បើតាមអ្នកជំនាញអប់រំកុមារតូចថា ការចូលរួមរបស់កុមារក្នុងកិច្ចការផ្ទះ ដូចជា ការស្រោចទឹករុក្ខជាតិ ឬបត់សម្លៀកបំពាក់ជាដើម។ ការងារទាំងនេះពិតជាមានអត្ថប្រយោជន៍រយៈពេលវែង និងរយៈពេលខ្លីជាច្រើនដែលជួយកុមារយល់ពីទម្លាប់បង្កើតទំនុកចិត្ត និងបណ្តុះអារម្មណ៍នៃការចូលរួមក្នុងក្រុមគ្រួសាររបស់ពួកគេ។

ខាងក្រោមនេះ ជាអត្ថប្រយោជន៍មួយចំនួនដែលឪពុកម្ដាយគួរអនុញ្ញាតិឱ្យកូនៗរបស់ខ្លួនជួយការងារផ្ទះ ៖

ទី១. ជួយឱ្យកុមារស្គាល់អំពីការទទួលខុសត្រូវ ៖ ការចូលរួមរបស់កុមារក្នុងកិច្ចការផ្ទះ និងប្រគល់កិច្ចការតូចៗឱ្យពួកគេ ពិតជាធ្វើឱ្យពួកគេបណ្ដុះការទទួលខុសត្រូវ។ នេះជាបំណិនជីវិតដ៏សំខាន់ដែលនឹងជួយកុមារតាំងពីវ័យក្មេង និងរក្សាការទទួលខុសត្រូវរហូតដល់ពួកគេធំឡើង។ ឧទាហរណ៍ ការរៀបចំបន្ទប់គេង ឬចាក់ទឹកដាក់ដបតូចៗ ទាំងនេះគឺជារឿងតូចតាចដែលក្មេងៗអាចធ្វើបានយ៉ាងងាយស្រួល ព្រមទាំងជួយឱ្យពួកគេធ្វើការជាក្រុម និងអនុវត្តការទទួលខុសត្រូវរបស់ពួកគេបានល្អ។

ទី២. ជួយអភិវឌ្ឍសមត្ថភាពអនុវត្តផែនការ ៖ ការធ្វើផែនការមានសារៈសំខាន់នៅដំណាក់កាលណាមួយនៃជីវិត ហើយអ្វីដែលប្រសើរជាងនេះ ប្រសិនបើកូនរបស់អ្នករៀនជំនាញជាមូលដ្ឋាននេះនៅដំណាក់កាលដំបូងនៃជីវិត ។ ទន្ទឹមគ្នានេះ នៅពេលដែលពួកគេធំឡើង ហើយត្រូវធ្វើកិច្ចការច្រើន ការរៀបចំផែនការឱ្យបានត្រឹមត្រូវគឺមានសារៈសំខាន់ខ្លាំងណាស់។

ទី៣. ជួយបង្រៀនកុមារឱ្យមានសមត្ថភាពចេះយល់ចិត្ត និងជួយអ្នកដទៃ ៖ ការជួយអ្នកដទៃគឺជាវិធីដ៏ល្អមួយដើម្បីបង្រៀនការយល់ចិត្តដល់កូនរបស់អ្នក។ អនុញ្ញាតឱ្យកូនរបស់អ្នកជួយសមាជិកផ្សេងទៀតនៃគ្រួសាររបស់ពួកគេ។ នៅពេលពួកគេបញ្ចប់ការងារ ត្រូវប្រាកដថា អ្នកពេញចិត្តចំពោះពួកគេ។ ប្រើប្រយោគដូចជា កូនធ្វើការងារនេះបានល្អណាស់! នេះជាការលើកទឹកចិត្តពួកគេឱ្យចាប់អារម្មណ៍លើការងារផ្សេងទៀត ហើយនឹងយល់ពីសារៈសំខាន់នៃការយល់ចិត្តផងដែរ។

ទី៤. ជួយឱ្យកុមារមានអារម្មណ៍ពេលសម្រេចសមិទ្ធផល ៖ ការបញ្ចប់ភារកិច្ចដោយទទួលបានការសរសើរ ធ្វើឱ្យកុមារមានអារម្មណ៍ល្អ ។ ដូចនេះ រាល់ពេលដែលអ្នកនឹងចាត់ចែងកិច្ចការផ្ទះខ្លះដល់កូនៗ ពួកគេនឹងព្យាយាមធ្វើបានល្អជាងនេះ ព្រោះពួកគេដឹងថា ពួកគេនឹងត្រូវបានគេកោតសរសើរប្រសិនបើពួកគេធ្វើកិច្ចការល្អ។

ទី៥. ជួយឱ្យកុមារពឹងលើខ្លួនឯង ៖ គ្មានអ្វីចម្លែកនោះទេដែលក្មេងៗតែងពឹងផ្អែកលើឪពុកម្តាយរបស់ពួកគេ ប៉ុន្តែការផ្តល់ទំនួលខុសត្រូវតូចតាចនឹងធ្វើឱ្យពួកគេមានភាពជឿជាក់លើខ្លួនឯង។ ទន្ទឹមគ្នានេះ នឹងបង្កើតទំនុកចិត្តលើពួកគេក្នុងការធ្វើកិច្ចការដោយខ្លួនឯង ជាជាងពឹងលើនរណាម្នាក់។

ជាមួយគ្នានេះ ឪពុកម្ដាយត្រូវតែចងចាំថា កុមារនៅក្មេង ដូច្នេះ ត្រូវទទួលស្គាល់ថា ការងារដែលបានដាក់ឱ្យពួកគេធ្វើមិនមែនជាការដែលល្អឥតខ្ចោះនោះទេ។ ប៉ុន្តែក៏មិនមែនមានន័យថា អ្នកឈប់ឱ្យពួកគេជួយការងារផ្ទះនោះដែរ គឺត្រូវឱ្យតម្លៃលើការខិតខំប្រឹងប្រែង និងលើកទឹកចិត្តឱ្យពួកគេធ្វើកាន់តែប្រសើរ៕