ក្រៅពីលទ្ធផលសិក្សា សិស្សត្រូវដោះស្រាយជាមួយនឹងកត្តាប្រឈមជាច្រើន ហើយការសម្រេចឱ្យបាននូវលទ្ធផលសិក្សាល្អ មិនមែនដើម្បីបំពេញតាមចំណូលចិត្តរបស់ខ្លួនតែមួយមុខនោះទេ ប៉ុន្តែសិស្សមួយចំនួនក៏ទទួលរងសម្ពាធពីខាងក្រៅខ្លួនផងដែរដូចជា ការរំពឹងទុកពីសង្គម ពីអាណាព្យាបាល ដែលជាកត្តាជំរុញឱ្យបាត់បង់ការរស់នៅជាមួយបច្ចុប្បន្នភាព និងរួមចំណែកបង្កើនភាពតានតឹង ហើយប៉ះពាល់ទៅកាន់ផលិតភាពនៃការសិក្សា។

តាមរយៈ Teenlife បានឱ្យដឹងថា ការអប់រំចិត្តទាំងនោះកើតមានតាមរយៈសកម្មភាពមួយចំនួនដូចជាការឆ្លុះបញ្ចាំង និងការសង្កេតពីបរិយាកាសដែលកើតមាននៅជុំវិញខ្លួន ដោយមានរៀបរាប់លម្អិតដូចខាងក្រោម ៖

ការអប់រំចិត្ត ៖ ការអប់រំចិត្តក្នុងនាមជាសិស្សនៅត្រង់ចំណុចនេះចង់សំដៅលើ ការយកចិត្តទុកដាក់ទាំងស្រុងទៅលើសកម្មភាព ឬក៏បរិយាកាសដែលកើតមាននៅជុំវិញខ្លួន។ មានន័យថា ទោះស្ថិតក្នុងកាលៈទេសៈណា ឬធ្វើសកម្មភាពអ្វីក៏ដោយ គួរផ្តោតលើរឿងតែមួយឱ្យចប់សព្វគ្រប់សិន ទើបបន្តទៅធ្វើសកម្មភាពដទៃទៀត។ ឧស្សាហ៍សង្កេតខ្លួនឯង ថា តើប៉ុន្មានដងក្នុងមួយថ្ងៃ ដែលធ្វើសកម្មភាពពីរបីក្នុងពេលតែមួយ ប៉ុន្តែមិនអាចបញ្ចប់ជាលទ្ធផលសូម្បីតែមួយ ឬធ្វើសកម្មភាពលាយឡំច្រើន ហើយបង្កើននូវអាការស្រ្តេសបន្ថែម?​ ឧទាហរណ៍ដូចជា ចុចមើលបណ្តាញសង្គមបណ្តើរ​ញាំ​បណ្តើរ គណនាលេខបណ្តើរនិយាយគ្នាលេងបណ្តើរ ដែលសកម្មភាពទាំងនេះ មើលមួយភ្លែតដូចជាការសន្សំពេលវេលា ប៉ុន្តែជាការរុញច្រានឱ្យស្មារតីមិនស្ថិតក្នុងបច្ចុប្បន្នភាព។

ដូច្នេះ ពេលដែលនិយាយដល់ការអប់រំចិត្ត គេមិនអាចរំលងបានឡើយចំពោះ៣ចំណុចសំខាន់ៗដែលត្រូវសួរទៅកាន់ខ្លួនឯងដូចជា តើកំពុងមានអារម្មណ៍បែបណា? កំពុងគិតអី? មានអ្វីកើតឡើងខ្លះនៅជុំវិញខ្លួន? ដែលការសួរបែបនេះ ក៏បានរួមចំណែកកុំឱ្យបារម្ភអំពីអតីតកាល ឬក៏អនាគតច្រើនជ្រុល ប៉ុន្តែជំនួសមកវិញនូវការផ្តោតលើស្ថានភាពជាក់ស្តែងបច្ចុប្បន្ននេះ​។

គុណសម្បត្តិគោលៗបានពីការយកចិត្តទុកដាក់លើការអប់រំចិត្តកំឡុងពេលសិក្សា ៖ សម្រាប់សិស្សដែលកំពុងតែប្រឈមនឹងបញ្ហាតានតឹង រងសម្ពាធពីទំនាក់ទំនងក្នុងគ្រួសារមិនល្អ ឬក៏សម្ពាធពីការរំពឹងទុកខ្ពស់ពីមជ្ឈដ្ឋានខាងក្រៅ ក៏ដូចជាមានទំនួលខុសត្រូវធ្ងន់ លើសពីដែនសមត្ថភាព ឬលទ្ធភាព ការផ្តល់អាទិភាពលើការអប់រំស្មារតី អប់រំចិត្ត បានដើរតួនាទីសំខាន់ក្នុងការបន្ថយស្រ្តេស និងគិតគូរអំពីផលិតភាពនៃការសិក្សា។ បន្ថែមពីនោះ ការធ្វើឱ្យស្មារតីខ្លួនស្ថិតក្នុងបច្ចុប្បន្នភាព មិនត្រឹមតែបន្ថយភាពតានតឹងប៉ុណ្ណោះទេ ប៉ុន្តែក៏បានជួយសម្រួលទៅកាន់ការស្វែងរកខ្លួនឯង ទាំងសក្តានុពល និងជំនាញដែលខ្លួនកំពុងរៀន។

នៅពេលដែលមានទម្លាប់ផ្តល់ការយកចិត្តទុកដាក់ទាំងស្រុងទៅលើបច្ចុប្បន្នភាព មិនថាជាមួយមិត្ត សមាជិកគ្រួសារ បងប្អូន ដៃគូ គ្រូ ឬអ្នកបង្វឹកបង្ហាត់នោះទេ ភាពវិជ្ជមានគឺបង្កើនជំនាញស្តាប់ និងការផ្សារភ្ជាប់ទំនាក់ទំនងជាមួយគ្នាឱ្យកាន់តែស៊ីជម្រៅ។ ការអប់រំចិត្តជួយបង្កើនឱ្យការចូលរួមពេញលេញជាមួយអ្នកដែលត្រូវទំនាក់ទំនងជាមួយ និងការប្រាស្រ័យទាក់ទងជាមួយមនុស្សជុំវិញខ្លួន។

វិធីសាស្រ្តជារួមក្នុងការអនុវត្ត ៖ មានកត្តាជាច្រើនដែលអាចអនុវត្តន៍បានដើម្បីជំរុញដល់ការពង្រឹងស្មារតី ឬក៏ការអប់រំចិត្ត ដូចជា ការរៀនពីរបៀបដកដង្ហើម ការផ្តោតលើរឿងតែមួយ ធ្វើសកម្មភាពមួយៗឱ្យចងចាំបន្តសកម្មភាពបន្ទាប់ ការហាត់យូហ្កា ព្រោះត្បិតយូហ្កាប្រើប្រាស់រាងកាយទៅអនុវត្តន៍ ប៉ុន្តែវាបានរួមចំណែកយ៉ាងខ្លាំងទៅកាន់សុខភាពផ្លូវចិត្ត​។ ក្រៅពីនេះ គួរបង្កើតទីតាំងដែលមានបរិយាកាសស្ងប់ ឬគិតទុកមុនអំពីលទ្ធផលវិជ្ជមាន និងបន្តធ្វើសកម្មភាពដែលខ្លួនឯងចូលចិត្តបន្ទាប់ពីកាតព្វកិច្ចជាសិស្ស ដោយមានដូចជាលេងកីឡា ឬតន្រ្តីជាដើម៕