត្រូវ​មានសញ្ជាតិខ្មែរ, ជាប់​សញ្ញាបត្រ​មធ្យមសិក្សា​ទុតិយភូមិ (ផ្តល់អាទិភាព​សម្រាប់​សិស្ស​ដែល​មាន​និទ្ទេសល្អ), មានសុខភាពល្អ និង​ឧស្សាហ៍​ព្យាយាម​ក្នុងការ​សិក្សា។

ឯកសារ​ដែលត្រូវ​បំពេញ និង​ភ្ជាប់ ៖ ប្រវត្តិរូបសង្ខេប (ជាភាសាខ្មែរ និង​ភាសាអង់គ្លេស), ព្រឹត្តប័ត្រ​ពិន្ទុ​មធ្យមសិក្សា​ទុតិយភូមិ (ជាភាសាខ្មែរ និង​ភាសាអង់គ្លេស), សញ្ញាបត្រ​មធ្យម​សិក្សា​ទុតិយភូមិ (ជាភាសាខ្មែរ និង​ភាសាអង់គ្លេស), សំបុត្រ​កំណើត, វិញ្ញាបនបត្រ​បញ្ជាក់សុខភាព, លិខិតឆ្លងដែនថតចម្លង និង​រូបថត ៤x៦ (ផ្ទៃពណ៌ស ចំនួន២សន្លឹក), លិខិតថ្កោលទោស, លិខិតប្តេជ្ញាចិត្ត។

ការឧបត្ថម្ភពីភាគីវៀតណាម ៖ ប្រាក់ឧបត្ថម្ភប្រចាំខែ ៣ ៧០០ ០០០ដុង (ប្រហែល ១៤០ដុល្លារអាមេរិក), ប្រាក់ឧបត្ថម្ភសម្រាប់ទិញសម្ភារៈសិក្សា និងប្រើប្រាស់ផ្ទាល់ខ្លួន សម្រាប់១ចប់វគ្គសិក្សា (ទទួលបានតែ១ដងគត់)៖ ៥ ៣៨០ ០០០ ដុង (ប្រហែល ២០០ ដុល្លារអាម៉េរិក), ប្រាក់សម្រាប់ការធ្វើដំណើរ (ទទួលបានតែ១ដងគត់)៖ ៤ ០០០ ០០០ ដុង (ប្រហែល ១៥០ ដុល្លារអាម៉េរិក), ផ្តល់ទីតាំងស្នាក់នៅដោយឥតគិតថ្លៃ, ចូលរួមក្នុងពិធីប្រពៃណីជាតិទាំងវៀតណាម និងកម្ពុជា, រៀនភាសាបរទេសដោយឥតគិតថ្លៃតាមកម្មវិធីរួមគ្នា, ប្រើប្រាស់បណ្ណាល័យ អ៊ីនធឺណេត កន្លែងហាត់ប្រាណ ដោយឥតគិតថ្លៃ, មានឱកាសទទួលអាហារូបករណ៍សម្រាប់បន្តសិក្សាថ្នាក់បរិញ្ញាបត្រនៅសាកលវិទ្យាល័យនានាក្នុងប្រទេសវៀតណាម។ រីឯការចំណាយលើថ្លៃសំបុត្រយន្តហោះជាបន្ទុករបស់សាមីខ្លួន។

មុខជំនាញសិក្សា ៖ ទំនាក់ទំនង និងបច្ចេកទេសអេឡិចត្រូនិក, អគ្គិសនីឧស្សាហកម្ម, អេឡិចត្រូនិកឧស្សាហកម្ម, ព័ត៌មានវិទ្យា, គ្រប់គ្រងអាជីវកម្ម, បច្ចេកទេសម្ហូបអាហារ, ប្រៃសណីយ៍ និងទូរគមនាគមន៍, ហិរញ្ញវត្ថុសាជីវកម្ម, ធនាគារ និងហិរញ្ញវត្ថុ, គណនេយ្យសាជីវកម្ម, គណនេយ្យ, សេវាផ្នែកច្បាប់, ភាសាកូរ៉េ និងថែរក្សាសម្ផស្ស។

សម្រាប់បេក្ខជនដែលមានចំណាប់អារម្មណ៍ សូមទំនាក់ទំនង​ទៅកាន់នាយកដ្ឋានគ្រប់គ្រងគ្រឹះស្ថានសិក្សា នៃក្រសួងការងារ និង​បណ្តុះបណ្តាលវិជ្ជាជីវៈ ឬទំនាក់ទំនងទៅកាន់ទូរស័ព្ទលេខ 012 839 040៕