ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងយុគសម័យឌីជីថល ការប្រើប្រាស់ទូរស័ព្ទ និងកុំព្យូទ័របានក្លាយជាផ្នែកមួយដែលមិនអាចខ្វះបានក្នុងជីវិតប្រចាំថ្ងៃ។ ទោះជាយ៉ាងណា ការសម្លឹងអេក្រង់យូរពេកអាចបង្កផលប៉ះពាល់អវិជ្ជមានយ៉ាងធ្ងន់ធ្ងរដល់ភ្នែក។ ដើម្បីឆ្លើយតបនឹងបញ្ហានេះ អង្គការសុខភាពពិភពលោក (WHO) បានណែនាំនូវវិធីសាស្ត្រ «២០នាទី-២០ហ្វីត-២០វិនាទី» ដែលជាខែលការពារភ្នែកយ៉ាងមានប្រសិទ្ធភាព។
តើអ្វីទៅជាវិធាន ២០-២០-២០?
វិធីសាស្ត្រ ២០នាទី-២០ហ្វីត-២០វិនាទី ត្រូវបានបង្កើតឡើងដើម្បីកាត់បន្ថយភាពនឿយហត់ភ្នែក (Eye Strain) និងការពារបញ្ហាមីញ៉ូប។ បើតាម WHO វិធីសាស្ត្រនេះ គួរតែត្រូវបានអនុវត្ត នៅពេលដែលអ្នកប្រើប្រាស់ទូទៅកំពុងមានកិច្ចការក្នុងរយ:ពេលយូរលើកញ្ចក់អេក្រង់ទូរស័ព្ទ ឬកុំព្យូទ័រ ដោយ ជារៀងរាល់២០នាទីអំឡុងពេលធ្វើការលើអេក្រង់កុំព្យូទ័រ អ្នកប្រើប្រាស់ត្រូវផ្អាកការសម្លឹងលើអេក្រង់ និងជំនួសដោយការក្រឡេកមើលទៅវត្ថុផ្សេងៗ ដែលស្ថិតនៅជុំវិញខ្លួនរបស់អ្នក ដែលមានចម្ងាយប្រមាណ២០ហ្វីត ឬប្រហែល៦ម៉ែត្រ ចំនួន ២០វិនាទី ។ ការធ្វើបែបនេះ ជារឿយៗ គឺជាវិធីសាស្រ្តល្អបំផុត ដើម្បីការពារភ្នែករបស់អ្នកពីបញ្ហាប្រឈមនានានៅពេលអនាគត។
វិធីសាមញ្ញៗផ្សេងទៀត ដើម្បីជួយការពារភ្នែក
ក្រៅពីវិធាន ២០-២០-២០ យោងតាមការចុះផ្សាយរបស់ CNET មានគន្លឹះ ៨ចំណុចទៀត ក្នុងការថែរក្សាភ្នែក និងការពារភ្នែកដោយទម្លាប់សាមញ្ញៗប្រចាំថ្ងៃ។
គន្លឹះទី១. ការប្រើវ៉ែនតាការពារពន្លឺថ្ងៃ ៖ វាមានសមត្ថភាពជួយការពារពន្លឺព្រះអាទិត្យ (UV) និងកាត់បន្ថយហានិភ័យនៃជំងឺភ្នែក ដូចជា ភ្នែកឡើងបាយ មហារីកបាតភ្នែក និងកត្តាជាច្រើនដែលបណ្ដាលឱ្យភ្នែកមានបញ្ហា។
គន្លឹះទី២. សម្រាកពីការសម្លឹងអេក្រង់៖ យើងគួររក្សាគម្លាតភ្នែកពីអេក្រង់ទូរស័ព្ទ ឬកុំព្យូទ័រដែលមានពន្លឺ ឬសម្លឹងទៅកាន់អ្វីមួយផ្សេងទៀតរៀងរាល់២០នាទីម្តង ដោយអាចចោលកន្ទុយភ្នែក សម្លឹងមើលទៅជុំវិញខ្លួន ក្នុងចន្លោះ២០វិនាទីយ៉ាងតិច។
គន្លឹះទី៣. ធ្វើឱ្យរាងកាយមានចលនា៖ យើងគួរតែចំណាយពេលហាត់ប្រាណយ៉ាងហោចណាស់ ១ថ្ងៃចំនួន ១៥០នាទី ធ្វើឱ្យរាងកាយមានចលនា ដើម្បីពង្រឹងសុខភាពភ្នែក។
គន្លឹះទី៤. គួរសម្រាកសម្លឹងមើលអេក្រង់ទូរស័ព្ទ ឬកុំព្យូទ័រ ហើយចេញទៅក្រៅ ៖ ការសិក្សាមួយបានបង្ហាញថា នៅពេលដែលកុមារ មនុស្សវ័យជំទង់ ឬយុវវ័យមានឱកាសក្នុងការចេញទៅក្រៅបានច្រើន គឺអាចអភិវឌ្ឍន៍ភាពមុតច្បាស់ នៃការសម្លឹងមើលរបស់ភ្នែក ប៉ុន្តែកុំភ្លេចប្រើប្រាស់វ៉ែនតា ដើម្បីការពារពន្លឺផង។
គន្លឹះទី៥. មិនគួរជក់បារី ពីព្រោះការជក់បារី វានឹងប៉ះពាល់មិនត្រឹមតែសុខភាពរូបរាងកាយប៉ុណ្ណោះទេ តែថែមទាំងសុខភាពភ្នែកផងដែរ មានដូចជា ភ្នែកឡើងបាយ និងជំងឺទឹកដក់ក្នុងភ្នែកជាដើម។
គន្លឹះទី៦. គួរបរិភោគអាហារឱ្យមានតុល្យភាព តាមរយៈការជ្រើសរើសអាហារដែលមានសារធាតុចិញ្ចឹម និងមានជាតិវិតាមីនចម្រុះប្រភេទ និងមានជាតិអូមេហ្គាដើម្បីជួយទ្រង់ទ្រង់ដល់សុខភាពភ្នែករបស់យើង ។
គន្លឹះទី៧. ជៀសវាងត្រដុសភ្នែកនៅពេលសម្លឹងមើលអេក្រង់ទូរស័ព្ទ ឬកុំព្យូទ័រយូរ ដោយហេតុថា វានឹងបណ្តាលឱ្យភ្នែករបស់យើងអាចឆ្លងមេរោគ ឈឺភ្នែក និងស្ងួតភ្នែកជាដើម ។ ជំនួសឱ្យការជូត ឬត្រដុសភ្នែកខ្លាំងៗ យើងគួរប្រើប្រាស់ទឹកលាងភ្នែក ដើម្បីផ្តល់សំណើមទៅកាន់ភ្នែក ។
គន្លឹះទី៨. គួរឧស្សាហ៍លាងដៃឱ្យបានញឹកញាប់ ជាពិសេសមុនពេលទៅប៉ះពាល់ភ្នែក ពីព្រោះវាមិនត្រឹមតែជួយឱ្យភ្នែកមានសុខភាពល្អប៉ុណ្ណោះទេ ប៉ុន្តែវាក៏ជួយកាត់បន្ថយហានិភ័យ នៃជំងឺផ្លូវដង្ហើមផងដែរ៕
