ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលារៀនទាំង៣ នៅក្នុងស្រុកកងមាស នៃខេត្តកំពង់ចាម រួមមាន វិទ្យាល័យហ៊ុនសែន កងតាណឹង, វិទ្យាល័យហ៊ុនសែន ពាមជីកង និងអនុវិទ្យាល័យអន្លង់អក ដែលបានក្លាយជាវិទ្យាល័យគំរូ នឹងត្រូវបន្តវិនិយោគជំរុញឱ្យមានសាលារៀនជំនាន់ថ្មី។
ក្នុងពិធីសំណេះសំណាល និងបំពាក់គ្រឿងឥស្សរិយយសការងារ ជូនបុគ្គលិកអប់រំ ក្នុងស្រុកកងមាស ខេត្តកំពង់ចាម ចំនួន១៨៨នាក់ កាលពីពេលកន្លងទៅ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ បាននិងកំពុងយកចិត្តទុកដាក់យ៉ាងខ្លាំងក្នុងការជំរុញនូវកំណែទម្រង់សាលារៀន។ ឯកឧត្តមបណ្ឌិតសភាចារ្យ ក៏បានអបអរសាទរវិទ្យាល័យទាំង៣ ក្នុងស្រុកកងមាស ដែលបានក្លាយជាវិទ្យាល័យគំរូ ដោយថា ក្រសួងនឹងបន្តវិនិយោគជំរុញឱ្យមានសាលារៀនជំនាន់ថ្មីនៅក្នុងស្រុកកងមាសនេះបន្ថែមទៀត ខណៈអត្រាសិស្សប្រឡងជាប់ក្នុងស្រុកកងមាសមានដល់ទៅ ៩៩ភាគរយ។
រដ្ឋមន្ត្រីក្រសួងអប់រំ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោកគ្រូ អ្នកគ្រូ និងបុគ្គលិកអប់រំទាំងអស់ក្នុងការចូលរួមចំណែកអនុវត្តកំណែទម្រង់វិស័យអប់រំឱ្យរីកចម្រើនឡើងជាលំដាប់ ហើយស្នើឱ្យបន្តសហការគ្នាខិតខំប្រឹងប្រែងបន្ថែមទៀត ដើម្បីបន្តកែលម្អបរិស្ថានសិក្សាសំដៅលើកកម្ពស់លទ្ធផលសិក្សាសិស្ស។
ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជាក់ថា ធនធានមនុស្សរឹងមាំ និងមានគុណភាព នឹងជំរុញឱ្យកម្ពុជាបោះជំហានឆ្ពោះទៅមុខកាន់តែលឿនក្នុងការអភិវឌ្ឍសេដ្ឋកិច្ចសង្គមជាតិឱ្យរីកចម្រើនប្រកបដោយចីរភាព។
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កម្មវិធីសាលាជំនាន់ថ្មី ត្រូវបានរៀបចំឡើងក្នុងទិសដៅលើកកម្ពស់គុណភាពអប់រំស្របតាមបរិបទសតវត្សរ៍ទី២១។ ការប្រែក្លាយសាលារៀនជាសាលារៀនជំនាន់ថ្មី គឺទាមទារឱ្យមានការស្ម័គ្រចិត្តពីគណៈគ្រប់គ្រង និងបុគ្គលិកសាលា និងឆន្ទៈក្នុងការប្រែក្លាយជាសាលាជំនាន់ថ្មី។
អ្នកនាំពាក្យក្រសួងអប់រំ បញ្ជាក់ថា កន្លងមកវិទ្យាល័យមួយចំនួននៅក្នុងស្រុកកងមាស បានបង្ហាញពីលទ្ធផលសិក្សាល្អរបស់សិស្ស និងមានអត្រាប្រឡងជាប់បាក់ឌុបលើស ៩០ភាគរយ ដែលនេះបង្ហាញពីសក្តានុពលរបស់សាលានៅស្រុកកងមាស។
លោកជំទាវបណ្ឌិត ឃួន វិច្ឆិកា បញ្ជាក់បន្ថែមថា ក្នុងផែនការជាក់ស្តែង ក្រសួងនឹងប្រែក្លាយសាលារៀនចំនួន៨ ទៀតនៅឆ្នាំសិក្សា២០២៦-២០២៧ បន្ថែមលើសាលាចំនួន ១៤ ដែលកំពុងអនុវត្តស្រាប់ទៅជាសាលារៀនជំនាន់ថ្មី។
គួរជំរាបជូនថា តាមរយៈការធ្វើកំណែទម្រង់វិស័យអប់រំ បានផ្ដល់ឱកាស កាន់តែច្រើនសម្បូរបែបដល់យុវជនកម្ពុជាជំនាន់ក្រោយ ក្នុងការសិក្សារៀនសូត្រចាប់យកចំណេះវិជ្ជា ដើម្បីសម្រេចបាននូវគោលដៅនៃការអប់រំ គឺការទទួលបាននូវ វិជ្ជាសម្បទា បំណិនសម្បទា និងចរិយាសម្បទា ឆ្លើយតបនឹងអនុសាសន៍ដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញយុទ្ធសាស្ត្របញ្ចកោណ-ដំណាក់កាលទី១ ផ្តោតអាទិភាពលើការអភិវឌ្ឍធនធានមនុស្ស ជាគន្លឹះយ៉ាងសំខាន់ក្នុងការជំរុញកម្ពុជាឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និង ឆ្នាំ២០៥០៕
