ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសេចក្តីជូនដំណឹងកាលពីដើមសប្តាហ៍នេះ ក្រសួងអប់រំ យុវជន និងកីឡា បានឱ្យដឹងថា គណៈកម្មាធិការអាហារូបករណ៍អ្នកដឹកនាំវ័យក្មេងអាស៊ាន-ចិន (ASEAN-China Young Leaders Scholarship) នឹងផ្តល់អាហារូបករណ៍ថ្នាក់បណ្ឌិត ថ្នាក់បរិញ្ញាបត្រជាន់ខ្ពស់ និងថ្នាក់ស្រាវជ្រាវរយៈពេលខ្លី (រយៈពី៤-៥ខែ) ដល់បេក្ខជនមកពីបណ្តាប្រទេសជាសមាជិកអាស៊ាន ដើម្បីទៅសិក្សានៅសាធារណរដ្ឋប្រជាមានិតចិន សម្រាប់ ឆ្នាំសិក្សា២០២៦-២០២៧។
បេក្ខជនដែលជាប់អារម្មណ៍នេះ នឹងទទួលបានប្រាក់អាហារូបករណ៍សម្រាប់ផ្គត់ផ្គង់ការហូបចុក រ៉ាប់រងថ្លៃសិក្សា ការស្នាក់នៅ និងសំបុត្រយន្តហោះទៅមក កម្ពុជា-ចិន-កម្ពុជា។
លក្ខខណ្ឌ នៃចុះឈ្មោះ ៖ ត្រូវមានសញ្ជាតិខ្មែរ, មានចំណេះដឹងភាសាអង់គ្លេសជ្រៅជ្រះ (IELTS 6.0/TOEFL 80), មានលក្ខណសម្បត្តិសមស្របតាមលក្ខខណ្ឌជ្រើសរើសរបស់សាកលវិទ្យាល័យនីមួយៗ, មានសញ្ញាបត្របរិញ្ញាបត្រ និងមានអាយុក្រោម ៤៥ឆ្នាំ សម្រាប់ថ្នាក់បរិញ្ញាបត្រជាន់ខ្ពស់, មានសញ្ញាបត្របរិញ្ញាបត្រជាន់ខ្ពស់ និងមានអាយុក្រោម ៤៥ឆ្នាំ សម្រាប់ថ្នាក់បណ្ឌិត, មានសញ្ញាបត្រចាប់ពីថ្នាក់បរិញ្ញាបត្រឡើងទៅ សម្រាប់ថ្នាក់ស្រាវជ្រាវរយៈពេលខ្លី, មានបទពិសោធការងារយ៉ាងតិច ១ឆ្នាំ ពិសេសការងារទាក់ទងនឹងកិច្ចការអាស៊ាន ឬ China-ASEAN, មានសុខភាពល្អបរិបូណ៌ទាំងកាយសម្បទា និងសតិបញ្ញា, ពុំមែនជានិស្សិតអាហារូបករណ៍រដ្ឋាភិបាលចិនក្នុងពេលថ្មីៗនេះ។
ការដាក់ពាក្យសុំអាហារូបករណ៍ ៖ បេក្ខជនដែលមានចំណាប់អារម្មណ៍ចំពោះកម្មវិធីអាហារូបករណ៍ខាងលើ សូមចូលរួមដាក់ពាក្យទៅតាម ដំណាក់កាល ដូចខាងក្រោម៖
-ដាក់ពាក្យតាម Online ដោយចូលទៅកាន់គេហទំព័រ http://www.campuschina.org ហើយចុច យក “Scholarship Application for Students” ដើម្បីបំពេញឱ្យបានចប់សព្វគ្រប់។ បេក្ខជនអាចចូលទៅកាន់ គេហទំព័រ http://www.campuschina.org/universities/index.html ដើម្បីស្វែងរកមុខជំនាញសិក្សា នៅតាមសាកលវិទ្យាល័យនីមួយៗ។
-ផ្ញើពាក្យសុំអាហារូបករណ៍ និងឯកសារផ្សេងៗ ដែលបានបំពេញតាម Online ជា Hard copy មក នាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន នៃក្រសួងអប់រំ យុវជន និងកីឡា អគារ លេខ២៣ ផ្លូវ៣៦០ សង្កាត់បឹងកេងកង១ ខណ្ឌបឹងកេងកង (ខាងកើតស្ថានីយទូរទស្សន៍អប្សរា ប្រហែល ៥០ម៉ែត្រ) ឱ្យបានមុនថ្ងៃទី២៤ ខែកុម្ភៈ ឆ្នាំ២០២៦ វេលាម៉ោង ១៦:០០នាទី។
ផ្អែកលើចំនួនបេក្ខជនដែលបានដាក់ពាក្យ ក្រសួងអប់រំ យុវជន និងកីឡា នឹងពិនិត្យលើសំណុំឯកសារ ដើម្បីជ្រើសរើសយកបេក្ខជនថ្នាក់បណ្ឌិត ចំនួន ៥នាក់ ថ្នាក់បរិញ្ញាបត្រជាន់ខ្ពស់ ចំនួន ៥នាក់ និងថ្នាក់ស្រាវជ្រាវ ចំនួន ២នាក់ បញ្ជូនទៅឱ្យ The Joint Committee of ACYLS ដែលមានទីស្នាក់ការនៅទីក្រុងហ្សាការតា ប្រទេសឥណ្ឌូនេស៊ី ពិនិត្យ និងសម្រេច ចុងក្រោយ៕
