ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដោយមើលឃើញពីបញ្ហាប្រឈមរបស់កសិករ យុវជនខ្មែរមួយក្រុមដែលមានសមាជិកចំនួន ១០នាក់ មកពីក្រុមហ៊ុន CAM-Science បានបង្កើតឧបករណ៍មួយឈ្មោះថា CAM-Smart Irrigation ជាប្រព័ន្ធស្រោចស្រពដំណាំឆ្លាតវៃ ដែលជួយកសិករអាចបញ្ជាទឹកបិទ ឬបើក អាចកំណត់កាលវិភាគស្រោចស្រព ឬពិនិត្យមើលសំណើមដីពីចម្ងាយតាមរយៈទូរស័ព្ទដៃបានគ្រប់ទីកន្លែង។ ទន្ទឹមគ្នានេះ ប្រព័ន្ធស្រោចស្រពដំណាំឆ្លាតវៃ ក៏បានជាប់ជ័យលាភីលេខ១ នៅក្នុងកម្មវិធីប្រកួតប្រជែងគំរូអាជីវកម្ម ឆ្នាំ២០២៣ កាលពីពេលកន្លងទៅថ្មីៗនេះដែរ។
កញ្ញា នាក់ សុខគីម ជានិស្សិតឆ្នាំទី៣ នៃសាកលវិទ្យាល័យភូមិន្ទភ្នំពេញ និងជាស្ថាបនិកក្រុមហ៊ុន CAM-Science បាននិយាយថា ការបង្កើតឧបករណ៍ប្រព័ន្ធស្រោចស្រពដំណាំឆ្លាតវៃ ឈ្មោះថា CAM-Smart Irrigation គឺដើម្បីជួយដល់កសិករឱ្យផ្លាស់ប្ដូរការស្រោចដំណាំបែបប្រពៃណីទៅបែបបច្ចេកវិទ្យាវិញតាមរយៈទូរស័ព្ទដៃ។ កញ្ញាបន្តថា សព្វថ្ងៃប្រជាជនខ្មែរភាគច្រើននៅដាំដំណាំបែបប្រពៃណី ស្រោចទឹកដំណាំដោយប្រើកម្លាំង និងចំណាយពេលវេលាច្រើន ផ្ទុយទៅវិញប្រសិនបើគាត់ងាកមកប្រើប្រាស់បច្ចេកវិទ្យាស្រោចដំណាំពីចម្ងាយតាមរយៈទូរស័ព្ទដៃ នោះនឹងកាន់តែចំណេញពេលវេលា ចំណេញកម្លាំង និងមិនត្រូវចំណាយថវិកាជួលកម្មករច្រើន។
ស្ថាបនិកវ័យក្មេងរូបនេះ បន្ថែមថា មូលហេតុដែលក្រុមខ្លួនចូលរួមប្រកួតប្រជែងក្នុងកម្មវិធីគំរូអាជីវកម្ម ព្រោះកម្មវិធីនេះជួយលើកកម្ពស់សិស្ស និស្សិត ដែលមានគំនិតក្នុងការបង្កើតអាជីវកម្ម ដើម្បីដោះស្រាយបញ្ហានានានៅក្នុងសង្គម ។ លើសពីនេះ ប្រសិនជាបានជាប់ក្នុងកម្មវិធីនឹងទទួលបានការបណ្ដុះបណ្ដាលពីសាស្រ្តាចារ្យ ព្រមទាំងមានអ្នកមានបទពិសោធន៍មួយចំនួនក្នុងការជួយអភិវឌ្ឍអាជីវកម្ម ហើយអាចទទួលបានប្រាក់រង្វាន់សម្រាប់ប្រើប្រាស់នៅក្នុងអាជីវកម្មផងដែរ។
“នៅពេលក្រុមយើងអាចទទួលបានជ័យលាភីលេខ១ ខ្ញុំមានអារម្មណ៍ថា សប្បាយរីករាយខ្លាំង ហើយមានអារម្មណ៍ថា អ្វីដែលយើងខំប្រឹងតាំងពីដើមមក យើងព្យាយាមដើម្បីវា ហើយយើងពិតជាទទួលបានលទ្ធផលមែន” – កញ្ញា នាក់ សុខគីម ស្ថាបនិកក្រុមហ៊ុន CAM-Science ។
កញ្ញា នាក់ សុខគីម បញ្ជាក់បន្ថែមថា ចំណុចដែលធ្វើឱ្យក្រុមរបស់ខ្លួនបានជាប់ជ័យលាភីឆ្នើមក៏ដោយសារតែក្រុមរបស់នាងបានអនុវត្តស្របតាមលក្ខខណ្ឌនៃការប្រកួតរួមមាន ១. ការកំណត់បញ្ហាច្បាស់លាស់របស់អតិថិជន, ២. អាចសរសេរអំពីគំរូអាជីវកម្មបានត្រឹមត្រូវ ផ្ដោតលើ Business Modal Canvas, ៣. ការចុះដោយផ្ទាល់ដើម្បីសិក្សាពីតម្រូវការរបស់អតិថិជន និងមានដៃគូសហការច្រើន, ៤. សិក្សាពីចំណុចខ្វះខាត ហើយចេះកែតម្រូវ និង៥. ក្រុមការងារដែលរឹងមាំ និងមានជំនាញផ្សេងគ្នា អាចបំពេញឱ្យគ្នាទៅវិញទៅមកបាន។
យុវតីវ័យ២០ឆ្នាំរូបនេះ លើកឡើងថា ក្នុងនាមជាយុវជនជំនាន់ក្រោយ រូបនាង និងសមាជិកក្រុមផ្ទាល់នឹងព្យាយាមប្រើប្រាស់ចំណេះដឹងទាក់ទងនឹងបច្ចេកវិទ្យា ដើម្បីស្វែងរកបញ្ហាដែលប្រជាជនខ្មែរកំពុងជួបប្រទះសព្វថ្ងៃ ដោយមើលបញ្ហាឱ្យទៅជាឱកាស បន្ទាប់មកប្រើឱកាសនោះទៅដោះស្រាយបញ្ហាតាមរយៈការបង្កើតឧបករណ៍ឆ្លាតវៃ។
កញ្ញា នាក់ សុខគីម ក៏បានលើកទឹកចិត្តយុវជនផ្សេងទៀតឱ្យងាកមកចាប់អារម្មណ៍លើបច្ចេកវិទ្យា បន្ទាប់មកព្យាយាមប្រើប្រាស់ចំណេះដឹងលើផ្នែកបច្ចេកវិទ្យាដែលខ្លួនមាន ឆ្លើយតបតម្រូវការរបស់ប្រជាជន ឬអភិវឌ្ឍទៅជាគំនិតអាជីវកម្មមួយដើម្បីជួយទៅដល់សង្គមជាតិ។ ទន្ទឹមគ្នានេះ ប្រសិនជាយុវជនមានគំនិតអាជីវកម្មដែលអាចឆ្លើយតបតម្រូវការរបស់ប្រជាជន ត្រូវចាប់ផ្ដើមសិក្សាអំពីគម្រោងអាជីវកម្មនោះឱ្យបានច្បាស់លាស់ ហើយក៏អាចចូលរួមប្រកួតក្នុងកម្មវិធីគំរូអាជីវកម្មបានផងដែរ ដើម្បីទទួលបានចំណេះដឹងបន្ថែមអំពីការអភិវឌ្ឍអាជីវកម្ម៕
