ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
“សូមឱ្យក្លាយជាសហគ្រិន ព្រោះតែក្ដីស្រមៃ ក្ដីស្រឡាញ់ និងទឹកចិត្តចង់ចូលរួមដោះស្រាយបញ្ហាសង្គម មិនមែនព្រោះតែឃើញភាពជោគជ័យរបស់អ្នកដទៃ ឬការក្លាយជាអ្នកមាននោះទេ”។ នេះជាប្រសាសន៍លើកឡើងរបស់លោក ស គីណាល់ អនុប្រធានប្រតិបត្តិ នៃសមាគមសហគ្រិនវ័យក្មេងកម្ពុជា ក្នុងពិព័រណ៌ការងារ និងផលិតភាពជាតិ ២០២៤ កាលពីពេលថ្មីៗនេះ។
លោក ស គីណាល់ បានលើកឡើងថា សម្រាប់យុវជន ដែលមានគំនិតចង់ក្លាយជាសហគ្រិន ត្រូវគិតថា ខ្លួនចង់ក្លាយជាសហគ្រិន ដោយសារចង់ដោះស្រាយបញ្ហាសង្គម និងធ្វើឱ្យសង្គមមានភាពប្រសើរឡើង។ បន្ទាប់មកសូមគិតថា ទ្រព្យសម្បត្តិ លុយកាក់ គឺជារង្វាន់ ដែលទទួលបានពីការខិតខំប្រឹងប្រែង និងការដោះស្រាយបញ្ហាសម្រាប់សង្គម។ លោកសង្កត់ធ្ងន់ថា បើមិនដូច្នេះទេ នៅពេលចាប់ផ្ដើមចេញរកស៊ី យើងនឹងក្លាយជាអ្នករកស៊ី ដែលគ្មានសុចរិតភាព គ្មានក្ដីស្រឡាញ់ និងស្នាដៃ ប៉ុន្តែគឺរកស៊ី ដើម្បីតែលុយមួយមុខ។
លោកបន្តថា លើសពីការដោះស្រាយបញ្ហាសង្គម សូមយុវជនធ្វើជាសហគ្រិន ដែលបង្កើតគុណតម្លៃ សម្រាប់ស្ថាប័ន និងសង្គម មិនមែន ដើម្បីតែភាពល្បីល្បាញ ដែលចង់ឱ្យសង្គមស្គាល់ថាខ្លួនជាសហគ្រិន, បើមិនដូច្នេះទេ យើងនឹងឈ្លក់វង្វេងនឹងភាពល្បីល្បាយ។
សហគ្រិនរូបនេះ បានប្រៀបធៀប ពីការរកស៊ី ទៅនឹងការរៀនសូត្រថា ការធ្វើជាសហគ្រិនមិនខុសពីការរៀននោះទេ ការរៀន គឺយើងចង់បានសញ្ញាបត្រ ប៉ុន្តែអ្វីដែលលើសពីការទទួលស្គាល់ ដែលយើងមានសញ្ញាប័ត្រ គឺចំណេះដឹងដែលទទួលបានពីការសិក្សា។ ហេតុនេះ ការធ្វើជាសហគ្រិនក៏មិនខុសគ្នាដែរ គឺយើងធ្វើ ដើម្បីស្ថាប័ន និងសង្គម។
ការធ្វើជាសហគ្រិន ប្រៀបបានដូចជាយើងរៀនដែរ ដើម្បីទទួលបានសញ្ញាបត្រ អ្វីដែលយើងចង់បានបំផុត គឺចំណេះដឹង សញ្ញាបត្រគ្រាន់តែជាការទទួលស្គាល់ប៉ុណ្ណោះ។
លោក គីណាល់ បានបញ្ជាក់ថា ក្នុងលក្ខខណ្ឌសង្គមបច្ចុប្បន្ន ការគាំទ្រ និងចូលរួមជ្រោមជ្រែងយុវជនដែលមានក្តីស្រមៃចង់ក្លាយជាសហគ្រិនពិតជាមានសារៈសំខាន់ណាស់សម្រាប់កម្ពុជា។ លោកបន្តថា មូលហេតុដែលសំខាន់ ព្រោះយុវជនគឺជាកតាលីករដ៏សំខាន់ក្នុងការជំរុញសេដ្ឋកិច្ចជាតិ, យុវជនជាអ្នកដែលមានឥទ្ធិពល និងប៉ះពាល់ខ្លាំងលើសង្គម, យុវជនជាអ្នកដឹកនាំនៅថ្ងៃអនាគត ហើយជាពិសេស យុវជននៅថ្ងៃនេះ ក្លាយជាគម្រូ សម្រាប់យុវជន នៅជំនាន់បន្ទាប់ទៀត៕
